11 ماسك سهل وفعال لعلاج مشاكل البشرة باستخدام الرمان

بقلمريهام محمود فيبشرة visibility297

الرمان او زي ما معروف باسم “فاكهة الجنة”, هو واحد من انواع الفواكة مش بس طعمها لذيذ ولكن ليها فوايد صحية كتير جدا, والاكتر كمان انه بذور او حبوب الرمان دي ممكن انها تبقى مفتاحك لبشرة متوهجة وصحية, وده اللي هنعرفه النهاردة مع بعض من خلال السطور الجاية, هنشوف مجموعة ماسكات بالرمان للبشرة وهنتعرف على فوايده الجمالية.

فوايد الرمان للبشرة:

1- الحفاظ على بشرتك رطبة:

عصير الرمان بيغذي مستويات الرطوبة في بشرتك وبيحافظ عليها رطبة, لانه مصدر ممتاز جدا لفيتامين C,اللي بيحافظ على البشرة ناعمة وصحية عن طريق تقليل الجفاف, ولما تحطي الرمان بشكل مباشر على البشرة الزيت اللي موجود في بذور الرمان بيساعد على تجديد البشرة عن طريق تجديد الطبقة الخارجية من الجلد واصلاح الجلد.

2- حماية البشرة من عوامل البيئة والشمس:

التعرض للاشعة فوق البنفسجية بيضر البشرة, ولكن الرمان بيمنع ده, لانه بيحتوي على عنصر الانثوسيانين ومضادات الاكسدة اللي ليها خصائص مضادة للالتهابات وبتقلل من التلف اللي ممكن تسببه اشعة الشمس.

3- بيحتوي على فوائد مضادة للشيخوخة:

اكدت الدراسات ان الرمان ممكن انه يقلل من اثار الشيخوخة من خلال زيادة الكولاجين من النوع الاول, والمحتوى المائي للجلد.

فوايد الرمان للبشرة
فوايد الرمان للبشرة

ماسكات بالرمان للبشرة:

1- ماسك عصير الرمان والليمون لعلاج اثار الشمس:

الحاجات اللي هتحتاجيها:

– 1 معلقة كبيرة معجون بذور رمان “اضربيها في الخلاط لحد ما تنعم”.

– ½ معلقة صغيرة عصير ليمون.

الطريقة:

اخلطي الرمان مع عصير الليمون, وحطي الخليط على الوش والرقبة واي مكان بتعاني فيه من اثار الشمس, سيبي الخليط لمدة 30 دقيقة على الاقل وبعدين اغسليه بالمية.

كرري الماسك من 2 – 3 مرات في الاسبوع.

الليمون بيحتوي على خصائص قابضة ومبيضة للبشرة, والرمان بيساعد على تهدئة البشرة واصلاح اضرار الاشعة فوق البنفسجية.

ماسكات بالرمان للبشرة
ماسكات بالرمان للبشرة

2- ماسك الرمان والعسل لترطيب البشرة:

الحاجات اللي هتحتاجيها:

– 1 معلقة كبيرة معجون بذور الرمان.

– 1 معلقة كبيرة عسل نحل.

الطريقة:

اخلطي الرمان مع العسل, حطي الخليط على البشرة وسيبيه لمدة 30 دقيقة, وبعدين اغسليه بالمية.

كرري الماسك من 2 – 3 مرات في الاسبوع.

العسل بيرطب البشرة, والرمان بيحافظ على الرطوبة جوه البشرة, وده هيخلي بشرتك ناعمة زي بشرة الاطفال.

ماسكات بالرمان للبشرة
ماسكات بالرمان للبشرة

3- ماسك الرمان والبابايا لتوهج البشرة:

الحاجات اللي هتحتاجيها:

– 2 معلقة كبيرة زيت بذور الرمان.

– 1 معلقة كبيرة بابايا.

– 1 معلقة صغيرة من زيت بذور العنب.

– 1 معلقة صغيرة عصير عنب.

الطريقة:

اخلطي المكونات كلها مع بعض, حطي الخليط على البشرة, وسيبيه لمدة 30 دقيقة وبعدين اغسليه بالمية الباردة.

كرري الماسك مرتين في الاسبوع.

الماسك بيساعد على تقشير كل خلايا الجلد الميتة, وبيخلي بشرتك ناعمة, زيت بذور العنب بتحتوي على فيتامين E وبيحتوي على حمض اللينوليك اللي بيساعد على تصغير المسام.

4- ماسك الرمان والشاي الاخضر لعلاج حب الشباب:

الحاجات اللي هتحتاجيها:

– 1 معلقة كبيرة معجون رمان.

– 1 معلقة كبيرة زبادي.

– 1 معلقة كبيرة شاي اخضر.

– 1 معلقة كبيرة عسل.

الطريقة:

اخلطي كل المكونات مع بعض, حطي الخليط على البشرة واعملي لها مساج لمدة من 5 – 10 دقايق, وبعدين سيبيه على البشرة 20 دقيقة كمان, وبعدين اغسليه بالمية الباردة.

كرري الماسك مرتين في الاسبوع.

الشاي الاخضر والعسل والرمان مصادر ممتازة جدا لمضادات الاكسدة, اللي بتساعد على تجديد شباب البشرة, وبتنور الوش, وبتمنع حب الشباب.

5- الرمان والكاكاو لشباب البشرة:

الحاجات اللي هتحتاجيها:

– 1 معلقة كبيرة معجون الرمان.

– 1 معلقة كبيرة كاكاو بودر.

الطريقة:

اخلطي الرمان مع الكاكاو, وممكن تضيفي شوية مية صغيرين لو لقيتي الخليط سميك اوي, حطي الخليط على البشرة وسيبيه لحد ما ينشف, وبعدين اغسليه بمية باردة.

كرري الماسك مرتين في الاسبوع.

الكاكاو والرمان الاتنين ليهم فوائد مضادة للشيخوخة لانها غنية بمضادات الاكسدة اللي بتحافظ على توهج البشرة وشبابها.

ماسكات بالرمان للبشرة

6- ماسك الرمان والزبادي لبشرة خالية من العيوب:

الحاجات اللي هتحتاجيها:

– ½ كوباية رمان.

– 3 معالق كبيرة زبادي.

الطريقة:

اضربي الرمان في الخلاط, وبعدين ضيفي له الزبادي واضربيهم مع بعض تاني, حطي الخليط على البشرة وسيبيه لمدة 20 دقيقة, وبعدين اغسليه بالمية.

كرري الماسك مرتين في الاسبوع.

الزبادي والرمان الاتنين بيساعدوا على تجديد شباب الجلد, وبيحتوا على عوامل تفتيح البشرة, والماسك ده مش بس بيخلي بشرتك ناعمة, لكن كمان بيقلل من عيوب البشرة وبيخليها صافية.

ماسكات بالرمان للبشرة

7- ماسك الرمان والشوفان لتجديد البشرة:

الحاجات اللي هتحتاجيها:

– ½ كوباية رمان.

– 2 معلقة كبيرة شوفان بودر.

الطريقة:

اضربي الرمان في الخلاط لحد ما يبقى معجون, وضيفي له الشوفان البودر واضربيهم مع بعض تاني, حطي الخليط على البشرة ودلكيها في حركات دائرية, سيبيه لمدة 30 دقيقة, وبعدين اغسليه بمية باردة.

كرري الماسك مرة في الاسبوع.

الشوفان يعتبر مقشر طبيعي للبشرة, ومع الرمان ده هيساعد على تنعيم البشرة, وتجديد خلايا الجلد, وتنشيط البشرة.

ماسكات بالرمان للبشرة

8- الرمان وزيت اللوز والارز للتجاعيد:

الحاجات اللي هتحتاجيها:

– ½ كوباية رمان مضروب في الخلاط.

– 1 معلقة كبيرة دقيق ارز.

– من 3 – 4 نقط من زيت اللوز الحلو.

الطريقة:

اخلطي الرمان مع دقيق الارز, وضيفي لهم زيت اللوز وقلبيهم مع بعض كويس, حطي الخليط على الوش والرقبة, سيبيه من 20 – 30 دقيقة, وبعدين اغسلية بمية باردة.

كرري الماسك مرتين في الاسبوع.

الماسك ده بيساعد على التقليل من التجاعيد وعلامات الشيخوخة, ومفيد جدا لصاحبات البشرة المختلطة بشكل خاص, وزيت اللوز بيساعد على ترطيب البشرة.

ماسكات بالرمان للبشرة

9- ماسك قشر الرمان والحمص وكريمة الحليب للبشرة الجافة:

الحاجات اللي هتحتاجيها:

– 2 معلقة كبيرة قشر رمان بودر “نشفي قشر الرمان في الشمس وبعدين اطحنيه”.

– 1 معلقة كبيرة حمص مطحون.

– 2 معلقة كبيرة من كريمة اللبن.

الطريقة:

اخلطي قشر الرمان مع الحمص وكريمة اللبن, لحد ما يتكون عندك معجون ناعم, حطي الخليط على البشرة, وسيبيه على الاقل 20 دقيقة, وبعدين اغسليه بالمية.

كرري الماسك من 1 – 2 مرة في الاسبوع.

اللبن معروف بفوايده لترطيب وتفتيح البشرة, والحمص بيساعد على تقشير البشرة وتنضيف المسام, ولو بتعاني من بشرة جافة اوي بننصحك تجربي الماسك ده.

ماسكات بالرمان للبشرة

10- ماسك قشر الرمان ومية الورد والليمون لتفتيح البشرة وعلاج شحوب البشرة:

الحاجات اللي هتحتاجيها:

– 3 معالق كبيرة قشر رمان بودر.

– 2 معلقة كبيرة عصير ليمون.

– 2 معلقة صغيرة مية ورد.

الطريقة:

اخلطي كل المكونات مع بعض, قلبيهم مع بعض كويس, ولو لقيتي الخليط سميك اوي ممكن تزودي شوية مية ورد لحد ما توصلي لقوام متجانس, حطي الخليط على الوش والرقبة وسيبيه لمدة 20 دقيقة, وبعدها اغسليه بمية باردة.

كرري الماسك مرتين في الاسبوع.

الليمون مقشر ممتاز للبشرة وبيساعد على تفتيحها, والماسك كله بيساعد على تفتيح البشرة وعلاج البهتان وشحوب البشرة, وهتلاحظي فرق واضح من اول استخدام.

ماسكات بالرمان للبشرة

11- ماسك قشر الرمان والطين ومية الورد:

الحاجات اللي هتحتاجيها:

– 1 معلقة كبيرة قشر رمان بودر.

– 1 معلقة كبيرة طين “متوفر عند العطار”.

– 1 معلقة كبيرة مية ورد “وممكن تزودي حسب قوام الماسك”.

الطريقة:

اخلطي المكونات كلها مع بعض, حطي الخليط على البشرة وسيبيه لحد ما ينشف لمدة 20 دقيقة, وبعدين اغسليه بمية فاترة.

كرري الماسك من 1 – 2 مرة في الاسبوع.

الماسك ده بيساعد على تنضيف البشرة بعمق, وبتخليها متوهجة, ومش بيجرد البشرة من الزيوت الطبيعية اللي بتغذيها.

ماسكات بالرمان للبشرة

10 وصفات Sheet Masks مذهلة لبشرة نضرة وصحية