روتين بالوصفات الطبيعية لتفتيح الاماكن الغامقة في الجسم
معظم البنات بيعانوا من مشكلة الاماكن الغامقة في الجسم, وكلنا بيكون نفسنا في بشرو بلون موحد وصافية من غير اي عيوب, والنهاردة من خلال موضوعنا هنساعد بنات حوا في حل المشكلة دي وهنقولك على روتين تفتيح الاماكن الغامقة في الجسم وتوحيد لون الجسم.
تفتيح الاماكن الغامقة في الجسم:
1- سكراب الطماطم:
الطماطم بتحتوي على عنصر الليكوبين اللي ليه خصائص طبيعية لتفتيح البشرة, ومع الاستخدام المنتظم لسكراب الطماطم هيفتح لون البشرة على الاقل درجتين.
الحاجات اللي هتحتاجيها:
– شرايح طماطم رفيعة.
– ½ معلقة صغيرة سكر.
الطريقة:
رشي السكر على شريحة الطماطم, وابدأي افركي بخفة على المناطق اللي عايزة تفتحيها لمدة دقايق, وبعدين اغسلي المنطقة بالمية العادية, وبعدها ادهني الجسم باي نوع لوشن او مرطب للجسم, كرري السكراب مرة واحدة في الاسبوع على الاقل لافضل النتايج.
2- ماسك البطاطس لتفتيح البشرة:
البطاطس تعتبر من افضل المكونات اللي بتساعد على تفتيح الاماكن الغامقة في الجسم, لانها بتحتوي على خصائص تبييض طبيعية بتساعد على تفتيح البشرة.
الحاجات اللي هتحتاجيها:
1 ثمرة بطاطس متوسطة الحجم.
الطريقة:
1- ابشري البطاطس, وحطيها على مصفى وبمعلقة او شوكة اضغطي عليها لحد ما تستخرجي منها العصير او المية بتاعتها.
2- هاتي قطعة قطن واغمسيها في مية البطاطس وامسحي بيها على الاماكن الغامقة, سيبيها لحد ما تنشف, وبعدها اغسلي المنطقة بالمية.
3- نشفي بشرتك ورطبيها بمرطب مغذي او بادي لوشن.
4- كرري الماسك كل 3 ايام لافضل النتايج.
3- ماسك خشب الصندل الابيض للتفتيح:
خشب الصندل الابيض بيحتوي على خصائص تفتيح البشرة, وكمان بيساعد على ازالة البقع الغامقة.
الحاجات اللي هتحتاجيها:
– 1 معلقة كبيرة من بودرة خشب الصندل الابيض “متوفر عند العطار”.
– 1 معلقة كبيرة من بودرة خشب الصندل الاحمر.
– 2 معلقة كبيرة مية ورد.
– 1 معلقة صغيرة عدس اصفر.
– 2 معلقة كبيرة لبن كامل الدسم.
الطريقة:
1- انقعي العدس في شوية مية طول الليل, تاني يوم اضربيه في الخلاط لحد ما يبقى عندك معجون ناعم.
2- هاتي طبق حطي فيه العدس وضيفي له خشب الصندل الابيض والاحمر, وبعدين ضيفي بالتدريج مية الورد واللبن وقلبيهم مع بعض كويس لحد ما يتكون عندك خليط بقوام متجانس سهل الفرد على البشرة.
3- بفرشة او بايدك افردي الخليط على كل المناطق الغامقة, وسيبيه لحد ما ينشف.
4- اغسلي بشرتك بالمية, ونشفيها, وبعدها دلكي بشرتك بزيت اللوز الحلو لتغذية البشرة بعمق من جوه.
5- كرري الماسك مرة واحدة كل 7 ايام لافضل النتايج.
الروتين بالفيديو:
وصفات لتفتيح المناطق الحساسة
