غلطات خطيرة بتعمليها مع الفراخ النية ممكن تأثر على صحتك

ريهام محمود
ريهام محمود
في
صحة
1437

معظمنا تقريبا بنحب الفراخ لانها ممكن تتعمل بطرق مختلفة وبتدخل في حاجات كتير ونقدر ننوع في اكلها, ولكن هل تعرفي ان في بعض القواعد والارشادات اللي لازم نمشي عليها اثناء تعاملنا مع الفراخ النية؟ لو مش بتتعاملي مع الفراخ النية بالطريقة الصح ده ممكن يسببلك اضرار في المعدة ويضر بصحتك, عشان كده النهاردة هنقولك اكتر غلطات بتعمليها مع الفراخ النية, وازاي تتعاملي معاها وتطخبيها بشكل صح.

غلطات بتعمليها مع الفراخ النية:

1- بتسيبي الفراخ النية بره التلاجة فترة زيادة عن اللزوم:

كلنا تقريبا لما بنكون عايزين نطبخ الفراخ بنطلعها من الفريزر عشان تفك مع نفسها ونقدر اننا نطبخها, لكن الغلطة اللي بنقع فيها اننا ممكن ننشغل وننسى الفراخ ونسيبها فترة طويلة بره التلاجة, لان حتى اجود انواع الفراخ بيكون ليها فترة زمنية ممكن تقعد فيها بره التلاجة, واكيد مينفعش اننا نخليها تفك بمساعدة الفرن او الميكروويف او اي جهاز, لان المفروض اننا نسيبها تفك بشكل طبيعي في درجة حرارة الغرفة, ولكن في مدة زمنية لده, لان الفراخ النية لو اتسابت فترة طويلة ده ممكن يأدي لتطور البكتيريا الضارة اللي ممكن تسبب مشاكل للجهاز الهضمي, وممكن انها تأدي لامراض زي التسمم الغذائي.

المفروض تعملي ايه: لو اشتريتي فراخ ومش ناوية تعمليها على طول, احفظيها في الفريزر بالطريقة المعتادة, ولما تيجي تطبخيها, طلعيها تفك قبل الطبخ بنص ساعة بس.

غلطات بتعمليها مع الفراخ النية 1
غلطات بتعمليها مع الفراخ النية 1

2- التخزين الغلط للفراخ:

الفراخ بينزل منها عصارة زي كل انواع اللحوم ولو خزنتيها في التلاجة بطريقة غلط ممكن العصارة بتاعتها تنزل وتبوظلك باقي الحاجات اللي في التلاجة.

المفروض تعملي ايه: ياما تشتري فراخ مجمدة جاهزة, او لو هتشتري الفراخ الطازة يبقى تخزنيها في طبق وتغطيها بالفويل, وتحطيها في الرف اللي تحت من الفريزر, ده هيمنع ان اي عصارة تنزل منها وتبوظلك الحاجات اللي حواليها, في حالة لو حصل تسريب منها.

غلطات بتعمليها مع الفراخ النية 2
غلطات بتعمليها مع الفراخ النية 2

3- غسل الفراخ قبل الطبخ:

يمكن كتير هيستغرب من المعلومة دي, لان طبعا كلنا بنغسل الفراخ قبل الطبخ اعتقادا مننا ان احنا كده بنتخلص من كل الجراثيم والبكتريا اللي فيها, ولكن الدراسات اثبتت خطأ المعلومة دي, لان الفراخ بتحتوي على بكتيريا وجراثيم واشهرها “السالمونيلا” ولما بنغسلها بنزود من انتشار البكيتريا دي في كل انحاء المطبخ لان المية اللي بنستخدمها في غسل الفراخ مش سخنة كفاية انها تقتل النوع ده من البكتيريا, وهتنتشر على الاسطح وفي الحوض وفي المطبخ بتاعك كله, وبالتالي هتتنقل لاي اكل تاني بتجهزيه على الاسطح دي, وهتنقل لنا امراض خطيرة زي التسمم الغذائي.

المفروض تعملي ايه: في الحقيقة اننا مش محتاجين نغسل الفراخ قبل الطبخ, لان الدراسات اثبتت ان طبخ الفراخ في درجات حرارة عالية كافي لقتل البكتيريا والجراثيم الموجودة فيها, وممكن تغسلي الفراخ قبل الطبخ في حالة واحدة لو اتوفرت درجة حرارة المية السخنة اوي اللي تكون قادرة على قتل البكتيريا.

وممكن تنضفيها بطريقة تانية من غير استخدام المية, وهي انك تمسحيها بس بمناديل المطبخ, وبعدين تتخلصي من المناديل على طول.

ومن افضل الطرق لغسل وتعقيم الفراخ بطريقة آمنه, انك تفركيها بشرايح ليمون وملح ودقيق, وحطيها في طبق واملي نصه بمية سخنة وضيفي عليها كوبايتين خل ابيض, وسيبي الفراخ منقوعة في الخليط ده لمدة 10 دقايق, وممكن تفركيها بس متنسيش تلبسي جوانتي, ومتغسليش الفراخ بعد المرحلة دي طلعيها من المية واطبخيها على طول.

غلطات بتعمليها مع الفراخ النية 3
غلطات بتعمليها مع الفراخ النية 3

4- التتبيل بطريقة غلط:

خليكي دايما فاكرة ان درجة الحرارة الدافية هي اللي بتأدي لنمو البكتيريا في اللحوم الطازة, وكلنا عارفين اكيد ان تتبيل الفراخ بيديها طعم ونكهة مختلف جدا, ولكن نقع الفراخ في التتبيلة بره التلاجة خطر جدا.

المفروض تعملي ايه: استخدمي كيس بلاستيك او علبة مقفولة وتبلي فيها الفراخ واحفظيها في التلاجة, ولما تحتاجي تطبخيها طلعيها من الكيس او العلبة واطبخيها على طول.

غلطات بتعمليها مع الفراخ النية 4
غلطات بتعمليها مع الفراخ النية 4

5- اعادة استخدام الادوات اللي استخدمتيها في تقطيع الفراخ النية:

انتي ممكن مثلا تطبخي الخضار في طاسة مكان حاجة تانية كنتي عملاها فيها قبل كده, او تستخدمي نفس السكينة لتقطيع اكتر من حاجة, او تقطعي حاجات مختلفة على لوح التقطيع من غير ما تغسليه كل مره كل ده مافيش فيه مشكلة, لكن لما نيجي مع الفراخ النية هنا الخطر, لازم تتجنبي اعادة استخدام الاواني والادوات اللي لمست الفراخ النية, لان اللحوم النية بتحتوي على بكتيريا والتلامس ده ممكن يأدي لتلوث وممكن انه يسبب السالمونيلا.

المفروض تعملي ايه: اغسلي الادوات والاواني كويس جدا قبل اعادة استخدامها مرة تانية بعد الفراخ.

غلطات بتعمليها مع الفراخ النية 5
غلطات بتعمليها مع الفراخ النية 5

المرة الجاية لما تشتري او تطبخي فراخ لازم تحطي في اعتبارك كل الحاجات دي وانتي بتتعاملي مع الفراخ النية.

مقالات متعلقه

10 نصايح صحية سهلة هيفرقوا معاكي

10 نصايح صحية سهلة هيفرقوا معاكي

10 نصايح ممكن تنقذ حياتك في يوم

10 نصايح ممكن تنقذ حياتك في يوم

6 عادات بنعملها دايما ممكن تضرنا اكتر ما تنفعنا

6 عادات بنعملها دايما ممكن تضرنا اكتر ما تنفعنا