7 طرق بسيطة تخلي شعرك طويل وناعم وصحي..ونصايح ازاي تحافظي عليه

ريهام محمود
ريهام محمود
في
شعر
18651

الشعر المجعد الخشن والتالف واللي بيكون صعب التعامل معاه وبيفتقد اللمعان ودايما باهت من اكتر المشاكل اللي بيعاني منها كتير من البنات, لكن اللي متعرفيهوش ان المشاكل دي ممكن تتحل باتباع روتين العناية المناسب للشعر, عشان كده النهاردة هنساعدك في المهمة دي وهنشوف مع بعض 7 علاجات لتحسين صحة الشعر, وهتساعد على تطويله وتنعيمه.

علاجات لتحسين صحة الشعر:

1- الالوفيرا:

الحاجات اللي هتحتاجيها:

– ورقة الوفيرا.

– 2 معلقة كبيرة مية.

– ازازة سبراي.

الطريقة:

1- افتحي ورقة الصبار وطلعي منها معلقتين كبار جل, واتأكدي انك تطلعي الجل الابيض من غير اللون الاصفر.

2- امزجي الجل بالمعلقة لحد ما يبقى ناعم ومافيش فيه كتل.

3- ضيفي للجل معلقتين كبار مية وقلبيهم مع بعض كويس.

4- صبي الخليط ده في ازازة السبراي ورجيها كويس.

5- اغسلي شعرك ونشفيه ورشي عليه كله من الخليط.

6- وسيبيه على الشعر بعد كده عادي من غير غسيل زي اي سبراي عادي.

كرريه من 3 – 4 مرات في الاسبوع.

الصبار يعتبر مصدر غني للانزيمات المحللة للبروتين واللي بتساعد في اصلاح الخلايا التالفة الموجودة في فروة الراس, وده بيحسن صحة بصيلات الشعر وبيعزز نمو الشعر, بيساعد كمان على ترطيب الشعر والحفاظ عليه مترطب طول اليوم, وهيضمن لك ملمس ناعم للشعر.

علاجات لتحسين صحة الشعر 1
علاجات لتحسين صحة الشعر 1

2- المساج بالزيت السخن بزيت جوز الهند او زيت الزيتون:

الحاجات اللي هتحتاجيها:

– من 2 – 3 معالق كبيرة زيت جوز الهند او زيت زيتون.

– فوطة سخنة.

الطريقة:

1- خدي كمية الزيت اللي هتختاريه حسب طول شعرك وسخنيه لمدة ثواني على النار لحد ما يبقى دافي.

2- دلكي الزيت الدافي على فروة الراس والشعر كله.

3- استمري في تدليك الزيت على فروة الراس لمدة 15 دقيقة, وبعدها سيبيه على الشعر لمدة 30 دقيقة كمان.

4- غطي شعرك بفوطة سخنة خلال الفترة دي.

5- اغسلي شعرك بشامبو خفيف خالي من السلفات, وبعدها بالبلسم.

كرري الوصفة مرتين في الاسبوع.

التدليك بالزيت السخن بيساعد على تحفيز بصيلات الشعر, وده بيعزز من نمو الشعر, والوصفة دي تعتبر علاج فعال لترطيب الشعر بعمق, كمان بيساعد على علاج قشرة الشعر والحكة, زيت جوز الهند بيساعد على تغذية الشعر لانه غني بالدهون الثلاثية, وليه قدرة على اختراق اعماق فروة الراس والشعر وده بيمد الشعر بالتغذية المثالية, وزيت الزيتون غني بمضادات الاكسدة والاحماض الدهنية وفيتامين E, وده بيساعد على ترطيب الشعر ومنع واصلاح تلف الشعر.

علاجات لتحسين صحة الشعر 2
علاجات لتحسين صحة الشعر 2

3- اللبن الرايب:

الحاجات اللي هتحتاجيها:

– 1 كوب لبن رايب.

– 2 معلقة كبيرة املا بودر “هتلاقيها عند العطار”.

الطريقة:

1- اخلطي المكونات مع بعض كويس لحد ما يتكون عندك خليط متجانس.

2- حطي الخليط على فروة الراس والشعر كله.

3- وبمجرد ما الخلطة تغطي الشعر كله, سيبيها لمدة 30 دقيقة.

4- اغسلي شعرك بشامبو خفيف خالي من السلفات, وبعدها بالبلسم.

كرري الوصفة من 1 – 2 مرة في الاسبوع.

الرايب بيحتوي على فيتامينات B5, D, الضرورية جدا لصحة الشعر, بتساعد على تقوية الشعر من جوه, وبيساعد على علاج مشكلة قشرة الشعر, وبودرة الاملا بتمد الشعر بفيتامين C اللي بيساعد على نمو الشعر.

علاجات لتحسين صحة الشعر 3
علاجات لتحسين صحة الشعر 3

4- البيض:

الحاجات اللي هتحتاجيها:

– 1 بيضة كاملة.

– 1 معلقة كبيرة زيت زيتون.

– 1 معلقة كبيرة عسل.

– كيس بلاستيك او شاور كاب.

الطريقة:

1- اخلطي كل المكونات مع بعض كويس.

2- حطي الخليط على فروة الراس وعلى الشعر كله.

3- مجرد ما الخليط يغطي فروة الراس والشعر كله, سيبيه لمدة 30 دقيقة.

4- اثناء ما انتي سايبة الخليط على شعرك غطية بكيس او بشاور كاب.

5- اغسلي شعرك بمية باردة وشامبو خفيف خالي من السلفات, وبعدها بالبلسم.

كرري الوصفة من 1 – 2 مرة في الاسبوع.

البيض من اكتر المصادر الغنية بالبروتين, اللي بيساعد على تغذية الشعر وتحسين نسيجه, وبيساعد على اصلاح التلف وبيرجع الحياة للشعر الباهت, والانتظام على الماسك ده هيساعد على تقوية شعرك وترطيبة وهيسهل عليكي التحكم فيه.

علاجات لتحسين صحة الشعر 4
علاجات لتحسين صحة الشعر 4

5- بذور الحلبة:

الحاجات اللي هتحتاجيها:

– ¼ كوباية من بذور الحلبة.

– 1 كوب مية.

الطريقة:

1- انقعي بذور الحلبة في المية وسيبيها ليلة كاملة.

2- الصبح صفي بذور الحلبة من المية وحطيها في الخلاط وضيفي لها شوية صغيرين بس من المية اللي كانت منقوعة فيها واضربيها في الخلاط لحد ما يتكون عندك معجون قوامه متجانس ممكن يتحط على الشعر بسهولة.

3- حطي الحلبة على فروة الراس والشعر كله, وسيبيها لمدة 30 دقيقة.

4- اغسلي الشعر بشامبو خفيف خالي من السلفات, وبعدها بالبلسم.

كرري الماسك مرة واحدة في الاسبوع.

بذور الحلبة غنية بالبروتين, الحديد, فيتامين C, البوتاسيوم, الليثيسين, والعناصر الغذائية الاساسية دي بتشتغل مع بعض وبتساعد على منع تساقط الشعر, وبتمنع قشرة الشعر, وبتمنع التلف, والشيب, وبتزود من كثافة وقوة الشعر.

علاجات لتحسين صحة الشعر 5
علاجات لتحسين صحة الشعر 5

6- عصير البصل:

الحاجات اللي هتحتاجيها:

– عصير بصلة كبيرة.

– من 3 – 4 نقط من زيت اللافندر.

الطريقة:

1- اخلطي عصير البصل مع زيت اللافندر.

2- حطي الخليط على فروة الراس والشعر كله ودلكيه كويس باطراف صوابعك.

3- سيبي الخليط على الشعر لمدة من 10 – 15 دقيقة.

4- اغسلي الشعر بشامبو خفيف خالي من السلفات, وبعدها بالبلسم.

كرري الماسك مرتين في الاسبوع.

عصير البصل بيساعد على منع تساقط الشعر, وتعزيز نمو الشعر, وكمان اعادة نمو الشعر, وده لانه بيحتوي على نسبة عالية من الكبريت اللي بيساعد على تعزيز الدورة الدموية وده بيسمح بتغذية افضل لبصيلات الشعر, بالاضافة انه مصدر غني بالعناصر الغذائية زي البيوتين, المنجنيز, الفلافونويد, فيتامين C, الفوسفور, حمض الفوليك, النحاس, وكلها عناصر بتساعد على استعادة صحة وتألق الشعر.

علاجات لتحسين صحة الشعر 6
علاجات لتحسين صحة الشعر 6

7- خل التفاح:

الحاجات اللي هتحتاجيها:

– 1 معلقة كبيرة من خل التفاح.

– 1 كوب مية.

الطريقة:

1- ضيفي معلقة خل التفاح لكوباية المية وقلبيهم مع بعض.

2- اغسلي شعرك بشامبو خفيف خالي من السلفات, وبعدها بالبلسم.

3- صبي خليط خل التفاح على الشعر كله.

4- متشطفيش الشعر تاني بالمية بعد خل التفاح, يعني يبقى هو اخر شطفه للشعر.

كرريه مرة واحدة في الاسبوع.

خل التفاح بيساعد على تنضيف الشعر من الزيوت والاتربة وتراكم منتجات الشعر, وبينضف الشعر بفعالية من غير استخدام اي مواد كيميائية قاسية عليه, وده هيساعد على تنعيم الشعر.

علاجات لتحسين صحة الشعر 7
علاجات لتحسين صحة الشعر 7

نصايح اضافية لشعر صحي:

1- الحفاظ على نظام غذائي متوازن:

عشان تضمني ان شعرك يكون صحي لازم تزوديه بالتغذية الكافية, واللي بتحطيه على شعرك مش مهم او مش هيبقى فعال لو مش بيتغذى من جوه, عشان كده لزام تتأكدي انك تاخدي جرعة يومية من الدهون الصحية والبروتينات والمواد المغذية, وحافظي دايما على جسمك رطب بالسوائل.

نظام غذائي متوازن
نظام غذائي متوازن

2- اختيار المنتجات المناسبة:

استخدام انواع الشامبو الطبيعي او العشبي الخالي من المواد الكيميائية القاسية زي الكبريت والسلفات ممكن يفرق مع الشعر بشكل كبير جدا, وده لان الكبريتات بتكون قاسية على الشعر جدا وبتجرده من كل الزيوت الطبيعية, وكملي العناية ببلسم شعر خالي من السيليكون.

اختيار المنتجات المناسبة للشعر
اختيار المنتجات المناسبة للشعر

3- التدليك بالزيت:

اعملي تدليك او مساج للشعر على الاقل مرة واحدة في الاسبوع, التدليك بالزيت مش بس بيساعد على تخفيف التوتر, لكن كمان بيعزز الدورة الدموية وبيضمن تغذية سليمة لبصيلات الشعر.

تدليك الشعر بالزيت
تدليك الشعر بالزيت

4- استخدمي مشط خشب باسنان واسعة وفرشة بشعر خشن:

المشط الخشب اللي اسنانه واسعة هيمنع تساقط الشعر, وده يعتبر المشط المثالي للشعر لفك التشابك, وبمجرد ما تفكي التشابك استخدمي فرشة بشعر خشن اللي هتخلي الجذور تستفاد بالزيوت الطبيعية وده هيضمن تغذية وحماية لشعرك, ومهم انك تتجنبي تسريح الشعر وهو مبلول لانه بيكون معرض اكتر للتكسر.

مشط خشب باسنان واسعة وفرشة بشعر خشن
مشط خشب باسنان واسعة وفرشة بشعر خشن

5- متتخطيش خطوة البلسم:

البلسم مهم جدا للحفاظ على صحة الشعر, عشان كده بننصحك متتخطيش او تهملي ابدا خطوة البلسم بعد الشامبو, والافضل كمان ترطيب شعرك بشكل عميق على الاقل مرة واحدة في الاسبوع باستخدام ماسك مرطب للشعر, ولو شعرك جاف الافضل انك تختاري بلسم يكون كويس وبمكونات تساعد على الترطيب.

متتخطيش خطوة البلسم
متتخطيش خطوة البلسم

6- اغسلي الشعر دايما بالمية الباردة:

المية الباردة بتساعد على قفل مسام فروة الراس, وده هيحفظ الرطوبة جوه الشعر وهيضمن لك شعر ناعم وسلس.

اغسلي الشعر دايما بالمية الباردة
اغسلي الشعر دايما بالمية الباردة

7- قص الاطراف بانتظام:

قص اطراف الشعر كل 6 – 8 اسابيع مهم جدا, لان ده هيساعد في التخلص من اي اطراف منقسمة, وده هيمنع ان الضرر او التلف يتنقل فوق لباقي الشعر.

قص الاطراف بانتظام
قص الاطراف بانتظام

8- التوقف عن استخدام ادوات تصفيف الشعر السخنة:

استخدام المكوى او السيشوار باستمرار بيأثر مع الوقت على صحة الشعر, عشان كده الافضل اند تدوري على طرق خالية من الحرارة, والتوقف عن استخدام الحرارة.

التوقف عن استخدام ادوات تصفيف الشعر السخنة
التوقف عن استخدام ادوات تصفيف الشعر السخنة

9- متبالغيش في غسل الشعر:

غسل الشعر اكتر من 3 مرات في الاسبوع ممكن يتسبب في جفافه وتلفه ويخليه مطفي وباهت, الافضل الشعر ميتغسلش اكتر من 2 – 3 مرات في الاسبوع لو شعرك دهني اوي, لو شعرك جاف مرة واحدة او مرتين بالكتير هتكون كافية.

متبالغيش في غسل الشعر
متبالغيش في غسل الشعر

10- خلي شعرك ينشف بشكل طبيعي:

بدل من استخدام السيشوار بعد غسيل الشعر, سيبي شعرك ينشف بشكل طبيعي, عن طريق الضغط بخفة بالفوطة على الشعر من غير فرك عشان تتخلصي من المية الزيادة وسيبيه من غير ما تلميه عشان ينشف بشكل طبيعي.

خلي شعرك ينشف بشكل طبيعي
خلي شعرك ينشف بشكل طبيعي

مقالات متعلقه

خطوتين بس هيساعدوا على زيادة نمو شعرك بسرعة وتكثيفه

خطوتين بس هيساعدوا على زيادة نمو شعرك بسرعة وتكثيفه

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت