10 وصفات Sheet Masks مذهلة لبشرة نضرة وصحية

ريهام محمود
ريهام محمود
في
بشرة
47088

الكوريين من اكتر الدول المهتمة بمنتجات العناية بالبشرة والجمال, وواحدة من اشهر وسائل العناية بالبشرة عندهم هي ال Sheet Masks, ودي هي اللي هنتعرف عليها النهاردة من خلال موضوعنا وهنقول لكل بنات حوا ازاي تعملي الشيت بنفسك في البيت, وازاي تستخدميه مع الوصفات الطبيعية.

ازاي تعملي ال Sheet Masks في البيت:

ال Sheet Masks او الماسكات القطنية هتلاقوها متوفرة بسهولة على مواقع التسوق الالكتروني, لكن لو مش متوفرة تقدري تعمليها بسهولة في البيت باستخدام المناديل الويبس القطنية, هاتي المنديل واغسليه بالمية كويس, واعصريه واتخلصي من اي مية زيادة فيه, وبعدين بالمقص اعملي فتحات للعين والانف والفم, وكده يبقى الشيت جاهز لاستخدامه.

1- ماسك الخيار لتهدئة البشرة:

الحاجات اللي هتحتاجيها:

– عصير خيارة.

– Sheet Mask.

الطريقة:

1- ابشري الخيار ناعم اوي وصفيه طلعي منه العصير بتاعه.

2- انقعي ال Sheet Mask في عصير الخيار, وحطيه في التلاجة لمدة من 20 – 30 دقيقة.

3- اعصري الشيت ماسك عشان تتخلصي من السوائل الزيادة, وبعدين حطيه على وشك, وسيبيه من 15 – 30 دقيقة.

4- شيلي الماسك من على البشرة واغسليها بالمية.

5- نشفي بشرتك وادهنيها سيروم او كريم مرطب.

الخيار بيساعد على تهدئة البشرة, وبيرطبها وبيهدي اي تهيج او التهاب, يعني الماسك ده مناسب جدا لو عندك التهابات او حروق شمس او اي تهيج في بشرتك.

Sheet Masks 1
Sheet Masks 1

2- ماسك مية الارز لتفتيح البشرة:

الحاجات اللي هتحتاجيها:

– مليء الكف ارز “ابيض او بني”.

– مية “ضعف كمية الارز”.

– Sheet Mask.

الطريقة:

1- اغسلي الارز كويس وصفيه من المية, وبعدين حطي الارز المغسول في طبق وضيفي عليه مية.

2- سيبي الارز منقوع في المية ليلة كاملة.

3- انقعي الشيت ماسك في مية الارز, وحطيه في التلاجة لمدة 30 دقيقة, طلعيه واعصريه عشان تتخلصي من السوائل الزيادة.

4- حطي الشيت ماسك على بشرتك وسيبيه لمدة من 15 – 30 دقيقة.

5- شيلي الماسك من على البشرة واغسليها بمية باردة.

6- نشفي البشرة وادهنيها بسيروم او كريم مرطب.

مية الارز واحدة من اهم اسباب جمال بشرة الكوريات, ليه تأثير قابض وفوري لشد البشرة, بيقلل من المسام الواسعة وده بيمنع من افراز الزيوت الزيادة وتراكمها على البشرة, وبيساعد على تفتيح البشرة بشكل فعال.

Sheet Masks 2
Sheet Masks 2

3- ماسك الشاي الاخضر لازالة السموم من البشرة:

الحاجات اللي هتحتاجيها:

– 5 باكت شاي اخضر.

– مية.

– من 2 – 3 نقط من عصير الليمون.

– Sheet Mask.

الطريقة:

1- اغلي المية, وانقعي فيها باكتات الشاي الاخضر لمدة من 15 – 20 دقيقة.

2- سيبي المية تبرد خالص وبعدها ضيفي لها عصير الليمون.

3- انقعي الشيت ماسك في الشاي الاخضر, وحطيه في التلاجة من 20 – 30 دقيقة, طلعيه واعصريه عشان تتخلصي من السوائل الزيادة.

4- حطي الشيت ماسك على بشرتك وسيبيه لمدة 30 دقيقة.

5- شيلي الماسك واغسلي بشرتك بالمية.

6- نشفي البشرة وادهنيها بسيروم او كريم مرطب.

الشاي الاخضر غني بالبوليفينول ومضادات الاكسدة, اللي بتساعد على تقليل التهيج وحب الشباب, وبيساعد على ازالة السموم من الجلد.

Sheet Masks 3
Sheet Masks 3

4- ماسك الاعشاب البحرية لتغذية البشرة:

الحاجات اللي هتحتاجيها:

– شيت اعشاب بحرية “هتلاقيها عند العطار او في الهايبر ماركت الكبيرة عند قسم مكونات الاكل الصيني او الياباني”.

– 2 باكت شاي اخضر.

مية.

الطريقة:

1- اغلي المية, وانقعي فيها باكتات الشاي لمدة 15 دقيقة.

2- سيبي الشاي يبرد, وبعدها حطي فيه شيت الاعشاب البحرية هتحتاجي تقريبا من 2 – 3 شيت حسب حجمه, سيبي الشيت منقوع لمدة دقايق لحد ما يطرى.

3- حطي شيت الاعشاب على البشرة, وممكن تقطعيه لاحجام مناسبة لمنطقة الانف والفم.

4- سيبيه على بشرتك لمدة من 15 – 20 دقيقة وبعدين اغسلي البشرة بالمية.

5- نشفي بشرتك وادهنيها سيروم او كريم مرطب.

الطحالب او الاعشاب البحرية, بتستخدم تقريبا في كتير من منتجات العناية بالبشرة, لانها بتحتوي على مركبات نشطة بيولوجيا بتساعد على تغذية البشرة وبتحافظ عليها صحية.

Sheet Masks 4
Sheet Masks 4

5- ماسك مية الورد والجلسرين لشد البشرة:

الحاجات اللي هتحتاجيها:

– 1 معلقة كبيرة مية ورد.

– 1 معلقة كبيرة جلسرين.

– Sheet Mask.

الطريقة:

1- في طبق اخلطي مية الورد والجلسرين مع بعض.

2- انقعي الشيت الماسك في الخليط لمدة دقايق, طلعيه واعصريه عشان تتخلصي من السوائل الزيادة.

3- حطي الشيت ماسك على بشرتك, وسيبيه من 20 – 30 دقيقة.

4- شيلي الماسك وسيبي بشرتك من 15 – 20 دقيقة كمان , وبعدين اغسليها بالمية.

الجلسرين ليه تأثير مرطب على البشرة, ولما بيتخلط بمية الورد بيهدي البشرة وبيحسن مظهرها وبيحافظ عليها صحية.

Sheet Masks 5
Sheet Masks 5

6- ماسك مية الورد وزيت شجرة الشاي للبشرة المعرضة لحب الشباب:

الحاجات اللي هتحتاجيها:

– ¼ كوباية مية ورد.

– ¼ كوباية مية مقطرة “هتلاقيها في الصيدلية”.

– 3 نقط من زيت شجرة الشاي.

– Sheet Mask.

الطريقة:

1- في طبق اخلطي كل المكونات مع بعض.

2- انقعي الشيت ماسك في الخليط لمدة دقايق, طلعيه واعصريه عشان تتخلصي من السوائل الزيادة.

3- حطي الشيت ماسك على البشرة واضغطي عليه على الوش بخفة, وسيبيه من 15 – 30 دقيقة.

4- شيلي الماسك وسيبي البشرة 15 دقيقة كمان, وبعدين اغسليها بالمية.

5- نشفيها وادهنيها سيروم او كريم مرطب.

زيت شجرة الشاي ومية الورد ليهم خصائص مضادة للالتهابات ومضادة للاكسدة, بتساعد على منع حب الشباب, والحفاظ على بشرتك صافية وصحية.

Sheet Masks 6
Sheet Masks 6

7- ماسك الالوفيرا والكاموميل لترطيب البشرة:

الحاجات اللي هتحتاجيها:

– ½ معلقة صغيرة من جل الالوفيرا.

– من 1 – 2 نقطة من زيت الكاموميل “البابونج”.

– 1 معلقة صغيرة شاي اخضر “معمول من 2 – 3 اكياس شاي اخضر”.

– Sheet Mask.

الطريقة:

1- اخلطي المكونات كلها مع بعض.

2- انقعي الشيت ماسك في الخليط لمدة دقايق, طلعيه واعصريه عشان تتخلصي من السوائل الزيادة.

3- حطي الشيت ماسك على بشرتك, وسيبيه من 15 – 30 دقيقة.

4- شيلي الماسك وسيبي بشرتك 15 دقيقة كمان, وبعدين اغسليها بالمية.

الالوفيرا ليه تأثير مرطب على البشرة, وغني بالاحماض الامينية اللي بتحافظ على صحة بشرتك, والماسك بكل مكوناته بيساعد على ترطيب وتنعيم البشرة.

Sheet Masks 7
Sheet Masks 7

8- ماسك العسل وزيت الورد لتجاعيد البشرة:

الحاجات اللي هتحتاجيها:

– ¼ كوباية مية مقطرة “هتلاقيها في الصيدلية”.

– ½ معلقة صغيرة عسل.

– من 5 – 6 نقط من زيت الورد.

– Sheet Mask.

الطريقة:

1- اخلطي كل المكونات مع بعض كويس.

2- انقعي الشيت ماسك في الخليط.

3- اعصري الشيت ماسك عشان تتخلصي من اي سوائل زيادة, وبعدين حطيه على البشرة وسيبيه من 15 – 30 دقيقة.

4- شيلي الماسك, واغسلي بشرتك بمية باردة.

زيت الورد بيحتوي على الفينول اللي بيمنع الاجهاد التأكسدي, وبالتالي بيبطء من عملية شيخوخة الجلد, وبيمنع التجاعيد.

Sheet Masks 8
Sheet Masks 8

9- ماسك الكاموميل واللافندر لتهدئة البشرة:

الحاجات اللي هتحتاجيها:

– 1 معلقة كبيرة كاموميل “بابونج” مجفف “وممكن تستخدمي شاي الكاموميل”.

– 1 كوباية مية.

– من 2 – 3 نقط من زيت اللافندر.

– Sheet Mask.

الطريقة:

1- اغلي المية وانقعي فيها اوراق الكاموميل لمدة من 5 – 10 دقايق.

2- سيبي منقوع الكاموميل يبرد تماما, بعدها ضيفي له زيت اللافندر, وانقعي الشيت ماسك في الخليط.

3- اعصريه عشان تتخلصي من المية الزيادة, وبعدين حطيه على البشرة وسيبيه من 15 – 30 دقيقة.

4- شيلي الماسك, واغسلي بشرتك بمية باردة.

اللافندر بيساعد بطريقة فعالة على شفاء البشرة وممتاز جدا للجروح, بالاضافة كمان انه مهديء بشكل عام وبيعمل حالة استرخاء وبيديكي شعور بالانتعاش لعقلك وبشرتك.

Sheet Masks 9
Sheet Masks 9

10- ماسك البطيخ لتنشيط البشرة التعبانة والمجهدة:

الحاجات اللي هتحتاجيها:

– 2 معلقة كبيرة عصير بطيخ طازة.

– 1 معلقة كبيرة من جل الالوفيرا.

– Sheet Mask.

الطريقة:

1- اخلطي عصير البطيخ مع جل الالوفيرا وقلبيهم مع بعض كويس, وحطي الخليط في التلاجة لمدة 15 دقيقة.

2- انقعي الشيت ماسك في الخليط, وبعدين طلعيه واعصريه عشان تتخلصي من اي سوائل زيادة.

3- حطي الشيت ماسك على بشرتك وسيبيه من 15 – 30 دقيقة.

4- شيلي الماسك وسيبي بشرتك 10 دقايق كمان, وبعدين اغسليها بشرتك بالمية الباردة.

الماسك ده ليه تأثير مبرد ومهديء للبشرة المتضررة من اشعة الشمس بشكل فوري, كمان بيحتوي على اللايكوبين, وهو واحد من مضادات الاكسدة اللي بتساعد على منع شيخوخة الجلد.

Sheet Masks 10
Sheet Masks 10

ال Sheet Masks بيعمل تأثير مضاعف لاي ماسك على بشرتك وبيخليكي تستفادي منه اكتر, لانه بيحبس مكونات منتجات العناية بالبشرة اللي بتحطيها على بشرتك, وده بيسمح انها تشتغل على بشرتك لفترة اطول وبفعالية اقوى.

وتقدري تستخدمي ال Sheet Mask الجاهزة اللي بتكون اصلا منقوعة في المنتج وبتتباع جاهزة انتي تجيبيها وتحطيها على بشرتك على طول, وزي ما قولنا دي متوفرة على النت, ولكن كاختيار اوفر واسهل وفي متناول الايد تقدري تعتمدي على الشيت ماسك اللي معمول في البيت, وعشان كمان تقدري تتحكمي في المكونات اللي هتستخدميها حسب حسب حاجة بشرتك.

مقالات متعلقه

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير