ازاي وامتى تستخدمي زيت الشعر حسب النظام الهندي القديم “الايورفيدا”
استخدام الزيت على الشعر وفروة الراس والمعروفة باسم “الايورفيدا” هي طريقة علاج هندية قديمة وتقليدية لتحسين جودة وقوة الشعر, ولكن تطبيق الزيت على الشعر بالنظام ده ليه فوايد تانية كمان, وده واللي هنقراه مع بعض النهاردة من خلال السطور الجايه, هنتعرف على طريقة العلاج بالزيت وفوايدها, وازاي نستخدمها.
ايه هي الايورفيدا:
الايورفيدا هي طريقة علاج هندية قديمة, والايورفيدا بيعتبر ان مزاج الانسان بيتكون من 3 عناصر وهي:
– “فاتا” يعني الهواء ووظيفتها تنظيم حركة الجسم والتحكم في وظائف الجسم الاساسية واهم عضاء الجسم زي المخ والرئتين والدورة الدموية والقلب.
– “بيتا” وهي النار مع المية ووظيفتها التحكم عمليات الهضم والتمثيل الغذائي وبعض هرمونات الجسم.
– “كافا” وهي التراب مع المية وهي مسئولة عن البنية الجسدية زي عضلات الجسم والوزن والجهاز المناعي.
والـ 3 عناصر دول لما بيكونوا متوازنين الانسان بيكون قوي وصحتة كويسة, انما لو عنده عنصر من التلاتة اكتر من الاتنين التانيين هنا ممكن تحصل مشاكل صحية لعدم اتزان العناصر التلاتة.
فوايد وضع الزيت على فروة الشعر بنظام الايورفيدا:
– بيساعد على زيادة نمو الشعر وتنعيمه, وبيخليه صحي وبيلمع.
– بيساعد على تهدئة وتنشيط اعضاء الجسم.
– بيساعد على علاج تجاعيد البشرة.
– علاج قشرة الشعر.
– علاج الارق وتحسين النوم.
– بيساعد على تنشيط الدورة الدموية في الراس.
– منع تكسر وتقصف وهيشان الشعر.
عشان توصلي لافضل النتايج من تدليك الزيت على فروة الراس, مهم جدا تحطيه بالطريقة الصح وفي الوقت المناسب, لان طريقة زيت الشعر وتطبيقه بتختلف حسب الفوايد اللي انتي عايزاها منه, ودلوقتي هنتعرف على بعض فوايد تدليك الزيت على فروة الراس مع طريقة التطبيق.
طريقة العلاج بالزيت:
بالنسبة لنوعية الزيت المستخدم, تقدري تستخدمي اي نوع زيت مناسب لشعرك, ممكن تستخدمي زيت جوز الهند, زيت الزيتون, زيت السمسم, زيت الجوجوبا, زيت النيم, زيت اللوز.
1- لتحسين نوعية الشعر:
نقدر نقول ان نوعية شعرنا اتحسنت لما نلاحظ انه بينمو بشكل افضل, الاطراف بتاعته مش مقصفة ومنقسمة, والشعر ناعم وبيلمع اكتر, ومافيش مشاكل مع الشيب المبكر.
ينصح دايما بتطبيق الزيت على الشعر وفروة الراس بالليل قبل النوم, وتسيبيه طول الليل وتغسليه الصبح بمية فاترة.
تقدري تستخدمي الزيت في كل مرة هتغسلي فيها شعرك, ولكن بننصح ان الشعر ميتغسلش كل يوم, خصوصا لو الشعر طويل, الافضل تقللي من غسل الشعر من مرتين لتلات مرات في الاسبوع.
في بنات كتير بيدهنوا شعرهم بالزيت بعد الغسيل, لكن الافضل تجنب ده لان الزيت بيجذب التراب واشعة الشمس والتلوث, لكن لو كنتي في البيت فمافيش مشكلة من استخدام الزيت على الشعر وفورة الراس بعد غسله.
لنمو الشعر, حطي الزيت على فروة الراس والجذور والشعر كله لحد الاطراف, وتقدري تسخني الزيت شوية قبل ما تحطيه على الشعر عشان يديكي نتيجة احسن, لكن لو بتعاني من صداع او طفح جلدي على فروة الراس, اتجنبي علاج الزيت السخن, استخدميه من غير ما تسخنيه.
2- للتخلص من قشرة الشعر:
لو بتعاني من القشرة او تهيج فروة الراس, استخدام الزيت بانتظام ممكن يساعدك على التخلص من المشكلة دي.
وعشان توصلي لنتايج فعالة, استخدمي الزيت ومعاه اوراق النيم مع اعشاب اساسية زي المرمرية, اكليل الجبل, الزعتر, اللافندر, الالوفيرا.
سخني الزيت مع الاعشاب وسيبيها منقوعة فيه شوية, وبعدين صفي الزيت وحطيه على الشعر وفروة الراس قبل غسل الشعر بساعة, وبعدها اغسلي شعرك بالمية الدافية.
3- لعلاج الصداع:
للتخلص من الصداع تقدري تختاري اي نوع زيت للتدليك, وممكن تعتمدي هنا على الزيوت العطرية زي زيت اللافندر او زيت النعناع, زيت الياسمين لانها بتساعد على التهدئة والاسترخاء, او تستخديم زيت السمسم, دلكي الزيت على فروة الراس والجبين بالليل حوالي الساعة 6 مساء, والصداع عادة بيكون مرتبط بالفاتا “الهوا” والوقت ده من اليوم بيكون مسيطر عليه الفاتا بالتالي ده هيكون انسب ميعاد لعلاج الصداع بالزيت.
4- لتحسين النوم وعلاج الارق:
تقدري تعملي تدليك خفيف للراس بالزيت قبل النوم بنص ساعة, ده هيساعدك انك تنامي كويس, تقدريي تعتمدي في الحالة دي على زيت السمسم لنتايج فعالة اكتر.
ونظام الايورفيدا بينصح بالاعتماد على زيت السمسم بشكل خاص في التدليك لانه بيساعد على منع الصلع والشيب المبكر للشعر والصداع.
وبديل زيت السمسم لو مش متوفر هو زيت جوز الهند, وافضل طريقة لاستخدام زيت جوز الهند انك تسخنيه بشكل معتدل وتدلكيه على فروة الراس والشعر, والطريقة دي هتساعدك كمان على علاج البرد والتهاب الجيوب الانفية.
