ايه اللي بتقوله الدورة الشهرية بتاعتك عن صحتك!

وقت الدورة الشهرية من الفترات اللي بتبقى صعبة علينا كل شهر, وبنعاني فيها من حاجات كتير منها تشنجات وتقلصات الدورة, تقلب المزاج, الانتفاخ, وفي بعض الاوقات التشنجات بتكون مؤلمة جدا وبنضطر اننا ناخد مسكنات, والدورة بتختلف من بنت للتانية في بعض البنات بتكون عندهم الدورة ثقيلة وفترة قصيرة, وبنات تانية بيكون النزيف خفيف ولكن فترة اطول, وفي بعض البنات بتكون مش منتظمة عندهم, عشان كده مهم جدا انك تلاحظي التغييرات الهرمونية في جسمك وتنتبهي للنزيف لان ممكن تعرفي منه حاجات كتير, وده اللي هنعرفه النهاردة من خلال المقال بتاعنا هنقول لكل بنات حوا ايه اللي بتقوله الدورة الشهرية عن صحتك.

ايه اللي بتقوله الدورة الشهرية عن صحتك:

ازاي تعرفي ان الدورة الشهرية بتاعتك طبيعية ولا لا؟ عشان تعرفي ده لازن تسألي نفسك شوية اسئلة, كام عدد الفوط الصحية اللي بتستخدميها عادة كل يوم؟ امتى بتغيري الفوطة بتاعتك؟ هل بيكون النزيف فيها كتير ولا خفيف؟ مدة دورتك الشهرية قد ايه؟ هل منتظمة ولا لا؟ هل النزيف تقيل ولا طبيعي؟

ومش محتاجة انك تسجلي ده بالورقة والقلم لكن الملاحظة الطبيعية هتكون كافية جدا, لان دورتك الشهرية واعراضها ممكن تقولك حاجات كتير جدا عن صحتك, تعالوا نعرفها مع بعض بالتفصيل.

1- ألم الدورة الشهرية:

فترة الدورة الشهرية بتكون من الفترات الصعبة, وتقريبا حوالي 70% من النساء بيعانوا من الم في البطن “الرحم”, والتشنجات, والانتفاخ, ومعظمنا بيشوف ان الالم ده طبيعي, لكن الحقيقة اننا بنحس بالالم ده لان عضلات الرحم بتنقبض وبتطلق كل شهر لدفع الدم خارج الجسم, والانكماشده بيسبب الالم, لكن لو بتعاني من الآلام دي بشكل متكرر, او كل شهر اثناء فترة الدورة, في الحالة دي انتي محتاجة ان تروحي لدكتور متخصص.

لان ممكن يكون الالم ده من اعراض التهاب بطانة الرحم او تندب المهبل او الاورام الليفية.

2- التدفق التقيل:

عادة عند اي بنت بتكون الدورة ثقيلة في اول كام يوم من الدورة, وبتبدأ انها تقل في الاخر, وبيختلف التدفق من بنت للتانية, عشان كده ازاي تحددي ان التدفق عندك تقيل ولا لا؟ لو بتغيري الفوطة الصحية تقريبا كل ساعتين او 3 ساعات, فده معناه ان التدفق او النزيف تقيل, ولكن مع ذلك لو غيرتي الفوطة بتاعتك كل ساعة تقريبا وده استمر لمدة ما بين 7 – 8 ايام, الدورة الشهرية بتاعتك مش هتدخل هنا في منطقة التدفق التقيل, لكن ممكن تتسمى “تقيلة بشكل مش طبيعي”, وده بيحصل بسبب عدم انتظام هرمونات الاستروجين والبروجستيرون, وعموما لو بتستخدمي من 2 – 3 فوطة صحية يوميا, ده يعتبر تدفق طبيعي.

والتدفق التقيل ممكن يكون من اعراض الاصابة بالعدوى او الهيموفيليا او عدم التوازن الهرموني او الاورام الليفية او حتى ورم المخ, عشان كده لو لاحظتي اي تغيير فجائي في تدفق الدورة الشهرية, لازم تستشيري الدكتور فورا.

3- لون الدورة الشهرية:

معرفة لون الدورة الشهرية مفيد جدا في تحديد صحتك الهرمونية, وعادة في تلات انواع من لون الدورة, وعادة اللون الاحمر الفاتح يعتبر طبيعي, واللون البني الداكن والاسود يعتبر مش طبيعي.

1- لو لون الدورة فاتح زي عصير التوت, ده معناه ان الدورة الطبيعية.

2- لو اللون شبه مربى الفراولة, ده معناه انخفاض مستويات هرمون الاستروجين, وده ممكن يأدي لجفاف المهبل, التعب, انخفاض الرغبة الجنسية, وتساقط الشعر.

3- لو لون الدورة الشهرية يشبه التوت الازرق المجمد المهروس, ده معناه ان هرمون الاستروجين عندك مرتفع, وده عادة بيكون موجود عن النساء اللي بيتعرضوا لتدفق كثيف بشكل مش طبيعي.

4- ميعاد الدورة الشهرية:

الدورة الشهرية المفروض الطبيعي انها بتيجي كل من 28 – 35 يوم, يبقى لازم تحسبي من اول يوم بتيجي لك فيه عشان تعرفي ميعاد الدورة اللي بعدها امتى, لو بتتكرر في نفس الاطار الزمني, بكده تكون الدورة الشهرية طبيعية, لو فاتتك الدورة الشهرية بشكل متكرر غير حالة الحمل, ده ممكن يكون علامة على وجود مشكلة الغدة الدرقية او خلل هرموني ممكن يتسبب في نمو خراجات في المبيض, وفي بعض الاحيان ممكن يحصل بسبب الاجهاد, وفي الحالات دي المفروض انك تستشيري دكتور.

5- مدة الدورة الشهرية:

الدورة الشهرية العادية او الطبيعية مدتها بتكون من 3 – 7 ايام, وبيكون النزيف كثيف خلال الايام التلاتة او الاربعة الاولى, ولكن لو النزيف ضعيف في الايام الاولى, ده يعتبر مش طبيعي, وفي الحالة دي لازم تستشيري دكتور.

نتمنى ان المؤشرات دي تساعدك في معرفة جسمك بشكل افضل, ولو لاحظتي اي حاجة مش طبيعية يبقى ضروري استشارة الدكتور.

حيل ونصايح لفترة الدورة الشهرية هتغير حياتك للابد