نظام غذائي لخسارة الوزن وازالة التجاعيد في 3 ايام بس
من اكتر المشاكل اللي ممكن تقابلنا هي مشكلة زيادة الوزن, ومشكلة التجاعيد سواء المبكرة او اللي بسبب التقدم في العمر, والنهاردة هنضرب عصفورين بحجر ونقولك على نظام غذائي لخسارة الوزن وازالة التجاعيد وتحسين حالة البشرة في 3 ايام بس.
نظام غذائي لخسارة الوزن وازالة التجاعيد:
النظام اللي معانا النهاردة والمعروف باسم “حمية الدكتور بيريكون” اخصائي امراض الجلدية والتغذية, هو اساسه انه نظام غذائي لعلاج التجاعيد, وتحسين مظهر الجلد, والشعر والضوافر, وكحاجة اضافية ليه انه بيساعد على تخسيس الوزن وتنسيق القوام.
العناصر الرئيسية للنظام الغذائي:
– السلمون: سمك السلمون غني بالبروتين اللي بتجدد خلايا الجسم, واحماض الاوميجا 3 اللي بتغذي البشرة, وبتخليها اكتر لمعان ونضارة, بالاضافة ان السلمون بيحتوي على مضادات الاكسدة وال DMAE اللي بتحافظ على شكل العضلات بما فيهم عضلات الوش, وبتمنع تشكل التجاعيد.
– الخضروات باللون الاخضر الغامق: بتحتوي على مضادات الاكسدة اللي بتقلل من الجذور الحرة وبتمنع الشيخوخة.
– التوت والفواكه: “التوت, الفراولة, البطيخ, التفاح, الكمثرى”, بتحتوي على نسبة عالية من مضادات الاكسدة والكربوهيدرات, وفي نفس الوقت مش بتخلي مستوى السكر في الدم عالية.
والترتيب اللي لازم تاكلي بيه الوجبة هو: اول حاجة البروتين, وبعدها الكربوهيدرات.
دايت ال 3 ايام:
في نوعين من النظام الغذائي ده, واحد مدته 3 ايام, والتاني مدته 28 يوم, واللي احنا هنعرفه دلوقتي مع بعض هو نظام ال 3 ايام.
– وجبة الفطار: 3 بيضات مقليين وبيضة مسلوقة + ½ كوباية شوفان + ½ طبق من التوت وشريحة بطيخ + من 1 – 2 كوباية مية.
– وجبة الغدا: من 100 – 150 جرام سمك سلمون او تونة + طبق سلطة من الخضروات الخضرا الداكنة مع زيت زيتون وعصير ليمون + ثمرة كيوي او شريحة ليمون مع ½ كوباية توت + من 1 – 2 كوباية مية.
– وجبة العشا: من 100 – 150 جرام سمك سلمون + طبق سلطة من الخضروات الخضرا الداكنة مع زيت زيتون وعصير ليمون + ½ طبق خضروات مطبوخة على البخار “بروكلي, سبانخ, اسبارجوس” + قطعة بطيخ مع ½ كوباية توت + من 1 – 2 كوباية مية.
– قبل النوم: ممكن تاكلي تفاحة + 50 جرام صدر فرخة مسلوقة + 150 جرام زبادي طبيعية + وملو الكف من الجوز او البندق او اللوز.
دايت ال 28 يوم:
نظام ال 3 ايام ده ممكن يكون بداية للنظام الاطول اللي بيستمر 28 يوم, ومبدأ نظام ال 28 يوم هو نفس نظام ال 3 ايام بيعتمد على 3 وجبات في اليوم مع 2 وجبة خفيفة, ولكن قايمة الاكل بتكون اكبر ومن الحاجات المسموح اكلها هي:
– الاسماك, السي فود, لحمة الديك الرومي, وصدور الفراخ.
– كل انواع الخضروات ماعدا البطاطس, الجزر, البنجر, البسلة, الذرة, البقدونس.
– التوت والفواكة ماعدا الموز, البرتقان, العنب, البطيخ, المانجا, البابايا ” لان الانواع دي ممكن تسبب زيادة سريعة في سكر الدم”.
– المكسرات الخام “الجوز, اللوز, البندق”.
– الفاصوليا, الزيتون, وزيت الزيتون.
– منتجات الالبان الخالية من الدهون.
– الشوفان.
– المية, والشاي الاخضر, والمية المعدنية.
ممنوع اكيد: القهوة, المشروبات الغازية, عصاير الفاكهة, الاطعمة المجمدة, الوجبات السريعة, الخبز, الحلويات, والصوصات.
بالاضافة للنظام حاولي انك تشربي كمية كافية من المية, وتمارسي رياضة, عشان النظام يجيب معاكي افضل النتايج.
عشان تحافظي على رطوبة البشرة اشربي يوميا من 8 – 10 كوبايات مية, او المشروبات الغنية بمضادات الاكسدة “زي المية المعدنية والشاي الاخضر”.
مارسي النشاط البدني, بما فيهم المشي او الجري وتمارين الكارديو وتمارين التمدد على الاقل 4 مرات في الاسبوع, لمدة من 30 – 45 دقيقة تقريبا في اليوم.
ايجابيات النظام:
– بيساعد على انقاص الوزن بشكل صحي, وبيسمح بفقدان الوزن ببطء, وده بيقلل من خطر الاصابة بأمراض صحية خطيرة, زي ارتفاع ضغط الدم وامراض القلب والاوعية الدموية ومرض السكر, لان لما بتفقدي الوزن بسرعة ده بيسبب تجاعيد وترهلات في الجلد.
– النظام بيحتوي على نسبة عالية من الاطعمة الغنية باحماض الاوميجا 3 ومضادات الاكسدة اللي تعتبر من اهم العناصر للبشرة والقلب.
– هيساعدك تحسي بالشبع وبيملى المعدة بسرعة, وهيديكي قدرة على التفكير بشكل افضل, وهتحسي بهدوء اكبر.
سلبيات النظام:
– ممكن النظام يكون مكلف شوية, لان سمك السلمون سعره غالي.
– ممكن تحسي بالجوع شوية بين الوجبات.
– وطبعا اكبر مشكلة لو انتي اصلا مش بتحبي السمك يبقى النظام ده مش هينفع معاكي.
