واكس اللبن لازالة الشعر الزائد وتقليل نموه وتفتيح البشرة

ريهام محمود
ريهام محمود
في
بشرة
4247

كلنا عارفين ان في طرق كتير لازالة الشعر بداية من الحلاقة بالمكنة لحد كريمات ازالة الشعر والشمع, وكل طريقة بيكون ليها ايجابياتها وسلبياتها, هل في طريقة ممكن ميكونش ليها اثار جانبية على بشرتك وتساعدك على ازالة الشعر من كل الجسم بشكل طبيعي؟ الحقيقة ان في طريقة يمكن معظم البنات ميعرفوهاش, وهي واكس اللبن لازالة الشعر ودي اللي هنعرف طريقتها النهاردة مع بعض من خلال المقال بتاعنا.

واكس اللبن لازالة الشعر الزائد:

الوصفة اللي معانا النهاردة مكوناتها كلها طبيعية, ومش بس هتساعدك على ازالة الشعر الزائد بسهولة لكن كمان بتساعد على تفتيح البشرة, تعالوا نعرف المكونات والطريقة مع بعض.

المكونات:

– ½ معلقة صغيرة بيكنج صودا “الكربوناتو”.

– 2 معلقة كبيرة جيلاتين بودر.

– 1 معلقة كبيرة عصير خيار.

– 2 معلقة كبيرة لبن.

الطريقة:

1- اول حاجة ابشري الخيار او اضربيه في الخلاط وحطيه في شاشة وصفيه وطلعي منه العصير بتاعة.

2- في طبق او بولة صغيرة اخلطي الجيلاتين مع اللبن مع الكربوناتو وعصير الخيار وقلبيهم مع بعض.

3- حطي الخليط في الميكروويف من 10 – 12 ثانية لحد ما يبقى ناعم ومافيش فيه اي كتل, او دوبيهم مع بعض على حمام مية سخنة.

4- دلوقتي باستخدام فرشة مكياج قديمة عندك او اي فرشة متوفرة افردي الخليط على المناطق اللي عايزة تشيلي منها الشعر.

5- سيبيه على البشرة لحد ما ينشف تماما.

6- بعد ما ينشف خالص ابدأي شيليه من على بشرتك عكس اتجاه الشعر, واحسن طريقة بدل ما تشديه ابدأي لفيه وابرميه لفوق من على البشرة, هتلاقي الشعر والجلد الميت طلع مع الماسك.

7- كرري الماسك ده على الاقل 3 مرات في الشهر, وهتلاحظي مع الاستمرار ان نمو الشعر بدأ يقل بنسبة 75% تقريبا.

تقدري تستخدمي الماسك ده على اي مكان في الجسم عايزة تشيلي منه الشعر.

واكس اللبن لازالة الشعر الزائد
واكس اللبن لازالة الشعر الزائد

الطريقة بالفيديو:

هنقولكم كمان طرق تانية لعمل الشمع بطرق طبيعية.

1- شمع السكر والليمون:

وصفة الشمع دي كمان من الوصفات اللي بتساعد على ازالة الشعر وتقشير وتبييض البشرة.

المكونات:

– 2 معلقة صغيرة عصير ليمون.

– 2 معلقة كبيرة سكر.

– من 3 – 4 معالق كبيرة مية.

الطريقة:

1- هاتي بوله صغيرة, اخلطي فيها السكر مع المية.

2- قلبيهم مع بعض كويس, مجرد ما السكر يدوب في المية, ضيفي عصير الليمون.

3- قلبي كل المكونات كلها مع بعض كويس, وحطي الخليط مباشرة على المكان اللي عايزة تشيلي منه الشعر.

4- سيبيه ينشف من 10 – 15 دقيقة, وبعدها اغسليه بالمية, واثناء الغسيل افركيه من على البشرة بخفة هيخلصك من الشعر الزائد وخلايا الجلد الميت.

5- كرري الوصفة دي 3 مرات في الاسبوع, وهتشوفي فرق ملحوظ بعد كام اسبوع من الاستخدام.

شمع السكر والليمون
شمع السكر والليمون

2- شمع الشبة ومية الورد:

الطريقة دي واحدة من الطرق اللي بيستخدمها النساء في الهند وباكستان لازالة وتفتيح البشرة.

المكونات:

– 3 معالق كبيرة مية ورد.

– 1 معلقة صغيرة شبة بودر “متوفرة عند العطار”.

– من 2 – 3 نقط من زيت السمسم.

– قطعة قطن.

الطريقة:

1- في طبق حطي الشبة واخلطي معاها مية الورد.

2- استني لما الشبة تدوب خالص في مية الورد.

3- دلوقتي هاتي قطعة قطن اغمسيها في خليط مية الورد, وادهني بيه المنطقة اللي عايزة تشيلي منها الشعر.

4- بعد ما الطبقة الاولى اللي دهنتيها تنشف تماما, ادهني فوقيها طبقة تانية من الخليط, وكرري الخطوة دي لحد ما تدهني 3 طبقات.

5- بعد ما الطبقة التالتة تنشف تماما, اغسليها بالمية العادية, وبعدها ادهني البشرة بزيت السمسم لترطيب البشرة.

6- كرري الوصفة 3 مرات في الاسبوع لافضل النتايج.

شمع الشبة ومية الورد
شمع الشبة ومية الورد

3- ماسك بياض البيض:

المكونات:

– 1 بياض بيضة.

– 1 معلقة كبيرة سكر.

– 1 معلقة صغيرة نشا.

الطريقة:

1- في طبق اخلطي بياض البيض مع السكر والنشا, قلبيهم مع بعض كويس لحد ما الخليط يبقى سلس وناعم.

2- ادهني الخليط على بشرتك وسيبيه ينشف من 15 – 20 دقيقة.

3- دلوقتي  قشري الماسك من على البشرة عكس اتجاه الشعر.

4- كرريه مرتين في الاسبوع.

ماسك بياض البيض
ماسك بياض البيض

4- سكراب الموز والشوفان:

الموز يعتبر من افضل المكونات اللي ممكن تستخدميها لازالة الشعر الزائد لما تخلطيه مع مكون خشن زي الشوفان.

المكونات:

– ثمرة موز.

– 1 معلقة كبيرة من دقيق الشوفان.

الطريقة:

1- اهرسي الموزة ناعم.

2- ضيفي دقيق الشوفان للموز المهروس, واخلطيهم مع بعض كويس.

3- حطي الخليط ده على بشرتك, وسيبيه من 15 – 20 دقيقة, وبعدين ابدأي افركية في حركات دائرية, واغسليه بالمية.

4- كرري الوصفة دي مرتين في اليوم, مش بس هتزيل الشعر الزائد لكن كمان هتنعم البشرة وهتديها نضارة.

سكراب الموز والشوفان
سكراب الموز والشوفان

اعملي بنفسك لوشن بعد ازالة الشعر الزائد لبشرة ناعمة جدا

طريقة لوشن بعد ازالة الشعر الزائد
طريقة لوشن بعد ازالة الشعر الزائد

مقالات متعلقه

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير