طريقة عمل كيكة الجبنة اليابانية الهشة بالخطوات والفيديو
كيكة الجبنة اليابانية الهشة او الكيكة الاسفنجية اليابانية من انواع الحلويات المشهورة جدا في اليابان, مختلفة شوية عن الكيكة الاسفنجية التقليدية بتاعتنا ومعروف عنها انها بتكون خفيفة وهشة جدا عشان كده بتتسمى كمان بالكيكة القطنية, ممكن تاكليها مع الشاي اواي مشروب سخن, والنهاردة هنعرف مع بعض طريقتها بالخطوات والفيديو.
كيكة الجبنة اليابانية الهشة:
المكونات:
– 7 معالق كبيرة زبدة “100 جرام”.
– 100 جرام جبنة كريمي.
– ½ كوباية لبن “130 ملل”.
– 8 صفار بيض.
– ¼ كوباية دقيق “60 جرام”.
– ¼ كوباية نشا “60 جرام”.
– 13 بياض بيضة كبيرة.
– 2/3 كوباية سكر “130 جرام”.
– مية سخنة للخبز.
– سكر بودرة للتقديم.
– 340 جرام فراولة او توت للتزيين.
طريقة التحضير:
1- اول حاجة سخني الفرن على درجة حرارة 160 درجة مئوية.
2- في وعاء صغير على نار متوسطة, اخفقي الزبدة والجبنة واللبن مع بعض لحد ما يبقى الخليط ناعم وسلس معاكي, ارفعيه من على النار وسيبيه يبرد.
3- في طبق كبير, اضربي صفار البيض لحد ما يبقى المزيج ناعم, ونزلي عليه خليط الجبنة اللي حضرناه في الخطوة اللي فاتت بالتدريج, وقلبيه لحد ما المكونات تمتزج مع بعض كويس بالتساوي.
4- انخلي الدقيق والنشا عشان تتأكدي ان مافيش فيه اي كتل وضيفيهم للخليط بالتدريج مع التقليب لحد ما المكونات تمتزج كويس مع بعض.
5- في طبق كبير تاني, اخفقي بياض البيض بمضرب يدوي, لحد ما يبقى كريمي او مارينج, ضيفي له السكر بالتدريج واستمري في التقليب لحد ما يمتزجوا مع بعض كويس.
6- خدي حوالي ¼ كمية بياض البيض وضيفيها لخليط صفار البيض, وقلبيهم, وكرري ده مع باقي كمية بياض البيض لحد ما الكمية كلها تخلص والخليط يندمج مع بعضه بالتساوي.
7- هاتي صينية مدورة بحجم 3 في 9 بوصة تقريبا “23 سم” ادهني القاع بتاعها بالزبدة, وغطي القاع والجناب بتاعة الصينية بورق زبدة او ورق خبز, ولو بتستخدمي صينية زنبرك اتأكدي انك تغلفي القاع والجناب بالكامل بورق فويل مرتين عشان تمنعي اي تسرب.
8- صبي الخليط في الصينية وهزيها عشان تساوية وتخرجي منها اي فقاعات هوا.
9- حطي الصينية جوه صينية تانية اكبر متبطنة من تحت بورقتين مناديل مطبخ, مناديل المطبخ هتضمن توزيع الحرارة بالتساوي على الصينية كلها, املي الصينية الكبيرة بارتفاع حوالي 1 بوصة “2 سم” بالمية السخنة.
10- حطي الصينية في الفرن واخبزي الكيكة لمدة 25 دقيقة, وبعدها قللي الحرارة ل 140 درجة مئوية, وسيبيها تتخبز لمدة 55 دقيقة كمان, لحد ما الكيكة ترتفع ضعف حجمها الاصلي تقريبا.
11- خرجي الكيكة من الفرن, واقلبيها على ايدك او على طبق كبير بحرص جدا.
12- رشي وش الكيكة من فوق بالسكر البودرة, وبعدين قطعيها وقدميها مع الفراولة.
