7 علامات جسمك بينبهك بيهم انك مش سعيدة

مين فينا مش بيتمنى يكون عايش حياة سعيدة وايجابية؟ لكن لازم نعرف الاول معنى السعادة ايه, لو فكرنا فيها كده هنلاقي ان السعادة حالة ذهنية بتحقق من خلال انك تاخدي موقف ايجابي اتجاه الحياه بكل ما فيها, ولكن مش كده بس السعادة كمان مرتبطة بمجموعة عمليات كيميائية في جسمنا, من خلال الهرمونات اللي جوه اجسامنا اللي بتنظم وبتتحكم في المزاج, وبتساعد على الشعور بالسعادة او القلق او الحزن او الاكتئاب وغيرها من المشاعر اللي ممكن نكون بنمر بيها, واجسامنا بتحتوي على هرمونات اسمها “هرمونات السعادة” اللي بتمدنا بالقدرة على الشعور بالسعادة وبتحافظ على الحالة الذهنية السعيدة, وعدم وجود هرمونات السعادة دي ممكن انها تخلينا معظم الوقت مش راضيين عن حالنا ومش حاسين بسعادة, طيب ازاي نعرف ان جسمنا في عدم توازن من الهرمونات دي؟ ده نقدر نكتشفه من خلال مجموعة اشارات جسمنا ممكن ينبهنا بيها, وده اللي هنعرفه النهاردة من خلال مقالنا هنتعرف على 7 علامات تقولك انك مش سعيدة.

علامات تقولك انك مش سعيدة:

1- اكل الشيبسي والحلويات:

هل سبق انك حسيتي بشعور احسن بعد ما اكلتي شيبسي او كمية ايس كريم كبيرة؟ دي علامة بتقولك ان جسمك بيعاني من نقص في مستويات هرمون السيروتونين “هرمون السعادة”, او بمعنى تاني ان جسمك محتاج للنشا والسكر, وبمجرد ما تاكلي قطعة شوكولاتة او شيبسي بتحسي ان حالتك المزاجية بقت افضل, لكن الحالة المزاجية اللي بتنتج عن اكل الاطعمة اللي بتحسن المزاج مش بتدوم فترة طويلة, وبمجرد ما مفعولها يروح هتحسي انك عايزة تاكلي منها تاني.

2- ألم الصدر:

الهرمونات مش بتأثر بس على حالة المزاج, لكن بتأثر كمان على صحتنا, لو انتي عندك مستويات منخفضة من هرمون الاستروجين في جسمك, في الحالة دي هتمري بألم الصدر من وقت للتاني, , وعلى الرغم ان الشعور ده مرتبط عن ستات كتير بفترة الدورة الشهرية, ولكن هو كمان علامة جسمك بينبهك بيها انك مش سعيدة.

3- مشاكل زيادة الوزن:

نقص الدوبامين في الجسم ممكن يأدي للشعور بالاجهاد والافراط في الاكل, حتى لو معدتك مليانة هتفضلي تدري على الاكل, والرغبة الشديدة في الاكل دي بترجع لنقص الهرمونات في جسمك, ولو اهملتي العلامة دي ممكن يتطور لادمان الاكل مع مرور الوقت.

4- انخفاض مستويات التعاطف:

الدراسات كشفت وجود صلة بين مستويات الاوكسيتوسين “هرمون الحب” والتعاطف عند الانسان, وهرمون الحب ده بيلعب دور رئيسي في التأثير على مزاجنا, فلو شخص لقى صعوبة انه يتعاطف مع غيره, فاكيد ان الشخص ده بيعاني من مشاكل في التعرف على تعابير الوجه وفهمها وبالتالي مش بيعرف يتعاطف مع اللي حواليه.

5- الصداع المتكرر:

البروجسترون هو واحد من الهرمونات اللي كمان بتحسن الحالة المزاجية, ونقصه ممكن يأدي للصداع بشكل متكرر, واحيانا الحالة بتبقى اسوأ وبيأدي للصداع النصفي الحيضي,  وده بيكون شائع جدا بين النساء اثناء فترة الحمل, والانواع دي من الصداع تعتبر مؤلمة جدا.

6- مشاكل الارق:

انخفاض مستويات السيروتونين مش بس بتأدي لادمان الاكل, ولكن كمان ممكن تأدي لمشاكل النوم, ولو اتجاهلتيه ممكن يوصل لمرحلة الارق المزمن, واكيد كلنا عارفين ان قلة النوم بتكون متعبة قد ايه وبتخلينا في حالة من عدم التركيز, والاشخاص اللي دايما عايشين في حالة توتر او نمط حياة مش مستقر هما اكتر ناس معرضين للارق.

7- رعشة غير عادية:

في بعض الاحيان بتحصل انقباضات عضلية في اجسامنا بتأدي لحركات مش مقصودة لجسمنا, وفي الغالب الحركة دي بتكون مرتبطة بايدينا هتحصل لما نيجي نمسك اي حاجة, وده بيحصل بسبب انخفاض مستويات الدوبامين في الجسم, وتعتبر الهزات او الرعشة دي علامة على وجود حالة عصبية مش ظاهرة, والهزات دي بتحصل بسبب قلة الراحة, والاجهاد العقلي, والمشاعر العاطفية القوية.

من كل النقط اللي عرفناها فوق دي بتقولنا حاجة واحدة بس, وهي ان احنا بس اللي مسؤولين عن سعادة نفسنا, يعني لازم نتوقف اننا نرمي اللوم على غيرنا انهم مش قادرين يسعدونا او اننا مش سعداء بسببهم, يعني لازم تتوقفي انك تنتظري حد هو اللي يسعدك, لان زي ما احنا شوفنا ده بيكون نابع من جوانا احنا.

راقبي اسلوب حياتك وحاولي تتجنبي العادات السيئة اللي بتأثر على حالتك الذهنية بطريقة غلط, اعرفي جذور مشاكلك الجسدية والعقلية, وزيلي كل العقبات اللي بتقف في طريق سعادتك.

5 طرق لزيادة هرمون السيروتونين “هرمون السعادة” في المخ