7 قصات شعر جديدة مناسبة لموسم الخريف

ريهام محمود
ريهام محمود
في
شعر
6906

افضل حاجة عشان نستقبل بيها اي موسم جديد, اننا نغير اللوك بتاعنا ونجدده, ومن اسهل الطرق اللي ممكن تغير اللوك هي قصة الشعر, خصوصا اننا بنكون طالعين من الصيف والشعر ممكن يكون مجهد من الحر والبحر ومحتاج انه يتقص عشان تتخلصي من اضرار موسم الصيف عليه, والنهاردة هنشوف مع بعض 7 قصات شعر لموسم الخريف, اختاري منها المناسب لطول ونوع شعرك.

قصات شعر لموسم الخريف:

للشعر القصير:

قصة Tousled Bob:

لو شعرك اتاثر بالجو والبحر والحرارة في موسم الصيف, قصة الشعر دي هتكون مناسبة ليكي جدا عشان تتخلصي من كل الشعر التالف, بالاضافة ان الشعر القصير تريندي جدا في الموسم ده, والطول ده بيكون مناسب معاه جدا تعمليه ويفي خفيف بيديه شكل حلو جدا.

قصة Choppy Pixie:

لو مستعدة تعملي حاجة جريئة اكتر ومختلفة, يبقى اختاري قصة الشعر البيكسي, والقصة دي مناسبة اكتر للشعر الناعم والمفرود, لان لو شعرك كثيف ومجعد هتحتاج منك مجهود في تصفيفه عشان تظبطيه كل يوم.

للشعر متوسط الطول: قصة Bouncy Volume:

طول الشعر لحد الكتفين, او اللي بطول متوسط كمان من القصات التريندي لموسم الصيف, ممكن تستخدمي الكيرلر عشان تعملي تعمليه ويفي واسع.

للشعر الطويل: قصة تدريج طويل مع الوان دافية:

لو شعرك كويس ومش محتاج يتقص, تقدري تخليه زي ما هو بنفس طوله ولكن تعملي له تدريجات طويلة, وبكده هتعملي لوك جديد للشعر من غير ما تقصريه, ولو شايفة التغيير ده لسه مش كافي بالنسبة لك وعايزة تغيير اكتر, ممكن تلعبي بالالوان, وتصبغيه بالوان دافية مناسبة للخريف.

للشعر الطبيعي: قوصة مع هايلايت:

الشعر اللي على طبيعته كمان من الاتجاهات التريندي لموسم الخريف, والشكل واللون بيكونوا مهمين جدا لو هتسيبي شعرك طبيعي من غير سيشوار او مكوى, انك مثلا تضيفي قوصة ناعمة وهايلايت بلون دافي يظهر لون بشرتك, زي ما هو باين في الصورة اللي قدامنا.

للشعر الكيرلي: Curly Shag:

القصة دي واحدة من اكتر القصات التريندي للسنة دي, لو انتي اصلا شعرك كيرلي طبيعي  فمش هتحتاجي مجهود في تصفيفه, ممكن تستخدمي معاه ال Diffuser عشان تخلي الكيرلي بتاعك Defined ومتستخدميش بعدها صوابعك عشان متفكيش الكيرلي.

لل Coily Hair: ستايل Passion Twists:

الستايل ده من الستايلات المناسبة جدا لموسم الصيف لانه بيحافظ على الشعر في الحر والرطوبة, ومكمل لموسم الخريف تقدري تعتمدي عليه, هو مشكلته الوحيدة انه بيحتاج وقت ومجهود عشان يديكي النتيجة دي, لكن النتيجة النهائية اكيد تستحق التعب والمجهود.

مقالات متعلقه

4 ستايلات مختلفة للشعر باستخدام المكواة

4 ستايلات مختلفة للشعر باستخدام المكواة

ستايلات الشعر المثالية لشكل انفك

ستايلات الشعر المثالية لشكل انفك

تسريحات للشعر الكيرلي باستخدام السكارف

تسريحات للشعر الكيرلي باستخدام السكارف