اكتر 3 اوضاع نوم آمنة للحوامل..ووضع النوم اللي المفروض تتجنبيه

ريهام محمود
ريهام محمود
في
صحة
4095

احنا تقريبا بنقضي تلت حياتنا في النوم, والدراسات الحديثة اثبتت ان في علاقة بين وضع نوم الأم وصحة الطفل, وبسبب التغيرات في الجسم, ممكن تكون الاوضاع العادية او التقليدية في النوم مش آمنه اثناء الحمل, عشان كده النهاردة من خلال موضوعنا هنقولك اكتر اوضاع نوم آمنة للحوامل, اللي هتساعدك تنام كويس وفي نفس الوقت من غير ما تأذي نفسك او البيبي.

اوضاع نوم آمنة للحوامل:

1- النوم على البطن:

لو انتي متعودة على وضع النوم على البطن قبل الحمل, تقدري تنامي بنفس الوضع خلال الشهور الاولى من الحمل بس, لان مافيش اي دليل ان ده ممكن يسبب ضرر ليكي او للبيبي, لكن مع ذلك بعد التلت الاول من الحمل, انتي طبيعي مش هتقدري تنامي في الوضع ده, لان البطن بتكبر اكتر فهيكون صعب انك تنامي على البطن.

اوضاع نوم آمنة للحوامل 1
اوضاع نوم آمنة للحوامل 1

2- النوم على الجنب:

الوضع ده يعتبر اكتر وضع آمن ليكي ولطفلك, لانه بيسمح بتدفق الدم بشكل جيد ومش بيضغط على اعضائك الداخلية, وعلى الرغم من الجانبين آمنين, ولكن بيفضل النوم على الجنب الشمال لكذا سبب.

– هيزود كمية الدم والمواد الغذائية اللي بتوصا للطفل.

– هيقلل من خطر ولادة مولود متوفي.

– هيساعد الكلى بتاعتك انها تتخلص من السموم والسوائل.

وممكن يكون الوضع صعب في البداية خصوصا لو انتي متعودة تنامي على وضع تاني مختلف, لكن هنقولك شوية نصايح في اخر المقال بتاعنا عشان تقدري تنامي على جنبك بشكل مريح.

اوضاع نوم آمنة للحوامل 2
اوضاع نوم آمنة للحوامل 2

3- وضع الايدين والركبتين:

طبعا الوضع ده مش مقصود بيه النوم, ولكن ممارسته ممكن يكون مفيد جدا للام والطفل, وضع الايدين والركبتين بالوضع زي اللي باين قدامنا في الصورة بيساعد على تخفيف آلام الضهر والمفاصل, بالاضافة انه بيوفر الراحة والاسترخاء لكتير من الحوامل, وبالنسبة للطفل الوضع ده بيساعده انه ياخد الوضع الصحيح, وده طبعا هيكون مفيد جدا للولادة.

عشان تعملي الوضع ده, حطي مخدة تحت الركبتين “وممكن تستخدمي سجادة يوجا” اسندي على الايدين والركبتين, ولكن اتأكدي انك متقوسيش الكتفين اثناء الحركة خلي الضهر مفرود, واثبتي على الوضع ده لمدة ثواني, وبعدين ارفعي جسمك وارجعي للوضع العادي ببطء.

وممكن تستخدمي للتمرين كورة اللياقة البدنية, استخدام الكورة هيعملك دعم اضافي.

اوضاع نوم آمنة للحوامل 3
اوضاع نوم آمنة للحوامل 3

نصايح لتحسين النوم اثناء الحمل:

– حطي مخدة ورا ضهرك عشان تكون داعم للضهر, وتمنعك انك تتقلبي على ضهرك وتنامي نومة مش مريحة.

– كتير من الامهات الحوامل بيرتاحوا جدا من وضع مخدة بين الرجل “في وضع النوم على الجنب”, لانها بتحافظ على توازن الساقين وبتدعم منطقة الوركين والحوض والعمود الفقري.

– لو بتعاني من الحرقان اثناء الليل ودي من المشاكل اللي بيتعرضها كتير من الحوامل, حطي مخدات اضافية تحت راسك هتساعدك جدا في حل المشكلة.

– حاولي تعملي شعرك كحكة منخفضة لانها هتخليكي تحسي بشعور مش مريح لو حاولتي تنامي على ضهرك, وبالتالي ده هيمنعك انك تنامي في الوضع ده.

– لو بتنامي شوية في نص النهار, انتبهي لوضع نومك زي بالليل بالظبط.

– نامي على الوضع الصحيح, واحنا في الغالب بننام معظم الوقت على الوضع اللي احنا نمنا عليه في البداية, فلو صحيتي في نص الليل لاي سبب, اتأكدي من الوضع اللي انتي نايمة عليه, وارجعي نامي على جنبك الشمال.

اوضاع نوم آمنة للحوامل 4

اتجنبي النوم على الضهر:

النوم على الضهر مش آمن اثناء فترة الحمل, لان وزن الطفل والرحم بيعملوا ضغط على الاعضاء الداخلية, وده بيسبب صعوبة تدفق الدم للمشيمة.

عشان كده بننصحك انك تتجنبي الوضع ده وتختاري وضع مختلف للنوم اكتر امان ليكي ولطفلك, ودي طريقة بسيطة جدا عشان تقللي مخاطر ان الجنين يتولد ميت, والتقليل من مخاطر ضعف نمو الجنين, لكن مع ذلك بنقولك متقلقيش اوي من ده, لان اثناء الحمل الطبيعي اللي مافيش فيه اي مشاكل, خطر ولادة جنين متوفي بتكون منخفضة جدا ” 1 من كل 200″.

اوضاع نوم آمنة للحوامل 5

التغذية الصحية اثناء فترة الحمل: الاكلات المهمة واللي المفروض تتجنبيها

التغذية الصحية اثناء فترة الحمل
التغذية الصحية اثناء فترة الحمل

مقالات متعلقه

9 حقائق غريبة ولكن حقيقية جدا عن الحمل

9 حقائق غريبة ولكن حقيقية جدا عن الحمل

حيل علمية لحل مشاكل النوم

حيل علمية لحل مشاكل النوم

6 علامات مفاجئة للحمل معندكيش فكرة عنهم

6 علامات مفاجئة للحمل معندكيش فكرة عنهم