ازاي تعالجي قشرة الشعر باستخدام غسول الفم ليسترين LISTERINE بأكتر من طريقة
تعرفي انك ممكن تتخلصي من قشرة الشعر المزعجة بمكون واحد بس موجود في بيوتنا كلنا؟ غسول الفم والأسنان ليستيرين LISTERINE وكمان بأكتر من طريقة وكلهم طرق سهلة وبسيطة، الوصفات دي آمنة تماما لكن لو بتعاني من الحساسية بسرعة جربي الأول على مساحة بسيطة من فروة الرأس واتأكدي انه الغسول ماسببش اي حساسية او التهابات ، دلوقتي تعالي نعرف الطرق مع بعض
ازاي تعالجي قشرة الشعر باستخدام غسول الفم ليسترين LISTERINE بأكتر من طريقة
الطريقة الأولى: التطبيق المباشر
أول طريقة معانا من طرق ازاي تعالجي قشرة الشعر باستخدام غسول الفم هي التطبيق المباشر، ممكن تبلي قطنة بمقدار مناسب من الغسول و تمسحي بيها على فروة الرأس، أو لو ماعندكيش مشكلة مع الاحساس بالبرودة في رأسك أو لسعة بسيطة زي النعناع ممكن تحطي كمية قليلة من الغسول على اطراف الأصابع وتبدأي تدلكي بيها فروة رأسك في حركات دائرية بعد ما ترجعي شعرك لوراء، وبعد المساج اشطفي شعرك بمياة فاترة إلى باردة.
الطريقة الثانية: مع الشامبو
لو مش مرتاحة لفكرة استخدام غسول الفم مباشرة على شعرك، ممكن تمزجي كمية قليلة منه مع الشامبو اللي بتستخدميه. حطي كمية الشامبو اللي بتستخدميها في ايدك وضيفي عليها مقدار معلقة من غسول الفم ليسترين وامزجيهم مع بعض، بس خدي بالك لانك لما تحطي الغسول على الشامبو هيبقى خفيف فلازم تحطيه على فروة رأسك بسرعة، ابداي دلكي بالمزيج ده فروة شعرك وبعد كده اشطفيه بالطريقة العادية، ممكن تزودي الكمية حسب طول وكثافة شعرك.
الطريقة التالتة: سبراي
لو بتعاني من قشرة الشعر الشديدة، يبقى استخدمي ليسترين في بخاخ سبراي بشكل مباشر على فروة رأسك مع التدليك، ده هيساعد ان مفيش اي دهون او قشرة تتكون لحد ما تغسلي شعرك المرة الجاية، لكن بننصح بتقليل الاستخدام بالطريقة دي عشان الاستخدام المباشر المتكرر ممكن يسبب التهابات في فروة الرأس، وممكن تخففيه بنسبة قليلة من المياة أفصل بنسبة 3 -4 معالق ليسترين لـ 3 او 4 كوبايات مياة معدنية.
اعرفي كمان 4 وصفات لعلاج قشرة الشعر
