10 انواع حمامات علاجية للقدمين لحل كل مشاكلها الصحية

ريهام محمود

في

2805

مش ضروري انك تروحي السبا عشان تعملي جلسات علاجية صحية, انتي تقدري تعملي حمامات للقدم في البيت بتكلفة قليلة جدا, العلاجات دي بتساعد على تحفيز الدورة الدموية, وبتساعد على الشفاء من بعض الامراض, وليها تأثير قوي كمان على العقل والجسم لانها بتدخلك في حالة استرخاء, والنهاردة من خلال موضوعنا هنقولك على 10 انواع حمامات علاجية للقدمين هتحل لك كتير من المشاكل اللي ممكن تكوني بتعاني منها.

حمامات علاجية للقدمين:

الميزة انك لما تعملي الحمام في البيت بنفسك بتقدري تتحكمي في تركيز المكونات زي ما انتي عايزة وتزودي من مكون او تقللي من مكون تاني حسب حساسية بشرتك للمكونات اللي هتستخدميها, وبالطريقة دي هتزودي من فوايد الحمام وتقللي من خطر تهيج الجلد اللي ممكن ينتج من اضافة اي مكونات كيميائية لان المكونات كلها طبيعية.

1- حمام علاجي لانتفاخ وتورم القدمين:

هاتي طبقين كبار كبير املي نص الاولاني بمية سخنة بدرجة حرارة يتحملها جلدك, والطبق التاني امليه لحد نصه بمية باردة, انقعي رجلك في المية السخنة لمدة 10 دقايق, وبعدين طلعيها انقعيها في المية الباردة لمدة من 10 – 12 دقيقة, وبعدين رجعي رجلك في المية السخنة تاني وسيبيها لمدة 5 دقايق كمان.

2- حمام للتخلص من رائحة القدم:

الحمام ده مش بس هيخلصك من رائحة القدم الكريهة والعرق بس, لكن كمان يعتبر طريقة مثالية لتهدئة الم القدمين.

هاتي طبق كبير حطي فيه مية دافية, وحطي فيها ليمونة متقطعة شرايح, وبرتقانة متقطعة شرايح, 4 نقط من زيت النعناع, 4 نقط من زيت شجرة الشاي, 3 معالق كبيرة كربوناتو, وانقعي رجلك في الخليط لمدة 30 دقيقة تقريبا.

3- حمام لتخفيف التوتر:

في طبق كبير حطي مية دافية وضيفي لها شوية من ملح الابسوم “الملح الانجليزي”, ومعاه من 10 – 12 نقطة من زيت الاوكالبتوس او المعروف بزيت الكافور “هتلاقيه عند العطار”, وانقعي رجلك فيه لمدة من 20 – 30 دقيقة.

4- حمام لتخفيف الم القدمين:

بعد يوم طويل بره البيت من المشي ولبس الشوز فترة طويلة القدم بتكون محتاجة انك تريحيها بشكل صح, والحمام ده هيكون مفيد ليها جدا بعد يوم طويل ليكي, ومن بين فوايده كمان انه بيزيل السموم وبيحافظ على الجلد صحي, وهيساعدك على الاسترخاء.

في طبق كبير حطي مية دافية ضيفي لها 2 معلقة كبيرة من ملح الابسوم او ملح البحر, و 1 معلقة صغيرة كربوناتو, و 1 معلقة صغيرة زيت زيتون, وحطي اي اعشاب تفضليها ممكن بقدونس, او روزماري “اكليل الجبل”, او نعناع, وممكن تربطي الاعشاب في شاشة وتحطيهم جوه المية عشان تفضل نضيفة, وانقعي رجلك في المية لمدة 30 دقيقة.

5- حمام لتهدئة العضلات:

حمام الافندر بتهدئة العضلات, معروف ان اللافندر يعتبر مسكن طبيعي للالم, وهيساعدك على تهدئة المفاصل والم العضلات, وريحة اللافندر هتساعدك على الاسترخاء.

في طبق كبير حطي مية دافية وضيفي لها ½ كوباية من ملح الابسوم, و 2 معلقة كبيرة كربوناتو, 6 نقط من زيت اللافندر, انقعي رجلك في المية لمدة من 15 – 30 دقيقة.

6- حمام للتخلص من اصفرار الاظافر:

الحمام ده بيساعد على ازالة البقع الصفرا من الضوافر, وكمان فرك شرايح الليمون نفسها على الجزء المصاب هيكون فعال في علاج المشكلة.

في طبق كبير حطي مية دافية وضيفي لها معلقة كبيرة عصير ليمون, وبعدين انقعي صوابع رجلك في الخليط لمدة من 20 – 30 دقيقة.

7- حمام لتقليل الالتهاب:

الحمام ده هنستخدم فيه ملح الابسوم اللي ممكن يكون مفيد جدا في حالات الالم والالتهاب, والحمام هيساعدك كمان على الاسترخاء وتحسين تركيزك.

في طبق كبير حطي مية دافية ضيفي لها من 2 – 3 معلقة كبيرة من ملح الابسوم, انقعي رجلك فيه من 10 – 15 دقيقة, والملح ممكن يخلي الجلد جاف شوية, عشان كده مهم انك ترطبي رجلك بعدها.

8- حمام للجلد الجاف:

الكربوناتو من المكونات اللي هتساعدك على التخلص من الجلد الميت من القدمين بشكل نهائي, لكن نخلي بالنا لما نيجي نستخدم الكربوناتو, لان اللي جلدهم حساس مش هيناسبهم الحمام ده.

في طبق كبير حطي مية دافية وضيفي لها من 2 – 3 معالق كبيرة كربوناتو, انقعي رجلك فيها لمدة من 10 – 20 دقيقة, وبعدها رطبي رجلك كويس باي كريم او لوشن بتستخدميه.

9- حمام خل التفاح متعدد الاستخدامات:

خل التفاح هيساعدك على علاج مشاكل كتير, هيساعد على علاج تورم القدمين والكاحلين بسرعة, علاج الجلد الجاف, وتشقق الكعبين, هيقلل من ريحة القدم, الخل كمان بيحتوي على خصائص مضادة للفطريات, عشان كده هيكون علاج مفيد جدا لكل اللي بيعانوا من فطريات الاظافر.

مع الحمام ده هنستخدم مية باردة عشان متسببش جفاف البشرة, اخلطي المية مع خل التفاح وكمية المية تكون ضعف كمية الخل, وانقعي رجلك في المية من 10 – 15 دقيقة, ممكن تضيفي اي نوع زيت عطري للمية عشان ريحة الخل القوية.