ديتوكس الجمال: طرق لعمل ديتوكس لجمال البشرة والشعر والضوافر
زي ما دايما بنقول ان جمال البشرة والشعر والضوافر بيبدأ من جوه الجسم قبل الماسكات, وفي ظل ضغوط الحياة اللي احنا بنعيشها واعتمادنا على الوجبات السريعة واكلات مش صحية جسمنا بيبقى في نقص لكتير من العناصر الغذائية المهمة, وده بيأثر اكيد بشكل سلبي على بشرتنا وشعرنا وضوافرنا, لانها محتاجة الخضار والفاكهة الغني بكل العناصر المفيدة, ومن افضل واسهل الطرق عشان نستفيد من الخضار والفاكهة بشكل يومي اننا ناخدها على شكل عصير, والنهاردة جايبين لبنات حوا طرق لعمل ديتوكس الجمال للبشرة والشعر والضوافر.
طرق لعمل ديتوكس الجمال للبشرة والشعر والضوافر:
1- ديتوكس للبشرة والشعر والضوافر:
المكونات:
– 5 حبات فراولة كبيرة.
– 2 ثمرة تفاح اخضر.
– 1 ثمرة بنجر كبيرة.
– من ½ – 1 عصير ليمونة.
– ½ بوصة زنجبيل طازة.
– 3 ثمرات جزر كبيرة.
طريقة التحضير:
اغسلي كل الفاكهة والفاكهة كويس جدا, ابدأي بالفراولة شيلي منها الجزء الاخضر وحطيها في الخلاط, هاتي التفاح قطعية وحطيه مع الفراولة, وبعدين ضيفي البنجر, وعصير الليمون, والزنجبيل, وفي الاخر ضيفي الجزر, واضربيهم كلهم مع بعض كويس جدا وبعدين صفيه, وكده يبقى الديتوكس جاهز عندك, خليه في التلاجة شوية عشان الافضل يتشرب بارد هيبقى طعمه احلى.
ممكن تشربيه كل يوم الصبح على الريق او تشربيه من 3 – 5 مرات في الاسبوع.
2- ديتوكس للبشرة:
المكونات:
– 2 ثمرة جزر.
– 2 كوباية سبانخ.
– 1 ثمرة تفاح.
– 1 ثمرة خيار.
– قطعة زنجبيل.
طريقة التحضير:
حطي كل المكونات مع بعض في الخلاط واضربيهم كويس وبعدين صفيه او لو متوفر عندك Juicer استخدميه هيكون افضل اكيد, وكده الديتوكس يبقى جاهز.
اشربيه على الفطار, والافضل انه يبقى اول حاجة الصبح على الريق عشان يطرد كل السموم من الجسم.
الجزر مصدر غني جدا بفيتامين A, C, D, وحمض الفوليك, البيوتين, ونسبة من النحاس والمغنسيوم, وكل الفيتامينات دي بتساعد على الحفاظ على خلايا الجلد, والبيتا كاروتين اللي موجودة في التفاح والسبانخ بتمنع الجلد من التلف, والخيار بيحتوي على السيليكون اللي بيساعد على تحسين لون البشرة, وبيمنع الشيخوخة المبكرة, والزنجبيل يعتبر علاج طبيعي لحب الشباب والبثور.
3- ديتوكس للشعر:
المكونات:
– 2 ثمرة خيار.
– 2 ثمرة تفاح.
– 1 كوباية ورق نعناع.
طريقة التحضير:
حطي كل المكونات في العصارة واضربيهم مع بعض, او في الخلاط واضربيهم وبعدها صفيه, واشربيه كل يوم على الريق عشان الجسم يمتصه بشكل اسرع.
السيليكا يعتبر واحد من اهم المعادن اللي بتساعد على تقوية بصيلات الشعر عن طريق توفير المواد الغذائية المهمة اللازمة لفروة الشعر, والخيار بيحتوي على نسبة عالية من السيليكا اللي بتساعد على تعزيز نمو الشعر بشكل طبيعي وبيحسن نسيج الشعر, والتفاح والنعناع بيحتوا كمان على معادن بتساعد على تحسين الدورة الدموية وتحسين نمو الشعر.
7 طرق لعمل عصير لتفتيح البشرة والحفاظ على نضارتها
