8 طرق ديتوكس لفروة الراس هتخلي شعرك ينمو كثيف وصحي

بقلمريهام محمود فيشعر visibility1189

فروة الراس الصحية والنضيفة هي المفتاح لشعر كثيف وبيلمع وصحي, ولو كانت فروة الراس غير صحية وملتهبة ومليانة بالسموم, تخيلي ساعتها حالة شعرك هتكون ايه! الشعر هينمو ضعيف وباهت وبيتساقط بسهولة, عشان كده النهاردة من خلال موضوعنا هنقولك طرق ديتوكس لفروة الراس هتساعدك ان شعرك ينمو كثيف وقوي وصحي.

الشعر حساس زي النبات بالظبط محتاج الرطوبة المناسبة, ودرجة الحموضة المظبوطة, والمواد الغذائية, يعني محتاج الظروف المناسبة عشان ينمو بشكل صحي.

وللاسف في وسط سعينا عشان نخلي شعرنا حلو, بنعرضه للمواد الكيميائية والصبغات والشامبو والبلسم والموس والسبراي وكل منتجات الشعر اللي ممكن تأثر عليه بشكل سلبي.

وحتى في حالة لو انتي قررتي تعتمدي على العناية الطبيعية للشعر, فالتلوث ونوعية المية عوامل تانية ممكن تأثر على الشعر, وتخلي فروة الراس مليانة بالسموم.

والتخلص من سموم فروة الراس, هي عملية تعتبر تطهير عميق بيساعد على ازالة السموم من فروة الراس, وبيفتح بصيلات الشعر, وبيوازن بين الزيوت الطبيعية ودرجة حموضة فروة الراس.

وعملية ازالة السموم من فروة الراس هتجدد الشعر, وهتهيء بيئة مثالية لنمو الشعر بشكل صحي.

ليه المفروض تعملي ديتوكس لفروة الراس والشعر؟

– الديتوكس هيساعد على التخلص من السموم, ويحسن نمو الشعر بشكل صحي.

– هيحسن الدورة الدموية لفروة الراس, وهيمد جذور الشعر بالمواد الغذائية والاكسجين.

– هيساعد على تجديد خلايا الشعر.

– بيفتح بصيلات الشعر عشان الشعر ينمو من غير اي عائق.

– هيخلصك من الجفاف, والقشرة, وتهيج فروة الراس.

– هيساعد على علاج حب الشباب في فروة الراس.

– والاهم انه بيحسن صحة فروة راسك وده الاساس لبصيلات شعر قوية.

طرق ديتوكس لفروة الراس
طرق ديتوكس لفروة الراس

طرق ديتوكس لفروة الراس:

الديتوكس تقدري تعمليه بمكونات بسيطة في البيت من خلال المكونات دي:

1- تدليك فروة الراس: مفيد لاي حد, بيساعد على ازالة السموم, وتحفيز نمو الشعر.

2- ديتوكس عصير الليمون: الديتوكس ده مفيد جدا للشعر الدهني, او لو بتعيشي في مكان المية فيه مش نضيفة او بتأذي الشعر.

3- تونيك العسل والقرفة: الديتوكس ده مفيد لو نمو شعرك بطيء, او لو بتعاني من فراغات في الشعر.

4- سكراب الملح لفروة الراس: بيساعد على ازالة خلايا الجلد الميتة, وتراكم منتجات الشعر.

5- ديتوكس الخيار والليمون: بيساعد في علاج الحكة, وقشرة فروة الراس.

6- ديتوكس صودا الخبز: بيقشر فروة الراس بشكل طبيعي, وبيساعد على علاج القشرة.

7- ديتوكس الطين: بيسحب السموم من فروة الراس, كمان يعتبر شامبو طبيعي للشعر الدهني.

8- ديتوكس صودا الخبز وزيت الزيتون والقرفة: بينضف ويقشر فروة الراس, بيعالج القشرة وفروة الراس الجافة, بيمنع تساقط الشعر, بيمنع الالتهابات الفطرية والبكتيريه في فروة الراس.

تعالوا نعرف بالتفصيل ازاي نستخدم المكونات دي لعمل الديتوكس.

طرق ديتوكس لفروة الراس
طرق ديتوكس لفروة الراس

1- تدليك فروة الراس:

تدليك فروة الراس من الطرق القديمة واسهلها للتخلص من السموم من فروة الراس, التدليك بيحسن الدورة الدموية, وده بيساعد على اخراج السموم من فروة الراس وازالتها من الجسم.

التدليك كمان بيحفز ويقوي بصيلات الشعر زده هيخلي الشعر ينمو صحي.

كل اللي هتعمليه باطراف صوابعك, اعملي مساج او تدليك بحركات ما بين الخفيفة والسريعة لفروة الراس, في النهاية دلكي الشعر كله لحد الاطراف, وتقدري كمان تستخدمي فرشة خشب او مشط خشب بسنان واسعة لتدليك فروة الراس.

تستخدمي مع التدليك زيت او لا؟ الموضوع راجع ليكي, الزيت مفيد لو لو بتعاني من فروة الراس الجافة, ده هيساعد على تليين فروة الراس ونمو الشعر بشكل صحي وبيلمع, من خلال امتصاص مسام فروة الراس للزيوت, والافضل تستخدمي زيوت طبيعية ومضغوطة على البارد.

من اكتر الزيوت المفيدة للشعر وممكن تستخدميها في التدليك هي زيت جوز الهند, زيت الزيتون, زيت الخروع, زيت اللوز, زيت الارجان.

طرق ديتوكس لفروة الراس

فيديو لطريقة تدليك فروة الراس:

2- ديتوكس عصير الليمون:

كلنا عارفين ان عصير الليمون مع المية الدافية يعتبر مشروب مزيل للسموم من الجسم, لكن عصير الليمون كمان بيساعد على التخلص من السموم من فروة الراس والشعر.

الليمون غني بحمض الالفا هيدروكسي, بيزيل بلطف الطبقة الخارجية من الخلايا الميتة, وتراكم المنتجات لتعزيز نمو الشعر, وبيديه لمعان.

المكونات:

1 معلقة كبيرة عصير ليمون.

1 كوب مية.

5 نقط من زيت اللافندر “اختياري, ومفيد لو بتعاني جفاف وتقشر فروة الراس”.

لو شعرك جاف ممكن تستبدلي عصير الليمون بعصير البرتقان او عصير التفاح.

طريقة الاستخدام:

اخلطي كل المكونات مع بعض, صبي الخليط على شعرك كله, دلكي فروة الراس بصوابعك, وسيبيه لمدة 5 دقايق, وبعدين اغسليه بالمية العادية.

نصيحة: ممكن تستخدمي الخليط ده كبلسم للشعر بعد غسل الشعر بالشامبو, او تستخدميه هو كشامبو عشان تزيلي الزيوت من الشعر وتنشطي شعرك.

استخدمي الديتوكس ده مرة واحدة في الاسبوع.

طرق ديتوكس لفروة الراس

3- تونيك العسل والقرفة:

التونيك ده مش بس بيساعد على ازالة السموم من فروة الراس, كمان مغذي للشعر ومفيد لو نمو شعرك بطيء, او بتعاني من فراغات الشعر, هيكون التونيك ده انسب اختيار ليكي.

العسل مرطب عميق للشعر وبيساعد على تحقيق توازن درجة الحموضة في فروة الراس, والقرفة مضادة للالتهابات وبتساعد على ازالة شوائب فروة الراس, وبتزود من الدورة الدموية وبتحفز نمو الشعر.

المكونات:

1 معلقة كبيرة عسل.

½ معلقة صغيرة قرفة بودر.

1 معلقة كبيرة زيت زيتون.

طريقة الاستخدام:

اخلطي كل المكونات مع بعض, دلكي فروة الراس بالخليط, سيبيه من 10 – 15 دقيقة, غطي الشعر بكيس بلاستيك, وبعدين اغسلي الشعر بالمية وممكن بالشامبو لو حسيتي انه محتاج.

استخدمي التونيك من مرة لمرتين في الاسبوع.

طرق ديتوكس لفروة الراس

4- سكراب الملح:

الملح بيخلص فروة الراس من الاوساخ وتراكم المنتجات, وبيساعد على ازالة خلايا الجلد الميتة, وده السبب انك هتلاقي ملح البحر داخل في كتير من انواع الشامبو, وبعد استخدام واحد بس للملح هتحسي بالفرق وان فروة الشعر نضيفة وصحية, وهيخلي الشعر بيلمع اكتر وهيديه حجم اكبر.

المكونات:

1 معلقة كبيرة من ملح البحر الخشن.

1 معلقة كبيرة شامبو “اي شامبو من اختيارك”.

1 معلقة صغيرة زيت زيتون “اختياري, بس هيدي ترطيب وتنعيم اضافي للشعر”.

طريقة الاستخدام:

اخلطي المكونات كلها مع بعض, بلي شعرك بالمية, حطي الخليط على فروة الراس والشعر, دلكيه, وبعدين اغسليه بالمية الباردة.

كرريه من مرة لمرتين في الشهر.

ملحوظة: تقدري تستخدمي السكراب ده مع اي نوع شامبو طبيعي تكوني عمله في البيت, ومتستخدميش ملح الاكل, استخدمي ملح البحر النقي “هتلاقيه عند العطار”.

طرق ديتوكس لفروة الراس

5- ديتوكس الخيار والليمون:

الديتوكس ده بيساعد على ازالة السموم وتهدئة فروة الراس, خصوصا للي بيعانوا من حكة فروة الراس, او فروة الراس المقشرة والمتهيجة.

الخيار بيحتوي على خصائص مضادة للالتهابات والحكة, وده بيساعد على تقليل الاحمرار والتهيج, ويعبتر كمان مرطب طبيعي لفروة الراس والشعر.

عصير الليمون بيساعد على ازالة الزيوت والاوساخ وتراكم المنتجات.

المكونات:

1 كوباية خيار.

1 معلقة صغيرة عصير ليمون.

3 نقط من زيت الروزماري “اختياري, بس بيساعد على تحفيز نمو الشعر”.

طريقة الاستخدام:

اضربي الخيار في الخلاط لحد ما يبقى معجون ناعم, اخلطي معاه عصير الليمون والزيت, حطي الخليط على فروة الراس, دلكيه لمدة دقايق, وبعدين سيبيه من 5 – 15 دقيقة, وبعدها اغسليه بالمية.

كرريه من مرة لمرتين في الاسبوع.

6- ديتوكس صودا الخبز “الكربوناتو”:

صودا الخبز او بيكربوناتو الصوديوم “الكربوناتو”, يعتبر منظف طبيعي عميق لفروة الراس, صودا الخبز بتساعد على تقشير فروة الراس لازالة اي شوائب, ويعتبر مضاد للجراثيم والفطريات, وبياعد على علاج قشرة فروة الراس.

المكونات:

1 معلقة كبيرة كربوناتو.

1 كوباية مية عادية.

1 معلقة صغيرة قرفة بودر “اختياري, بتحفز نمو الشعر”.

5 نقط من زيت اللافندر “اختياري, بيوازن بين زيوت فروة الراس”.

1 – 2 معلقة صغيرة زيت لوز “اختياري, مفيد لفروة الراس الجافة”.

طريقة الاستخدام:

اخلطي المكونات مع بعض, وممكن تصبي الخليط في ازازة ببخاخ, بلي شعرك, دلكي فروة الراس والشعر بالخليط لمدة دقايق, وبعدين اشطفيه بالمية.

بعد ما تغسلي شعرك من صودا الخبز, ممكن تشطفيه شطفه اخيرة بخل التفاح, عشان تقفلي الطبقة الخارجية للشعر, وهيدي للشعر لمعان رهيب.

كرريه مرة واحدة كل 15 يوم.

7- ديتوكس الطين:

لو زهقتي من فروة الراس والشعر الدهني, ده هيكون مناسب ليكي جدا, وممكن تستخدميه كشامبو طبيعي لازالة السموم, الطين بيساعد على ازالة الشوائب من فروة الراس, وامتصاص الزيوت الزيادة والاوساخ, بالاضافة ان الطين غني بالمعادن زي السيليكا والحديد والمغنسيوم والصوديوم والبوتاسيوم, اللي بتساعد على اصلاح وتجديد فروة الراس وبتغذي جذور الشعر عشان ينمو صحي وقوي وناعم.

المكونات:

1/3 كوباية طين Rhassoul ” النوع ده من الطين للشعر العادي للجاف”.

1/3 كوباية طين بنتونيت “مناسب للشعر الدهني”.

كمية كافية من المية او اي نوع شاي اعشاب لعمل عجينة.

طريقة الاستخدام:

اخلطي الطين مع المية لحد ما يتكون عندك عجينة ناعمة, استخدمي ايديك او فرشة حطي بيه الطين على فروة الراس والشعر, غطي فروة الراس والشعر كله بالطين, سيبيه لمدة من 10 – 15 دقيقة, وبعدين اغسليه بالمية.

اشطفي شعرك الشطفة الاخيرة باي نوع شاي اعشاب, عشان تقفلي الطبقة الخارجية للشعر وفروة الراس, وتدي لمعان للشعر.

عشان تعملي شاي الاعشاب, اخلطي 1 معلقة كبيرة من اي نوع اعشاب من اختيارك مع كوباية مية مغلية, وسيبيها تبرد وبعدين استخدميها لغسل الشعر.

للشعر الغامق: استخدمي اعشاب زي الروزماري, الشاي الاسود, الاملا.

للشعر الاشقر: ممكن تستخدمي البابونج, الشاي الاخضر.

كرري الديتوكس ده من مرة في الاسبوع او مرة كل 15 يوم.

8- ديتوكس صودا الخبز وزيت الزيتون والقرفة:

زيت الزيتون غني بمضادات الاكسدة اللي بتحارب قشرة الراس وفروة الراس الجافة, وبيساعد على منع تساقط الشعر, والقرفة بتحتوي على مركبات عضوية مضادة للفيروسات والفطريات والجراثيم, وده بيساعد على منع الالتهابات الفطرية والبكتيرية في فروة الراس.

المكونات:

1 معلقة صغيرة من صودا الخبز.

2 معلقة كبيرة زيت زيتون.

½ معلقة صغيرة قرفة بودر.

طريقة الاستخدام:

اخلطي المكونات كلها مع بعض, قسمي شعرك وحطي الخليط على فروة الراس والشعر ودلكيه لمدة دقايق, غطي شعرك بكيس بلاستيك وسيبيه من 10 – 15 دقيقة, وبعدين اغسليه بالشامبو والبلسم.

وممكن تخلي الشطفة الاخيرة بعد الديتوكس بخل التفاح وبعدين تستخدمي عليه البلسم بالطريقة العادية وتشطفيه بالمية.

كرري الديتوكس ده مرة واحدة بس في الشهر.

نصايح لديتوكس فروة الراس:

1- اشربي مية: المية يعتبر من اقوى المكونات للتخلص من السموم, المية حرفيا بتطرد السموم الضارة خارج الجسم.

2- كلي خضروات وفواكة اكتر: الخضروات والفواكة من المصادر الممتازة للالياف الغير قابلة للذوبان, اللي بتمتص السموم وبتعزز الهضم السريع وبتنضف الجهاز الهضمي من الفضلات, والجهاز الهضمي الصحي بيسهل امتصاص الفيتامينات والمعادن والمواد الغذائية الرئيسية اللي بتحافظ على صحة الشعر والبشرة والجسم.

3- السمنة, جل الالوفيرا, البنجر, تعتبر كمان من المواد الطبيعية اللي بتساعد على ازالة السموم, اللي ممكن تدخليها في نظامك الغذائي.

كل اللي محتاجة تعرفية عن تكنيك غسيل الشعر بالبلسم “Co Washing”