نصايح وأسرار خفية ازاي تختاري فستان الفرح صح ببساطة
كل بنت فينا من صغرها بتتخيل نفسها في فستان الفرح، وبيبقى له تصور معين في خيالها للأسف ممكن في الواقع يتغير، وعشان نساعدك تلاقي فستان أحلامك ببساطة ولأن فستان فرحك هو أهم فستان هتلبسيه في حياتك ولازم تختاريه صح، هنقولك نصايح وأسرار خفية ازاي تختاري فستان الفرح صح ببساطة
نصايح وأسرار خفية ازاي تختاري فستان الفرح صح ببساطة
خدعة الـ bra
مهما كان ستايل فستانك لازم تفكري في انك تنفذي خدعة الـ bra، لأنه على الرغم من أهمية الفستان الا ان حشوات الفستان او الملابس الداخلية اللي هتلبسيها تحته بأهمية الفستان ويمكن أكتر كمانن وطبعا الـ bra هي أهم حاجة في الموضوع كله لأنها هتأثر على شكل الفستان وكمان ممكن تفضل تبان أو تتحرك مع حركتك طول اليوم وده هيبقى حاجة تضايقك وطبعا شكلها مش لطيف، عشان كده حاولي تطلبي من الأتيليه انه يدخلك الـ bra في الفستان من جوه أو بمعنى اوضح انه يكون الفستان بـ bra داخلية متثبته فيه، الحركة دي رغم بساطتها هتوفر عليكي تعب وقلق كتير وكمن هتريحك جدا.
المكواة بالبخار
اسألي الأتيليه اللي هتشتري منه فستانك لو كان بيقدم خدمة الغسيل الجاف والمكواة بالبخار لفستان فرحك، الخطوة دي رغم انها بسيطة لكنها هتساعدك بشكل كبير جدا عشان هتوفر عليكي انك تشيلي الفستان على ايدك وتدوري على دراي كلين ويسة ينضفه ويكويه.
خليكي جاهزة لاختيارات تانية
ودي تعتبر أهم نصيحة من نصايح ازاي تختاري فستان الفرح صح هي انك تبقي عندك استعداد تجربي وتتقبلي اختيارات تانية للفساتين غير اللي في خيالك، كل بنت فينا طبعا بتبقى متخيلة نفسها من صغرها في فستان معين لكن وقت التجربة حاجات كتير ممكن تتحكم في اختياراتك وتخليكي مضطرة تجربي حاجات تانية، ومش معنى انك تجربي حاجات تانية انها تكون أسوأ بالعكس ممكن تطلع احلى كتير من اللي في خيالك، المهم انك ماتضايقيش وتستمتعي بالتجربة.
فكري في حركتك بالفستان
لو مخططة انك تعملي فوتوسيشن بوضعيات كتيرة وصور عددها كبير وانك تقضي طول الفرح رقص يبقى لازم تفكري في حركتك في الفستان، وبالتالي لازم تختاري فستان خفيف يتناسب مع حركتك، مش بس الحركة والرقص لكن كمان مساحة القاعة او المكان اللي هتعملي فيه الفرح، يعني ماينفعش تعملي فرحك في قاعة صغيرة وتلبسي معاه فستان بديل كبير وطرحة طويلة مثلا. في الحالة دي فكري في فستان بنفشة بسيطة من غير جيبونة وطرحة قصيرة، مهم اوي تفكري في حركتك وفي المساحة.
استعدي
شكل الفستان واللوك النهائي بيتغير بنسبة كبيرة بالمكياج والشعر والطرحة، عشان كده حاولي لما تيجي تجربي فساتين مختلفة تبقى عاملة مكياج ولو خفيف وتكوني عاملة شعرك، ولو كنتي محجبة يبقى حاولى تلبسي طرحة بيضا في اليوم ده من خامة ناعمة مع مكياج مناسب عشان تشوفي صورة قريبة ولو بنسبة بسيطة لشكل الفستان عليكي.
اعرفي كمان 6 حاجات عن ضغط ترتيبات الفرح لازم تعرفيها وتتجنبيهم
