طريقة عمل الباستا بصوص البيستو مع الفراخ
الباستا او المكرونة من الاكلات اللذيذة جدا والسريعة واللي كلنا تقريبا بنحبها, والميزة انها ليها طرق كتير جدا يعني نقدر ننوع ونغير في طعمها زي ما احنا عايزين, والنهاردة معانا واحدة من اطباق المكرونة اللذيذة والسهلة وهي الباستا بصوص البيستو مع الفراخ.
الباستا بصوص البيستو مع الفراخ:
المكونات:
– كيس مكرونة اي شكل تفضليه “حوالي 400 جرام”.
– 1 معلقة كبيرة زيت زيتون.
– ½ بصلة مفرومة.
– 4 فصوص ثوم مفرومين.
– 2 صدور دجاج متقطعة شرايح رفيعة.
– 1 كوب كريمة طبخ.
– ¼ كوباية جبنة بارميزان مبشورة.
– ¼ كوباية بيستو صوص.
– ½ معلقة صغيرة ملح.
– ¼ معلقة صغيرة فلفل اسود او حسب الرغبة.
– 1 كوب بروكلي طازة او مجمد.
طريقة التحضير:
1- ابدأي في سلق المكرونة بالطريقة العادية, وضيفي لها البروكلي قبل ما ترفعيها من على النار بدقيقة واحدة, سيبيه دقيقة مع المكرونة وبعدين ارفعيها من على النار وصفيها.
2- في طاسة او حلة كبيرة سخني الزيت, ضيفي له البصل وقلبيه في الزيت لمدة من 3 – 4 دقايق او لحد ما يبقى لونه دهبي, ضيفي الثوم وقلبيه مع البصل لمدة ثواني وبعدين ضيفي الفراخ, والملح والفلفل, قلبي كل المكونات مع بعض وسيبي الفراخ لمدة من 5 – 7 دقايق او لحد ما يبقى لونها دهبي.
3- ضيفي للفراخ الجبنة البارميزان, والكريمة, وصوص البيستو, والملح والفلفل, سيبيهم مع بعض لمدة من 2 – 3 دقايق, وبعدين ضيفي لهم المكرونة المسلوقة والبروكلي, قلبي كل المكونات مع بعض كويس, وسيبيهم من 2 – 3 دقايق كمان, وبعدين ارفعي المكرونة من على النار, رشي على وشها جبنة بارميزان مبشورة وقدميها.
طريقة عمل صوص البيستو:
المكونات:
– 1 كوب من اوراق الريحان الطازة.
– 3 فصوص ثوم.
– 3 معالق كبيرة صنوبر.
– ¼ كوباية جبنة بارميزان مبشورة.
– ملح.
– فلفل.
– 1/3 كوباية زيت زيتون.
طريقة التحضير:
1- اخلطي الريحان, والثوم, والصنوبر, والبارميزان, واضربيهم مع بعض في الخلاط, ضيفي الملح والفلفل حسب الرغبة, وبعدين ضيفي زيت الزيتون واضربيهم مع بعض تاني على سرعة بطيئة لحد ما الخليط يبقى معجون ناعم.
2- وكده يبقى صوص البيستو جاهز للاستخدام ضيفيه للمكرونة, وتقدري تحفظيه في برطمان محكم الغلق في التلاجة ممكن يقعد معاكي لمدة اسبوع.
