5 حاجات هتحصل لجسمك لو بتاكلي ملح كتير

الملح من المكونات اللي بتدي طعم لاي اكل, لكن اكل كمية زيادة منه ممكن تسبب مشاكل صحية خطيرة, والنهاردة من خلال موضوعنا هنعرف مع بعض الاضرار الصحية للملح, وايه اللي ممكن يحصل للجسم لو اكلتي منه كمية زيادة, وازاي تقللي من استهلاك الملح.

الجمعية الامريكية للقلب بتوصي باكل ما بين 1500 – 2400 ملليجرام من الملح يوميا, مع ذلك معظم الاشخاص بيستهلكوا اكتر من الكمية دي بكتير بشكل يومي ومعظمها بيجي تقريبا من الاطعمة المصنعة, وده بيزود من حدوث مشاكل صحية, لان الاطعمة المصنعة بتحتوي على عناصر غذائية قليلة جدا, وسعرات حرارية عالية, وكمية من الملح.

وفي دراسة اتعملت عن مخاطر النظم الغذائية عالية الصوديوم, اثبتت ان حوالي 1.65 مليون حالة وفاة في جميع انحاء العالم نرتبطة بارتفاع استهلاك الملح سنويا, وان 10% من الوفيات المرتبطة بامراض القلب ناتجة عن استهلاك كمية كبيرة من الصوديوم او الملح, وباقي النسبة من الناس بيتعرضوا لمشاكل صحية.

دلوقتي هنعرف مع بعض ايه اللي ممكن يحصل لجسمك لو بتستهلكي ملح كتير, وازاي تقللي منه.

الاضرار الصحية للملح:

1- هتبدأي تعاني من مشاكل في الكلى:

النظام الغذائي العالي الصوديوم هيزود من خطر الاصابة بحصوات الكلى, لانه بيزود من كمية الكالسيوم في البول, واللي يعتبر عامل رئيسي في تكوين الحصوات, لما الجسم بيدخل له كمية ملح زيادة, الجسم بيحتفظ بمية اكتر عشان يخفف من الصوديوم, وفي الحالة دي الجسم بيزيل السوائل الزيادة عن طريق تصفية الدم من خلال الكلى لسحب المية من دمك, ولما يكون الملح كتير الكلى هتزيل كمية مية اقل, وبالتالي هيزيد ضغط الدم, وهيسبب الفشل الكلوي, لانه مع ارتفاع ضغط الدم عشان يستوعب الملح الزيادة, هيعمل ضغط كبير جدا على الشرايين المؤدية للكليتين.

2- الملح هيزود ضغط الدم:

زي ما قولنا الاشخاص اللي بيستهلكوا ملح كتير معرضين اكتر للاصابة بارتفاع ضغط الدم, وده بيحصل لان الملح بيخليكي تحتفظي بالمية, وده بيخلي دقات القلب اصعب, وده بيعمل ضغط كبير على اعضائك, واللي ممكن تأدي لامراض القلب, والسكتات الدماغية, والخرف, وامراض الاوعية الدموية, وغيرها من المشاكل الصحية الخطيرة.

3- هتحسي دايما بانتفاخ:

لما تستهلكي ملح كتير, زي ما قولنا الجسم بيحتفظ بالمية, ومعظم الاشخاص ممكن يفكروا ان الانتفاخ بيحصل في البطن بس, لكن الحقيقة ان الملح ممكن يسبب احتباس المية في كل انحاء الجسم, وممكن كمان تتطور لتورم في القدمين والايدين بسبب استهلاك الملح زيادة, واكيد ده مش هيحصل من يوم واحد, ولكن مع الوقت مع استهلاك ملح بكميات زيادة عن اللزوم في نظامك الغذائي, هيأدي اكيد للانتفاخ المزمن.

4- الملح ممكن يسبب ضعف الادراك:

اسباب كتير ممكن تسبب مشكلة ضعف الادراك, بما فيهم اكل الملح بكميات زيادة, وواحدة من الدراسات في علم الاعصاب اثبتت ان كبار السن اللي بيستهلكوا كميات كبيرة من الملح بيكون عندهم تدهور ادراكي اكتر من غيرهم, وضعف الادراك عادة هو علامة على الالتهاب, واللي ممكن يكون بسبب الملح الزيادة, كمان الاشخاص اللي بيستهلكوا كمية ملح كتير ومش بيشربوا مية كفاية ده ممكن يسبب الجفاف, اللي هيأدي في النهاية لاضطرابات في الادراك.

5- ممكن يأدي لهشاشة العظام:

الناس عادة مش بيفكروا ان ممكن اكل الملح الزيادة ممكن يأثر على العضم, لكن الجسم بيفقد الكالسيوم في البول, وكل ما زاد استهلاك الملح, زادت كمية الكالسيوم اللي الجسم بيفقدها, ولما يكون مافيش كمية كافية من الكالسيوم في الدم, ده ممكن يسبب هشاشة ولين العظام.

ازاي تقللي من استهلاك الملح:

– اتجنبي او على الاقل قللي جدا من الاطعمة المصنعة, لانها بتحتوي على نسبة عالية من الملح, وقيمة غذائية قليلة جدا.

– اتأكدي انك بتدخلي نسبة عالية من البوتاسيوم في نظامك الغذائي, لان البوتاسيوم عنده قدرة على مواجهة الملح الزيادة وخفض ضغط الدم, المفروض الجسم محتاج بوتاسيوم ما بين 3500 – 4700 ملليجرام يوميا, ومن الاطعمة الغنية البوتاسيوم الموز, البطاطا, السبانخ, الافوكادو, الطماطم.

– حضري وجباتك في البيت, وضيفي التوابل الخالية من الملح لاكلك.

– زودي من استهلاك الاطعمة الطازة زي الفواكة والخضروات واللحوم, وقللي من الاطعمة المعلبة اللي بيكون فيها كمية ملح زيادة, ولو بتشتري دايما اطعمة معلبة حاولي انك تشتري الانواع اللي بتكون خالية من الملح.

12 علامة تقولك انك بتاكلي سكر كتير