دايت البطاطا: ازاي البطاطا هتساعدك على خسارة الوزن في 3 ايام بس

بقلمريهام محمود فيتخسيس الوزن visibility202

البطاطا من الخضروات المغذية واللذيذة جدا, وتعتبر بديل صحي للبطاطس, وثبت علميا ان البطاطا ممكن انها تساعد على خسارة الوزن, وده اللي هنعرفه النهاردة مع بعض, وهنقول لكل بنات حوا ايه هو دايت البطاطا لخسارة الوزن وازاي تمشي عليه.

ايه هو دايت البطاطا؟

دايت البطاطا زي ما هو باين من اسمه, انك بتدخلي البطاطا في نظامك الغذائي, بالاضافة لاطعمة تانية بتساعد على حرق الدهون زي الزبادي, الخضروات, والاطعمة الغنية بالالياف.

امشي على النظام ده لمدة 3 ايام ورا, وفي اليوم التالت هتلاحظي فرق واضح جدا في وزنك وفقدان الوزن ممكن يوصل لحد 2 كيلو, ازاي ده هيحصل؟ تعالوا نعرف مع بعض.

دايت البطاطا لخسارة الوزن
دايت البطاطا لخسارة الوزن

ازاي البطاطا هتساعدك على خسارة الوزن:

– منخفضة في السعرات الحرارية:

البطاطا منخفضة في السعرات الحرارية, ثمرة البطاطا الواحدة “وزنها تقريبا 120 جرام” بتحتوي على 112 سعر حراري بس, وواحد من العوامل الرئيسية اللي بتأثر على فقدان الوزن هو الحفاظ على توازن الطاقة السلبي, بمعنى انك محتاجة لاستهلاك سعرات حرارية اقل وحرق اكتر, و 2 ثمرة من البطاطا حوالي 250 سعر حراري, هتساعدك انها تملى معدتك وتقلل من الشعور بالجوع.

– غنية بالالياف الغذائية:

البطاطا غنية بالالياف الغذائية, والالياف الغذائية بتساعد على انقاص الوزن, من خلال تشكيل حاجة بتشبه الجل في المعدة, وده بيخليكي تحسي بالشبع وبيمنع من الافراط في الاكل.

ده غير انه بيساعد على تغليف جزئيات الدهون ومنع امتصاص الدهون, وبيحسن عمل الجهاز الهضمي وعملية الاخراج, وبيساعد على انتاج البكتيريا الجيدة في الامعاء, وبالتالي اكل البطاطا الغنية بالالياف الغذائية بيحسن عملية التمثيل الغذائي والهضم والاخراج, وده هيأدي في النهاية لفقدان الوزن.

– غنية بالكربوهيدرات الجيدة:

مينفعش في اي نظام دايت اننا نتجاهل الكربوهيدرات تماما, لانها هي اللي بتوفر الطاقة اللي بنقدر بيها نعمل بيها مهام يومنا, وعشان تحرقي السعرات الحرارية اللي استهلكتيها لازم يكون عندك طاقة كفاية, انك تستخدمي السلم بدل الاسانسير, وتمارسي تمارين رياضية بانتظام, ولو جسمك مش موجود فيه كربوهيدرات كافية مش هيكون عندك طاقة تحافظي بيها على نشاطك وصحتك, وكوباية واحدة من البطاطا “328 جرام” من البطاطا المهروسة بتحتوي تقريبا على 58 جرام من الكربوهيدرات, منها 8.2 جرام من الالياف الغذائية “الكربوهيدرات المعقدة”.

– مؤشر نسبة السكر في الدم منخفض:

مؤشر نسبة السكر في الدم هو رقم بيتم اعطاءه للاكل بيعتمد على ارتفاع نسبة الجلوكوز اللي بيسببه للجسم بعد الوجبة الغذائية, فلو نوع اكل معين اتسبب في ارتفاع الجلوكوز في الدم, فده معناه انه بيحتوي على مؤشر نسبة السكر في الدم عالية, وده مؤشر ان استهلاك كمية كبيرة من نوع الاكل ده ممكن انها تسبب مرض السكر من النوع التاني ومقاومة الانسولين.

وعلى الرغم من البطاطا تعتبر حلوة, الا انها بتحتوي على نسبة منخفضة من نسبة السكر في الدم, ونسبة السكر في الدم في البطاطا المسلوقة حوالي من 44 – 61 , والبطاطا المخبوزة في الفرن حوالي 94, والبطاطا المشوية 82, وبالتالي تقدري تاكليها من غير اي قلق.

– ارتفاع محتوى المية:

المحتوى العالي من المية في البطاطا هي سبب تاني بيساعد على انقاص الوزن بشكل فعال جدا, لان الجفاف بيبطء من عملية التمثيل الغذائي, وبالتالي البطاطا بتساعد على ترطيب خلايا الجسم وبدء عملية التمثيل الغذائي.

وده هيمنع الجسم من تراكم الدهون, وهيحقق التوازن بين الرقم الهيدروجيني الداخلي, وطرد السموم من الجسم, بالاضافة ان الالياف اللي موجودة في البطاطا هتخليكي حاسه بالشبع لفترة طويلة.

– خاصية مضادة للاكسدة:

اللون البرتقاني او الارجواني اللي موجود في البطاطا ده مؤشر لوجود الكاروتينات او الانثوسيانين, والمواد دي تعتبر مضادة للاكسدة.

والبطاطا بتحتوي على مضادات اكسدة تانية زي ديسمتاز النحاس, الزنك, اكسيد الفوسفات, الكاتلاز, والسبورامين, والمواد المضادة للاكسدة دي بتحمي جسمك عن طريق منع جذور الاكسجين الضارة, وكل ما قل عدد جذور الاكسجين  في الجسم, انخفض مستوى الاجهاد او الالتهاب, وده بدوره بيساعد على فقدان الوزن.

دلوقتي بعد ما عرفنا ليه البطاطا مفيدة في انقاص الوزن, هنقولك خطة دايت لمدة 3 ايام عشان تبدأي فيها.

دايت البطاطا لخسارة الوزن
دايت البطاطا لخسارة الوزن

دايت البطاطا لخسارة الوزن:

امشي على دايت البطاطا لمدة 3 ايام ورا بعض, هيساعدك على التخلص من السموم من الجسم, وخسارة وزن المية, وتحسين عملية التمثيل الغذائي.

1- اليوم الاول:

وجبة الفطار: بيضة مسلوقة + 1 ثمرة بطاطا مسلوقة, كوباية شاي اخضر.

وجبة الغدا: 1 ثمرة بطاطا مسلوقة + 85 جرام سمك مشوي او فراخ مشوية + كوباية زبادي.

وجبة العشا: طبق شوربة بطاطا.

2- اليوم التاني:

وجبة الفطار: 1 ثمرة بطاطا مسلوقة + 2 بيضة اومليت بالبياض بس من غير الصفار + قهوة بلاك من غير سكر او لبن او شاي اخضر.

وجبة الغدا: 1 ثمرة بطاطا مسلوقة + بروكلي + 85 جرام سمك مشوي او فراخ مشوية.

وجبة العشا: سلطة بطاطا مسلوقة مع المشروم, والخضروات, واي نوع صوص سلطة خفيف + كوباية لبن رايب.

3- اليوم التالت:

وجبة الفطار: 1 ثمرة بطاطا مسلوقة + 4 حبات لوز + كوباية شاي اخضر + 1 ثمرة موز.

وجبة الغدا: 1 ثمرة بطاطا مسلوقة ومهروسة + بسلة وقرنبيط مسلوق + مشروم مشوي.

وجبة العشا: طبق شوربة بطاطا + 1 شريحة توست اسمر + كوباية زبادي.

باتباع دايت البطاطا لمدة 3 ايام, هيتم خلالهم تحسين عملية التمثيل الغذائي اللي هيساعدك على فقدان الوزن, ومهم جدا انك تعتمدي على الاكل المعمول في البيت وابعدي عن الاكلات الجاهزة والسريعة والمصنعة لتجنب السعرات الحرارية الزيادة.

دايت البطاطا لخسارة الوزن

وجبات صحية بالبطاطا:

1- وصفة البطاطا المهروسة:

المكونات

1 ثمرة بطاطا مسلوقة.

2 معلقة كبيرة كريمة طبخ.

1 معلقة كبيرة زيت زيتون.

½ معلقة صغيرة فلفل اسود.

ملح.

كزبرة خضرا للتزيين.

كام واحدة عين جمل للتزيين.

طريقة التحضير:

في طبق اهرسي ثمرة البطاطا بالشوكة, ضيفي لها الفلفل الاسود والملح, وكريمة الطبخ, وزيت الزيتون, قلبي كل المكونات مع بعض كويس, وزينيها بالكزبرة الخضرا وعين الجمل.

دايت البطاطا لخسارة الوزن

2- قارب البطاطا مع البيض:

المكونات:

1 ثمرة بطاطا مسلوقة متقطعة نصين.

2 بيضة.

1 ثمرة طماطم كبيرة متقطعة نصين.

1 معلقة صغيرة زيت زيتون.

½ معلقة صغيرة فلفل اسود.

بصل اخضر للتزيين.

طريقة التحضير:

فرغي الجزء اللي في النص من كل نص بطاطا, رشي جواهم زيت الزيتون والملح والفلفل, اكسري بيضة في كل نص, ورشي على وش البيض ملح وفلفل, حطيهم على صينية ودخليهم الفرن على درجة حرارة 400 درجة لمدة دقيقتين, او لحد ما البيض يستوي, زينيهم من فوق بالبصل الاخضر والطماطم.

3- البطاطا بالفلفل الحار:

المكونات:

1 ثمرة بطاطا مسلوقة ومتقطعة مكعبات.

¼ كوباية فاصوليا حمرا.

¼ كوباية حمص.

1 بصلة متوسطة متقطعة مكعبات.

2 ثمرة طماطم متوسطة متقطعة مكعبات.

فص ثوم مبشور.

2 معلقة كبيرة زيت زيتون.

1 معلقة صغيرة كمون بودر.

2 معلقة صغيرة كزبرة بودر.

½ معلقة صغيرة بابريكا.

½ معلقة صغيرة فلفل اسود.

½ معلقة صغيرة شطة.

ملح.

كزبرة خضرا للتزيين.

طريقة التحضير:

اسلقي الفاصوليا الحمرا والحمص, وسيبيهم على جنب, في حلة على النار حطي زيت الزيتون ولما يسخن ضيفي له البصل, وقلبيه لحد ما يطرى ويبقى لونه شفاف, وبعدين ضيفي له الثوم المبشور وقلبيهم مع بعض لمدة 20 ثانية, ضيفي الطماطم وسيبيهم مع بعض لمدة دقيقة, ضيفي الملح والكمون والكزبرة الناشفة والبابريكا والفلفل الاسود, قلبيهم مع بعض وسيبيهم لمدة دقيقة, ضيفي شوية مية صغيرين وسيبيهم يغلوا لمدة دقيقة كمان, ضيفي الفاصوليا والحمص المسلوقين, قلبي وسيبي الخليط لمدة من 3 – 4 دقايق, بعدها ضيفي البطاطا المسلوقة المتقطعة, غطي الحلة وسيبيهم يطبخوا مع بعض لمدة 10 دقايق, وكده تبقى الاكلة جاهزة, قدميها وزينيها بالكزبرة الخضرا.

4- شوربة البطاطا:

المكونات:

1 معلقة كبيرة زيت زيتون.

1 بصلة مفرومة.

2 جزرة كبيرة متقشرة ومفرومة.

4 سم “1 1/2 بوصة” زنجبيل طازة مفروم ناعم.

1 فص ثوم مهروس ومفروم.

1/2 معلقة صغيرة شطة.

700 جرام بطاطا متقشرة ومتقطعة مكعبات.

لتر “حوالي 5 كوبايات” شوربة خضروات.

فلفل اسود.

ملح.

طريقة التحضير:

في حلة حطي الزيت وسخنية على نار متوسطة, ضيفي له البصل والجزر, وقلبيهم مع بعض وسيبيهم لحد ما يطروا, بعدها ضيفي الزنجبيل والثوم والشطة والفلفل والملح وقلبيهم مع بعض لمدة من 2 – 3 دقايق, ضيفي البطاطا والشوربة وقلبيهم مع بعض وسيبي الخليط لحد ما يغلي وبعدين قللي الحرارة عليهم, وسيبي البطاطا تستوي على نار هادية لمدة 15 دقيقة لو لحد ما البطاطا تستوي كويس.

ارفعي البطاطا من على النار واضربيها في الخلاط, لحد ما تبقى ناعمة خالص, وكده الشوربة تبقى جاهزة للاكل.

فوايد صحية تانية للبطاطا:

– مفيدة للنظر والبشرة:

البطاطا هي مصدر غني لفيتامين A في شكل البيتاكاروتين, والفيتامين ده مهم جدا لصحة العضم, والنظر, والجلد.

– بتقوي المناعة:

فيتامين C من العناصر اللي بتساعد على تقوية المناعة الطبيعية, وكل 100 جرام من البطاطا فيهم حوالي 2.4 ملليجرام من فيتامين C, اللي يعتبر مضاد للاكسدة اللي بيمنع الجذور الحرة الضارة وبالتالي بيقوي المناعة.

– مضادة للسكر والسرطان:

زي ما قولنا البطاطا غنية بمضادات الاكسدة اللي بتمنع الجذور الحرة, وده بدوره بيمنع نمو الخلايا السرطانية وانتشارها, وكمان مفيدة جدا للاشخاص اللي بيعانوا من مرض السكر من النوع التاني لانها بتتحكم في مستويات السكر في الدم.

في النهاية البطاطا تعتبر من مصادر التغذية الممتازة جدا, اللي ممكن تساعدك على خسارة الوزن عن طريق حمية البطاطا اللي احنا قولناها, اتأكدي بس انك بتحضريها بالطريقة الصح, بالاضافة انك تاكلي معاها اكلات صحية, وتمارسي الرياضة بانتظام, ياللا جربوا دايت البطاطا واتخلصوا من الوزن الزيادة من غير شعور الحرمان من الاكل ومتنسوش تشاركونا تجاربكم.

الحمية البرية: افضل حمية لحرق الدهون وخسارة 10 كيلو في 40 يوم

الحمية البرية لخسارة الوزن