طريقة عمل البايلا الاسبانية بالسي فود بالخطوات

البايلا من الاكلات الاسبانية المعروفة واللذيذة جدا وبتتعمل بأكتر من طريقة, الطريقة الاساسية بتاعتها هي بتكون بالسي فود, وفي طريقة تانية ليها ممكن تتعمل بالفراخ, والطريقة اللي معانا النهاردة هي طريقة البايلا بالسي فود.

طريقة البايلا بالسي فود:

المكونات:

– 1 بصلة كبيرة متقطعة.

– 5 معالق كبيرة زيت زيتون.

– 2 فص ثوم مفروم.

– 2 ثمرة طماطم من غير قشرة ومتقطعة.

– ملح.

– 1 معلقة صغيرة بابريكا.

– شوية زعفران.

– 4 قطع سبيط متنضف ومتقطع حلقات.

– 2 كوباية ارز ابيض.

– 3 كوبايات شوربة سمك او شوربة فراخ “وممكن تزودي حسب الحاجة”.

– 12 واحدة جمبري جامبو متقشر, وممكن جمبري صغير وتزودي الكمية.

– 12 واحدة بلح البحر او محار متنضف, ومسلوق ومتفتح.

طريقة البايلا بالسي فود
طريقة البايلا بالسي فود

طريقة التحضير:

1- في طاسة كبيرة على النار حطي الزيت وضيفي له البصل وقلبيه لحد ما يطرى, ضيفي الثوم, وقبل ما يبدأ لونه يتغير ضيفي لهم الطماطم المتقطعة, والملح حسب الرغبة, والبابريكا, والزعفران وقلبي كل المكونات مع بعض, وسيبيهم على النار لحد ما الطماطم تتسبك, ضيفي السبيط, وقلبيه لمدة دقيقة في الصلصة, وبعدين ضيفي الارز وقلبيهم كلهم مع بعض كويس لحد ما الارز كله يتغلف بالخليط كويس.

2- ضيفي الشوربة تكون سخنة لخليط الارز والصلصة وزودي الملح حسب الرغبة, قلبي الارز ووزعيه في الطاسة بالتساوي “ومتقلبيهوش تاني طول ما هو على النار”, غطيه وسيبيه على نار خفيفة لمدة من 18 – 20 دقيقة, مع تحريك الطاسة نفسها كل شوية وتدويرها وهزها عشان الارز يتطبخ بالتساوي, حطي الجمبري على وش الارز من فوق وغطيه وسيبيه 10 دقايق لحد ما يبقى لونه وردي اقلبيه على الجنب التاني, ولو الارز شرب الشوربة وحاسه انه لسه ناشف ممكن تضيفي له شوية شوربة سخنة تاني لحد ما يستوي, ارفعيه من على النار وغطيه بفويل وسيبيه لحد ما يهدى خالص.

طريقة البايلا بالسي فود

3- اسلقي بلح البحر في شوية مية صغيرين لحد ما يتفتح, وبمجرد ما يتفتح معاكي هيبقى كده استوى, واللي ميتفتحش منه ارميه لان ده بيبقى مش حلو.

4- رصي بلح البحر على وش البايلا اللي احنا حضرناها, وكده يبقى طبق البايلا بتاعنا جاهز.

طريقة عمل السمك السلمون في الفرن ومقلي

طريقة عمل السمك السلمون