عادات يومية سيئة ممكن يدمروا جمالك وصحتك
في عادات يومية ممكن تكوني بتعمليها بشكل يومي عادي جدا ومش عارفة انها ممكن تكون مضره وتأثر بشكل سلبي على جمالك وصحتك, والنهاردة من خلال موضوعنا هنقولك عادات يومية سيئة ممكن تأثر على جمالك وصحتك عشان تتجنبيها.
عادات يومية سيئة:
1- بتحطي مانيكير طول الوقت:
لو بتحطي مانيكير طول الوقت, يبقى لازم تعرفي ان ده ممكن يسببلك مشاكل على ضوافرك, زي البقع الغامقة وخصوصا من الماركات الرخيصة او اللي مش معروفة اوي, لان بيكون فيها صبغات قوية ممكن انها تسبب بقع على ضوافرك.
ونتيجة لده ضوافرك هتبدأ يبقى لونها اصفر على طول وفيها بقع, وعشان تتفادي ده حاولي انك تقللي من وضع المانيكير باستمرار, او انك تعتمدي على ماركات مانيكير افضل بمكونات عالية الجودة.
2- بتستخدمي الفوطة لتجفيف وشك:
طبيعي ان معظمنا بيستخدم الفوطة لتجفيف الوش بعد الغسيل, لكن ضد ممكن يأثر بشكل سلبي على البشرة, لان الفوطة تعتبر ارض خصبة لتكاثر البكتيريا والميكروبات, وفي كل مرة بتستخدمي فيها الفوطة بتزودي فرص ظهور حب الشباب على بشرتك.
بدل كده, ممكن تستخدمي وسادات او مناديل قطنية لتجفيف الوش, او ممكن تتخطي التجفيف زي روتين النساء الكوريات, بس تغسلي وشك وهو لسه رطب بالمية تحطي عليه منتجات العناية بالبشرة, الطريقة دي هتدي ترطيب افضل لبشرتك.
3- النوم بحمالة الصدر:
معظمنا اكيد طول الوقت بيبقى لابس حمالة الصدر بشكل يومي, لكن لبسها اثناء النوم ممكن يكون مضر, ممكن تسبب تهيج للبشرة, وتعمل ضغط على انسجة الصدر طول الليل, وده ممكن يضرك ويسببلك الم.
ومهم جدا كمان انك تلبسي حمالة الصدر بالمقاس المناسب عليكي بالظبط يعني متكونش كبيرة اوي ولا ضيقة اوي, ولو عايزة تلبسي حمالة اثناء النوم ومش بتعرفي تنامي من غيرها البسي النوع ال Bralette الناعمة.
4- بتستخدمي فرش مكياج مش نضيفة:
تنضيف فرش المكياج يمكن تكون من الحاجات اللي مش بنهتم بيها اوي او بنهملها, لكن لازم تنضيف الفرش يكون من عاداتك, لان الفرش اللي مش نضيفة بيتكون عليها بكتيريا وجراثيم, هتفضلي تنقليها لبشرتك كل مرة تستخدميها فيها, وكمان هتنقليها لمستحضرات التجميل بتاعتك, وده هيسبب تهيج وضرر للبشرة.
5- بتاكلي اكتر من معلقة صغيرة من الملح كل يوم:
اكيد كلنا اتعودنا ناكل اكلنا كله بملح ويمكن زيادة كمان, ده غير ان الملح بيدخل في منتجات كتير بناكلها زي الجبن, والسجق, والاطعمة الجاهزة للطهي.
تقليل الملح ممكن انه يساعد على خفض ضغط الدم, والباحثين اثبتوا ان النساء اللي عندهم ضغط الدم منخفض بيكون عندهم ترهلات اقل في الجلد, يعني تقليل الملح هيحافظ على بشرتك مشدودة ومن غير تجاعيد.
الطبيعي ان الشخص بيحتاج 2300 ملليجرام ملح يوميا, يعني ما يعادل تقريبا معلقة واحدة صغيرة.
6- تنضيف الحواجب بشكل مبالغ فيه:
الحواجب بتعمل اطار للوش وبتحدد شكله, عشان كده لازم تكوني حذره من عدد المرات اللي بتشيلي فيها الشعر الزيادة لانه هيطلع في كل مرة ارق واخف.
وفي النهاية ممكن بعض الشعر في الحواجب ميطلعش مرة تانية اصلا لو بتشيليه بشكل مكثف او عدد مرات كتير زيادة عن اللزوم على المدى الطويل.
7- بتسيبي مكنة الحلاقة في الحمام:
هيكون طبيعي بالنسبة لنا اننا نسيب ادوات الحلاقة في الحمام, في المكان اللي احنا بنستخدمها فيه في الغالب, لكن ده غلط, لو انتي عايزة تستفيدي من المكنة بشكل افضل يبقى متسيبهاش في مكان رطب, لان ده هيخلي الشفرة بتاعتها تبوظ اسرع ولما تيجي تستخدميها مرة تانية هتبقي معرضة اكتر لنمو الشعر تحت الجلد, وتهيج البشرة, وبدل كده بعد استخدامها لازم تنشفيها كويس وتخزنيها بره الحمام.
8- بتقعدي حاطه رجل على رجل:
ولان معظمنا تقريبا بيقضي وقت كبير في القعدة, فمهم جدا اننا نقعد بشكل صح, وعلى الرغم من وضع رجل على رجل ممكن تكون قعدة مريحة, لكن بتضر الدورة الدموية في الساقين.
بالاضافة كمان للبس ملابس ضيقة زي السكيني جينز او الليجينج, كمان هتعرضك لنفس الخطر وتخلي الدورة الدموية في الساقين متمشيش بشكل سليم, وهتزود ضغط الدم في المناطق دي.
9- بتحطي مزيل عرق بعد الحلاقة:
زي ما هو معروف ان معظم مزيلات العرق بتحتوي على مواد كيميائية قوية مضرة, وبعد الحلاقة مسام البشرة بتتفتح بشكل اكبر, وبتبقى معرضة لامتصاص المنتجات بشكل اكبر.
عشان كده بعد الحلاقة الافضل تجنب وضع اي حاجة غير اللوشن او مزيل عرق طبيعي تحت الابطين لتجنب التهيج والطفح الجلدي.
10- رفع الشعر اثناء النوم:
اكيد صاحبات الشعر الطويل بشكل خاص بيفضلوا رفع الشعر اثناء النوم, لكن للاسف رفع الشعر ممكن يسبب ضغط على فروة الراس ويضعف شعرك, وده هيأدي بدوره لتساقط الشعر, عشان كده الافضل ياما تلميه بطريقة متكونش محكمة او مشدودة اوي انك تسيبيه من غير ما تلميه, والصبح تستخدمي فرشة لفك تشابك الشعر.
11- الشاور السخن:
بعد يوم طويل معظمنا بيحب ياخد شاور سخن عشان يسترخي ويضيع تعب اليوم, لكن الافضل ان الشاور يكون بمية باردة مش سخنة لان المية السخنة مع استمرار استخدامها ممكن تسبب جفاف البشرة والشعر اسرع من المية الباردة او الفاترة, ولو مش بتقدري تستغني عن الشاور السخن, حاولي انك تنهيه بمية باردة او فاترة عشان تقفلي المسام.
12- شرب الصودا الدايت والقهوة:
فكرة انك تشربي صودا خالية من السكر عشان متخيلة انها صحية اكتر, فكرة غلط لان الصودا الدايت بتكون اسوأ من العادية او الاصلية بسبب حموضة الصودا الغذائية اللي موجودة فيها , وده ممكن يدمر اسنانك على الرغم من نقص السكر فيها, وكمان تم ربطها بأمراض القلب والسكر وامراض الكلى المزمنة.
فلو عايزة تحافظي على صحتك واسنانك, الافضل تعتمدي على المشروبات زي المية المنكهة او الشاي, والافضل كمان تجنب القهوة لانها بتسبب اصفرار الاسنان مع الوقت.
13- ضخ عصاية الماسكارا جوه الانبوبة:
الحركة اللي بيعملها معظم البنات تقريبا وهي انك تدخلي وتطلعي عصاية الماسكارا جوه الانبوبة, الحركة دي غلط جدا لانها بتدخل الهوا في الماسكارا وبيخليها تتلوث بالبكتيريا.
وبالتالي كمان انتي بتعرضي عينيكي للاصابة, بدل حركة الضخ دي, حاولي تحركي العصاية يمين وشمال ببطء جوه الانبوبة, عشان تقللي دخول الهوا جواها.
14- استخدام شرايط تبييض الاسنان:
في طرق منزلية كتير نقدر بيها نبيض اسنانا, ومنها شرايط تبييض الاسنان اللي بتتباع في الصيدلية, مع استخدامها بشكل مستمر ممكن تسبب ضعف مينا الاسنان, عشان كده الافضل انك تبيضي اسنانك عند دكتور متخصص يمكن التكلفة هتكون اعلى ولكن هيكون اامن وهتحافظي على صحة اسنانك.
15- بتسرحي شعرك وهو مبلول:
من الطبيعي انك تفكي تشابك شعرك بعد غسله, لكن المرة الجاية حاولي تستني لما شعرك ينشف شوية وبعدين سرحيه, لان بعد غسل الشعر على طول مسام فروة الراس بتكون مفتوحة, وده معناه ان شد الشعر اثناء التسريح ممكن يتلفه.
عشان تحلي المشكلة دي ياما تخلي اخر شطفه للشعر بمية باردة عشان تقفلي المسام, او تجففي شعرك بالسيشوار بالهوا البارد قبل ما تسرحيه.
16- بتنسي تغيري كيس المخدة:
لو دايما بتعاني من مشاكل جلدية من غير سبب, ممكن تكون الاجابة بكل بساطة هي كيس المخدة بتاع السرير, حاولي تغيري الكيس كل يومين او تلاتة عشان تضمني ان مافيش اي عرق او زيوت او غيره من البكتيريا هتتنقل لبشرتك وتضرها.
وللاشخاص اللي بشرتهم معرضة لحب الشباب بشكل خاص, بننصحهم بتغيير كيس المخدة بشكل يومي.
17- بتستخدمي الحرارة زيادة عن اللزوم:
استخدام الحرارة بشكل يومي سواء السيشوار او المكوى او الكيرلر, على المدى الطويل هيسبب تلف وجفاف الشعر وانقسام الاطراف.
لو انتي مش هتقدري تستغني عن الحرارة, ضروري انك تستخدمي حامي من الحرارة, والافضل انك من فترة للتانية تريحي شعرك خالص من الحرارة وتسيبيه على طبيعته.
– بتبصي لتحت اثناء استخدام التليفون:
اكيد التليفون بقى حاجة اساسية في يومنا كلنا وطول اليوم ماسكينة وباصين فيه, لكن المهم هو انتي ازاي بتستخدميه, لو انتي من الاشخاص اللي دايما بتشيلي التليفون قريب من منطقة الصدر وبتبقي باصه لتحت اثناء استخدامه, بنقولك ان ده وضع غلط وممكن يسببلك ضغط على الرقبة ويأدي لمشاكل صحية.
عشان كده بننصحك ان مستوى التليفون يكون نفس مستوي العين عشان تتجنبي اي مشاكل ممكن تحصل.
يا ترى اي عادة من العادات السيئة دي بتعملوها يوميا ومكنتوش تعرفوا انها مضره؟ شاركونا تجاربكم.
