7 طرق سهلة تخسري بيهم وزن بسرعة ومن غير مجهود
اوقات كتير ممكن نكسل اننا ننتظم على الانظمة الغذائية, او ممكن نمشي عليها شوية ونزهق منها بسرعة, عشان كده احنا النهاردة جايبين لكل بنات حوا 7 طرق لخسارة الوزن بسرعة, وهي تعتبر اسهل الطرق اللي ممكن تمشي عليها وتخسي من غير نظام غذائي محدد.
طرق لخسارة الوزن بسرعة:
1- اتجنبي استهلاك الاطعمة والمشروبات الغنية بالسكر:
مش ضروري انك تمنعيها بالكامل, ولكن كلي منها كميات بسيطة جدا, لان السكر لما بيتخزن في الجسم بيتحول لدهون, عشان كده ضروري انك تقللي من الاطعمة والمشروبات الغنية بالسكر.
والسكريات عادة ممكن تكون مغرية ومش بنقدر نمنع نفسنا عنها, لكن افتكري انها مش بس هتسبب زيادة الوزن, لكن كمان بتزود الفرص في الاصابة بمرض السكر.
وزي ما استهلاك الاطعمة والمشروبات السكرية ضروري, استهلاك الفاكهة ضروري لان السكريات فيها بتكو عضوية او طبيعية اكتر وفي نفس الوقت بتوفر المواد الغذائية اللي محتاجها الجسم.
يعني لو عايزة تخسري وزنك بسرعة وبسهولة, كل اللي هتعمليه بس انك تقللي من كميات السكريات في يومك وتستهلكي منها كميات صغيرة.
2- ممارسة الرياضة بشكل روتيني وتنشيط وتحريك الجسم:
الاعتماد على اكل صحي او متوازن مش هيعمل حاجة لوحده, لو انتي مش بتمارسي رياضة, وخصوصا لو عايزة تفقدي وزن في وقت قصير, في الحالة دي محتاجة انك تبقي نشيطة وتحركي جسمك باستمرار, وفي تمارين كتير مش صعبة تقدري تمارسيها لخسارة الوزن زي اليوجا, ال Sit up, Push up.
واليوجا بشكل خاص هي تمرين بيركز على مرونة وقوة الجسم وتقنية التنفس, وفي دراسة اثبتت ان اليوجا بتساعد الجهاز الهضمي يشتغل بشكل مثالي, وبيساعد على تقليل كمية الدهون المخزنة في الجسم.
بالاضافة لليوجا, واحد كمان من ابسط التمارين اللي ممكن تعمليها هو المشي, ولكن الافضل المشي السريع لمدة 30 دقيقة تقريبا, وتمشي لحد ما تحسي انك نفسك علي او عملتي مجهود دي علامة بتوضح فعالية المشي على صحتك.
وممكن يكون تمرين المشي بسيط جدا لكن بيساعد على حرق السعرات الحرارية, وبيساعد على تنشيط الدورة الدموية وان الدم يتدفق بسهولة.
هيكون كويس جدا لصحتك بشكل عام انك تدخلي المشي في روتينك اليومي, وتمارسيه لمدة 30 دقيقة كحد ادنى, وفي الحالة دي مش هتبقي محتاجة تمارسي تمارين تانية بشكل يومي, هتبقي محتاجة على الاقل يومين في الاسبوع.
3- دخلي التفاح في نظامك الغذائي:
في مقولة مشهورة جدا بتقول “تفاحة واحدة في اليوم هتبعدك عن الدكتور”, التفاح من انواع الفواكة المغذية جدا, التفاح بيحتوي على اقل من 200 سعر حراري مع نسبة عالية من البروتين والالياف, وده بيساعد انها تملى معدتك لفترة طويلة حتى لو اكلتي تفاحة واحدة بس.
التفاح كمان بيحافظ على نشاط الجسم, لانه بيحافظ على مستويات السكر في الدم, وبينصح باكل تفاحتين في اليوم على الاقل لو امكن.
4- اشربي مية كتير:
المية كمان بتساعد على خسارة الوزن, عشان كده لازم نحافظ على الجسم رطب ونشرب كمية مية كفاية يوميا, المية هتخليكي تقطعي شوط طويل في خسارة الوزن, وهتملى معدتك ومش هتخليكي تاكلي كتير.. شوفي من هنا طريقة هتساعدك على خسارة 4 كيلو في 10 ايام بشرب المية بس.
5- اتجنبي انك تاكلي بعد الساعة 6 او 7 بالليل:
فقدان الوزن مش معناه انك تقللي الاكل بشكل عام, ولكن التوقيت هو المهم, يعني المفروض انك تاكلي كمية اكل كويسة جدا في وجبة الفطار لان دي الوجبة اللي هتدي جسمك النشاط لباقي اليوم, وكلي كمية قليلة في وجبة العشا.
الافضل انك متاكليش وجبة العشا في وقت متأخر او قبل النوم على طول, لان ده بيبطأ من عملية التمثيل الغذائي, وبيسبب زيادة في الوزن.
بينصح انك تاكلي في وجبة العشا كمية اكل اقل عشان تسمحي للجسم انه يهضم اللي كلتيه بشكل اسرع, مع عملية التمثيل الغذائي السريع والهضم السريع, ده هيمنع الجسم من تخزين الدهون زيادة الوزن.
اهم حاجة تاخدي بالك من كمية الاكل اللي هتاكليها في وجبة العشا.
6- الصيام:
الصيام مفيد للجهاز الهضمي, ووسيلة فعالة لحرق السعرات الحرارية, ويعتبر وسيلة للحفاظ على الطاقة, وبيساعد على فقدان الوزن, ولو عايزة تجربي طريقة الصيام تقدري تصومي لمدة توصل ل 16 ساعة, واحنا اتكلمنا قبل كده عن طريقة الصيام المتقطع بالتفصيل وازاي ممكن تساعدك على خسارة الوزن.
7- نامي كويس:
النوم كويس وعدد ساعات كافية ده اكيد مهم جدا, لان الجسم بيحتاج وقت عشان يجدد نشاطه, النوم كويس لازم يكون جنب نظام غذائي صحي وممارسة الرياضة, لان قلة النوم ممكن تسبب التوتر والجوع ويخليكي عايزة تاكلي اكتر, ولو انتي عايزة تخسري وزن اكيد ده مش هيفيدك.
والدراسات كمان بتوضح ان النوم في درجات حرارة باردة هيساعد على تسريع عملية التمثيل الغذائي, والتخلص من الوزن الزيادة, والدراسة اظهرت ان الاشخاص اللي بيناموا في درجات حرارة باردة عندهم زيادة في الدهون البنية, اللي بتساعد على حرق السعرات الحرارية عشان تنتج حرارة للجسم.
دي تعتبر ابسط واسهل الطرق اللي ممكن تساعدك على خسارة الوزن بسرعة في وقت قياسي ومن غير مجهود او نظام غذائي محدد, انتظمي على الخطوات والنصايح دي وخليها في روتينك اليومي هتخسري وزن في اسرع وقت.
