5 حاجات لو بتحصل في الرسايل بينكم يبقى هو مهتم بيكي
أوقات كتير بنبقى مهتمين بشخص معين او بيكون الشخص ده مهتم بينا واحنا مش شايفين ده ولا واخدين بالنا منه، عشان كده أحيانا بيكون في علامات معينة بتساعدك تفهمي طبيعة تصرفات الشخص ده حواليكي وانه مهتم بيكي ولا لاء خصوصا لو كان معظم كلامكم رسايل وشات ومابتتقابلوش كتير، في المقال ده هنقولك على 5 حاجات لو بتحصل في الرسايل بينكم يبقى هو مهتم بيكي
5 حاجات لو بتحصل في الرسايل بينكم يبقى هو مهتم بيكي
بيبعتلك كتير وطول الوقت
لو لاحظتي انه بيبعتلك رسايل كتيرة بسبب و من غير سبب طول الوقت يبقى دي علامه مهمة انه مهتم بيكي، لانها دليل على انك في باله وانه فاكرك طول الوقت وانها فترة قليلة ومكن يطلب يخرج معاكي عشان يقدر يعرفك اكتر وتقضوا وقت سوا، فلو الكراش بتاعك بيبعتلك رسايل باستمرار ده معناه انه بيحب يتكلم معاكي، فأكيد هيحب اكتر انكم تتكلموا وانتوا قاعدين face to face.
بيستخدم علامات التعجب كتير!
على الرغم من انك ممكن تكوني بتحاولي تبقى هادية وماتبانيش مهتمة او انك ملهوفة عشان تتكلمي معاه، الولاد أحيانا مابيقدروش يداروا مشاعرهم بشطارة زينا. وغالبا حماستهم دي بتبان في طريقة كتابتهم عشان كده لو لاحظتي انه بيستخدم في كلامه معاكي علامات تعجب او علامات استفهام كتير ده معناه انه متحمس ليكي وللموضوع اللي انتوا بتتكلموا فيه.
مهتم بكلامك ومركز فيه
لو الكراش كمان بيفتكر كلامك وبيحاول يتفاعل معاكي في المواضيع اللي بتتكلمي فها وبيبان مهتم ومركز، فدي واحدة من اهم العلامات اللي لازم تاخدي بالك منها لان ده معناه انه مش بس مهتم بشكلك الخارجي لكن كمان معجب بعقلك وتفكيرك ومهتم بالموضوعات اللي بتتكلمي فيها او المواقف اللي مريتي بيها وبتحكيهاله خصوصا لو لقيتيه بيفتكر تفاصيل بسيطة اتكلمتي عنها او عملتيها.
بيحاول دايما يعرف انتي فاضية امتى
رابع حاجة من حاجات لو بتحصل في الرسايل بينكم يبقى الكراش مهتم بيكي هو كمان انه دايما بيسألك فاضية امتي وبيحاول يوفق مواعيده حسب جدولك انتي عشان يخلق فرصة انكم تقابلوا، عشان كده لو انتي كمان مهتمة بيه يبقى ضروري من وقت للتاني تخلقي مساحة من الوقت انكم تتقابلوا فيها عشان تعرفوا بعض أكتر.
طريقته في الرسايل بقت شبهك
دايما بيتقال انه القريبين من بعض مع الوقت بيبقوا شبه بعض في كل حاجة من غير ما ياخدوا بالهم، في علم النفس لما شخص بيقلد شخص تاني في طريقة كلامه او كتابته من غير ما ياخد باله دي بتبقى علامة من علامات الحب والاهتمام، فلو لاحظتي انه الكراش بدأ يتصرف ويتكلم بطريقة شبه طريقتك و مع الوقت بقت طريقته في كتابة الرسايل شبهك يبقى طبعا مهتم بيكي.
في الاخر عايزين نقول انه انك تبقى متحمسة عشان تتكلمي مع حد انتي مهتمة بيه او انك تخرجي معاه دي طبعا حاجة جميلة، لكن مهم كمان تفتكري دايما انك مش مضطرة تعملي حاجة انتي مش عايزة تعمليها وانه العلامات دايما مش كفاية عشان تتأكدي من مشاعر حد ناحيتك لكن هي بس بتساعدك تفهمي تصرفات اللي حواليكي أكتر.
اعرفي كمان 12 علامة تبين انه معجب بيكي !
