افضل مشروبات هتساعدك على النوم العميق

الارق وقلة النوم من اكتر المشاكل اللي بتقابل كتير من الاشخاص الايام دي, والارق ليه اسباب كتير جدا سواء نفسية او بسبب ضغوطات او كتر التفكير في النهاية النتيجة بتكون واحدة وهي انك مش بتاخدي كفايتك في النوم وبتبقي على طول تعبانة ومرهقة, وفي اشخاص احيانا بيلجأوا للحبوب اللي ممكن تساعدهم على النوم, ولكن دي بيكون ليها اثار سلبية على الصحة, عشان كده النهاردة احنا بنقدملك حل بديل للمشكلة دي وهي مشروبات هتساعدك على النوم العميق من غير اي اثار جانبية, ومش بس كده هي كمان مفيدة صحيا لانها بتحتوي على عناصر صحية وغنية بالقيمة الغذائية.

مشروبات هتساعدك على النوم العميق:

1- المية:

اول وابسط مشروب واللي موجود في كل بيت وهو المية, الحصول على كمية كافية من المية طول اليوم ده هيأثر بشكل مباشر على النوم, لان الجسم بيفقد سوائل عن طريق التنفس اثناء النوم, عشان كده لازم نتأكد اننا ناخد كفايتنا من المية طول اليوم عشان تضمني نوم عميق, ولكن قبل النوم على طول اشربي كمية المية اللي تحافظ على رطوبة الجسم اثناء النوم مش كمية مية زيادة عشان متضطريش انك تقومي من نومك اكتر من مرة للحمام.

2- عصير الكريز:

الكريز بيحتوي على كمية كبيرة من الميلاتونين, وده هو هرمون النوم, وبالتالي يعتبر الكريز من اكتر المصادر اللي ممكن تساعد على النوم العميق والاسترخاء.

تقدري تعملي عصير كريز مع اللبن وتشربيه قبل النوم, طلعي البذور من الكريز وضيفيها لكوباية لبن واضربيهم مع بعض في الخلاط, واشربيه بارد قبل النوم.

3- النعناع:

النعناع كمان من المشروبات المهدئة جدا اللي بتساعد على النوم والاسترخاء, انقعي اوراق النعناع في كوباية مية سخنة, واشربيها قبل النوم هتخلصك من الارق.

4- الكاموميل “البابونج”:

يعتبر من افضل المشروبات اللي بينصح بيها لعلاج الارق وقلة النوم, وبيساعد على الاسترخاء لو شربيته قبل النوم على طول, حطي معلقة كبيرة من اوراق الكاموميل في كوباية مية مغلية وسيبيها منقوعة شوية حوالي من 10 – 15 دقيقة, وبعدين اشربيه.

5- عصير الموز باللبن:

الموز غني بالبوتاسيوم والمغنسيوم, اللي بيساعدوا على الاسترخاء, بالاضافة كمان ان الموز بيحتوي على عنصر التربتوفان واللي بيتحول في الجسم لهرمون الميلاتونين والسيراتونين, وهي الهرمونات اللي بتساعد على النوم والاسترخاء.

اضربي بس الموز مع اللبن في الخلاط واشربيه قبل النوم هيساعدك جدا تسترخي وتنامي نوم عميق.

6- اللبن:

بكل بساطة كوباية لبن دافية قبل النوم, هتساعدك على الاسترخاء والنوم بعمق, اللبن بيحتوي على التربتوفان, اللي بيساعد المخ على انتاج السيروتونين والميلاتونين.

وممكن تضيفي لكوباية اللبن الدافي, شوية صغيرين من الفانيليا عشان تزودي تأثيرها, لان الفانيليا من الحاجات اللي ريحتها بتساعد على الاسترخاء, وبتقلل من التوتر والقلق, او تضيفي للبن ½ معلقة صغيرة من جوزة الطيب كمان من الحاجات اللي بتحتوي على خصائص مهدئة وهيساعدك على النوم بعمق.

7- الكاكاو:

الكاكاو الخام الخالي من السكر بيحتوي على عناصر غذائية كتير مهمة للجسم اللي بتساعد على زيادة عنصر الفينيثيلامين اللي بيساعد على تحسين المزاج, وبالتالي بيحسن النوم, يعني لو بتعاني من قلة النوم بكل بساطة تقدري تشربي كوباية كاكاو قبل النوم هتساعد تسترخي وتنامي نوم عميق.

تكنيك مذهل وفعال للتخلص من الارق هيخليكي تنامي في دقيقة واحدة بس !