4 قطع ملابس لكل ايام السنة تقدري تلبسيهم اي موسم
لو انتي بتحبي الازياء والفاشون, يبقى اكيد هتحبي يكون عندك دولاب مليان بالملابس المناسبة لكل موسم من ايام السنة, لكن اكيد ميزانيتك ومساحة دولابك ليهم كلام تاني, لكن الخبر الحلو ان في قطع ملابس مناسبة لايام السنة كلها تقدري تلبسيها اي وقت, وتبقى اساسية في دولابك مع باقي القطع اللي تقدري تنسقيها عليها وتطلعي بلوك حلو كل موسم, والنهاردة هنعرف مع بعض 4 قطع ملابس لكل ايام السنة متعددة الاستخدامات ومناسبة جدا لاي موسم.
قطع ملابس لكل ايام السنة:
1- قميص ابيض بزراير:
لو عايزة قطعة ملابس كلاسيكية بغض النظر عن الموسم, يبقى القطعة دي هتكون هي القميص الابيض مع الزراير, القميص ده تقدري تلبسيه في اي وقت في السنة ولكل الاوقات سواء للشغل, لخروجك الصبح, لزيارة صاحبتك, ممكن في الربيع تلبسيه مفتوح وتحته اندرشيرت ملون, وبنطلون جينز فاتح.
في الصيف تقدري تلبسيه مع تني الاكمام بتاعته مع بنطلون كابري او شورت مع صندل مناسب, في الشتا تقدري تلبسي القميص الابيض تحت جاكيت مع بنطلون جلد اسود.
2- جاكيت خفيف:
الجاكيت الخفيف كمان من القطع اللي تقدري تلبسيها طول السنة, سواء في الربيع والخريف, في الايام المطر والباردة, وكمان في الصيف هيحميكي من الشمس.
في الخريف تقدري تلبسي الجاكيت الخفيف فوق سويت شيرت, وفي الشتا ممكن تنسقيه مع سويتر تقيل او تلبسي تحته طبقات.
3- البنطلون الاسود:
البنطلون الاسود تالت قطعة معانا من القطع المناسبة لاي يوم في السنة, تقدري تلبسيه مع تيشرت ملون خفيف او بنص كم في الربيع والصيف, مع ستايل شوز ودجز, تقدري كمان تلبسيه مع تيشرت مقلم بكم طويل في الخريف مع شوز فلات او حذاء رياضي.
في موسم الشتا ممكن تنسقي البنطلون الاسود مع سويتر برقبة السلحفة او اي ستايل سويتر صوف تختاريه, وتكملي اللوك بسكارف وقبعة, مع بوت اسود طويل لحد الركبة.
4- البنطلون الجينز الكلاسيك:
الجينز من القطع الاساسية في كل دولاب واللي تتقدري تلبسيه بسهولة على مدار السنة كلها, في الربيع ممكن تلبسيه مع تيشرت, او قميص قطن باكمام طويلة للشغل, وفي الصيف تقدري تلبسيه مع تانك توب او اي ستايل توب عندك في الدولاب عندك هيمشي عليه او تيشرت, وفي موسم الشتا تقدري تنسقيه مع سويت شيرت او سويتر.
اكيد حلو جدا انك تبقي عارفة انك مش لازم تعملي شوبينج طول السنة, وتصرفي فلوس كتير على الملابس عشان تحافظي على اناقتك, كل اللي هتعمليه انك تشتري ال 4 قطع الاساسية ومتعددة الاستخدامات دي, واستمتعي بلبسها في اي موسم.