افضل 25 نصيحة لمكياج العيون للمبتدئين

ريهام محمود
ريهام محمود
في
مكياج
6415

سواء كنتي من عشاق المكياج او لسه مبتدئة, مكياج العيون بشكل خاص يعتبر من اصعب الحاجات اللي ممكن تقابلك, عشان كده النهاردة هنساعد كل بنات حوا في المهمة دي وهنقولك نصايح لمكياج العيون للمبتدئين, هتساعدك تظبطي مكياج عيونك ويطلع بشكل مثالي.

نصايح لمكياج العيون للمبتدئين:

نصايح الايلاينر:

الايلاينر من الخطوات المهمة في مكياج العيون, وفي بنات كتير بتلاقي صعوبة في رسمه, لكن مع النصايح اللي معانا النهاردة هتساعدك انك ترسميه بشكل اسهل.

1- اول حاجة لازم تتأكدي من نضافة الجفون قبل ما تبدأي من اي زيوت زيادة او اي حاجة ممكن تأثر على الرسمة, بعدها حطي برايمر العيون, عشان مكياج العين ميسحش ويدوم معاكي فترة اطول.

2- عشان تخلي الرموش تبان شكلها كثيف اكتر, حطي الايلاينر قريب من خط الرموش بقدر الامكان بحيث انه يبان كأنه جزء من خط الرموش الطبيعية, وممكن تستخدمي طريقة النقط عشان تسهلي على نفسك الرسمة, يعني ارسمي نقط جنب بعض من بره للزاوية الداخلية للعين, وباستخدام فرشة صلبة يكون فيها ميل امزجي النقط ووصليهم ببعض في خط ناعم من غير اي مجهود.

3- اتأكدي ان خط الايلاينر يكون رفيع ومستقيم عشان توصلي لخط مثالي, وممكن تحطي قلم الايلاينر او الكحل في الفريزر شوية قبل ما تبريه عشان تحافظي عليه من الكسر.

4- عشان ترسمي اجنحة الايلاينر بشكل مثالي, استخدمي ايلاينر سائل, ابدأي من خط الرموش من بره وامشي لحد الزاوية الداخلية للعين, ولو ايدك مش ثابتة كفاية ومش قادرة تظبطي الايلاينر السائل, ارسمي خط بقلم ايلاينر الاول وبعدين امشي عليه بالايلاينر السائل.

5- لو عايزة تعملي رسمة سموكي, استخدمي قلم الايلاينر افضل لانه بيكون ناعم وكريمي اكتر, وتقدري تعملي التأثير السموكي باستخدام فرشة.

6- كل ما تكبري في السن, اختاري الوان هادية وطبيعية اكتر زي اللون البني للوك انيق, وبعدها استخدمي الماسكارا عشان تكملي اللوك البسيط.

ملحوظة: دايما لما تيجي ترسمي الايلاينر ميلي الوجه لفوق وبصي لتحت اثناء الرسم, ده هيضمن لك ان الرسمة تطلع مظبوطة معاكي.

نصايح لمكياج العيون 1
نصايح لمكياج العيون 1

نصايح الماسكارا:

الماسكار من الخطوات اللي بتكمل مكياج العيون وبتظهره اكتر, والنصايح دي هتساعدك ان رموشك تطلع بشكل مثالي.

7- ابدأي دايما بوضع الماسكارا من اول الجذور واطلعي على الرموش في حركة زجزاج بسيطة لحد الاطراف, الحركة دي هتساعد ان الرموش تبقى كثيفة من اول طبقة ومن غير ما تبقى في كمية ماسكارا زيادة على الرموش تخليها تتقل وتنزل لتحت.

8- بعد ما تحطي اول طبقة من الماسكارا, استني حوالي 10 ثواني قبل ما تحطي الطبقة التانية, بالطريقة دي الماسكارا مش هتتكتل على الرموش.

9- قبل ما تحطي الماسكارا, مرري العصايا بخفة على منديل ورق عشان تتخلصي من الماسكارا الزيادة, وتمنعي تكتل الماسكارا على الرموش.

10- قبل استخدام الماسكارا, بننصحك تستخدمي اداة تني الرموش عشان تديكي نتيجة احسن.

11- طريقة مسك عصايا الماسكارا مهم جدا, امسكي العصايا بشكل افقي للرموش الكثيفة اللي فوق, وبشكل عمودي مع الرموش الخفيفة اللي تحت, عشان تطلع بشكل طبيعي.

12- لو عايزة الماسكارا تدوم لفترة اطول, متقعديش تدخلي وتطلعي في عصاية الماسكارا جوه العبوة, لانك بالطريقة دي بتدخلي هوا جواها هيخلي الماسكارا تنشف منك بسرعة, بس لفيها يمين وشمال جوه العبوة من غير ما تدخلي وتطلعي فيها.

ملحوظة: عشان توصلي لافضل النتايج, الاحسن ان الماسكارا تكون الخطوة الاخيرة في مكياج العيون.

نصايح لمكياج العيون 2
نصايح لمكياج العيون 2

نصايح الايشادو:

الايشادو من الحاجات اللي بتدي عمق وبعد للعين وبتبرزها اكتر, ولو حطتيه بشكل صح هيخلي عيونك تبان اكبر واوسع وهيبرز لونها اكتر.

13- اختاري فرش ايشادو جودتها عالية عشان النتيجة تطلع حلوة, هتضمني رسمة ومزج بشكل سليم.

14- لو عايزة الايشادو بتاعك يدوم طول اليوم, استخدمي برايمر عيون كويس قبل الايشادو.

ولو عايزة تظهري لون الايشادو اكتر وتخليه Poppy غطي الجفن الاول بكحل ابيض قبل رسم الايشادو, لان اللون الابيض هيلغي لون بشرتك الطبيعي وهيعمل قاعدة متساوية بلوم موحد للايشادو.

15- بالنسبة للجزء اللي تحت من العين اللي بيكون قريب من خط الرموش استخدمي له ايشادو بلون غامق, والمنطقة الموجودة فوق المنطقة دي استخدمي لها لون متوسط, والمنطقة اللي فوق من العين استخدمي معاها لون فتح, وامزجي التلات الوان مع بعض كويس.

نصايح لمكياج العيون 3
نصايح لمكياج العيون 3

نصايح للحواجب:

الحواجب بتحدد شكل الوش كله, وبتعمل اطار للعين وبتظهرها اكتر, يعني الحواجب ليها تأثير كبير على مكياج العيون وعلى الوش كله.

16- هنلاقي في السوق منتجات كتير لرسم الحوجب, اختاري منها المنتج اللي يناسب لون شعر حواجبك, واملي بيه الفراغات.

17- اكتر حاجة بنأكد عليها لما تيجي ترسمي حواجبك, ان الشكل يبقى طبيعي بقدر الامكان, عشان كدده لازم تتأكدي انك تمزجي المنتج بشكل صح على حواجبك عشان تتجنبي اي خطوط قاسية او حادة.

18- استخدمي هايلايتر ناعم على عضمة الحاجب عشان تظهري الشكل اكتر, وتبرزيه, وتضيفي ارتفاع للحواجب.

19- لو حواجبك كثيفة اوي والشعر خشن ومش بتقدري تتحكمي فيه بسهولة, انسب منتج ليكي هيكون هو جل الحواجب عشان تحافظي عليها مكانها وتظبطي شكل الشعر, استخديم بس كمية قليلة من الجل هتكون كافية جدا لتظبيطه.

20- عشان الرسمة تطلع معاكي مثالية ومظبوطة, استخدمي فرشة صلبة بزاية ورطبيها بالمية قبل ما تملي بيها الحواجب بالمنتج بتاعك.

نصايح لمكياج العيون 4

نصايح عامة:

21- عشان تمنعي ان المكياج بتاعك يبوظ اثناء رسم مكياج العيون والايشادو مينزلش على باقي المكياج, خلي مكياج العيون اول حاجة, وبعدين كملي باقي المكياج.

22- لو هتعملي مكياج عيون قوي, يبقى لازم يكون مكياج الشفايف ناعم وبألون نيود وطبيعية, الافضل انك تخلي التركيز على حاجة واحدة بس في الوش.

23- عشان تخلي العيون تظهر بلوك مشرق وشباب, ابرزي الزاوية الداخلية للعين بلون ايشادو فاتح, او ممكن تستخدمي هايلايتر.

24- لو عايزة تجعدي الرموش بشكل فوري, استخدمي السيشوار على اداة تني الرموش بحيث تبقى يادوب دافية بس مش سخنة اوي قبل ما تستخدميها على رموشك, بالطريقة دي هتحافظي على شكل الرموش متنية فترة اطول.

25- لو حسيتي انك حطيتي كتير من منتجات مكياج العيون زي الايشادو, استخدمي ورق ازالة الدهون بالضغط على الايشادو بخفة جدا عشان تتخلصي من اي كمية زيادة من غير ما تبوظي الايلاينر بتاعك.

ودي كانت نصايح بسيطة للمبتدئين اللي بتغطي الاساسيات تقريبا في مكياج العيون, وبعد ما عرفنا نصايح وضع مكياج العيون, هنقولك كام نصيحة عن ازالة مكياج العيون بطرق سهلة.

نصايح لمكياج العيون 5

ازاي تشيلي مكياج العيون؟

1- الطريقة الاولى: ازالة المكياج بمزيل مكياج العيون:

اول طريقة هي باستخدام مزيل لمكياج العيون تكون جودته عالية, لان العين حساسة وبتتأثر بسرعة, لكن مع ذلك ممكن تستخدمي حاجات طبيعية موجودة في البيت زي زيت جوز الهند, او بشامبو الاطفال.

ملحوظة: متستخدميش غسول الوش لازالة مكياج العيون, لان العيون زي ما قولنا حساسة, وده ممكن يأدي لجفاف العين وتساقط الرموش.

1- قبل ما تتخلصي من المكياج بالمية, استخدمي الاول الويبس او مزيل المكياج لازالة المكياج من البشرة كلها قبل ما تغسليه بالمية.

2- لما تيجي تستخدمي الويبس في ازالة المكياج متفركيش او تضغطي على البشرة بقوة, استخديم الحد الادنى من الضغط وامسحي البشرة بخفة جدا.

3- لازالة مكياج العين استخدمي قطعة قطن اغمسيها في مزيل مكياج العيون, وامسحي العين بخفة.

4- في حالة ان مزيل المكياج بتاعك خلص او انتي حابه تستخدمي حاجة طبيعية على بشرتك, كل اللي هتعمليه خدي كمية من زيت جوز الهند على راحة ايدك ودلكي بيه الوش والعيون, وسيبيه كام دقيقة, وبعدين باستخدام قطعة قطن امسحي كل الزيت من على بشرتك بخفة.

ملحوظة: في حالة لو مش متوفر عندك زيت جوز الهند ممكن تستخدمي زيت الزيتون او زيت اللوز الحلو او الفازلين لازالة مكياج الوش والعيون.

5- استخدمي غسول لطيف ومناسب لنوع بشرتك.

6- بعد غسل البشرة بالغسول, استخدمي تونر لقفل المسام, وبعدها رطبي بشرتك بالكريم المرطب المناسب, واستخدمي كريم للعين عشان توفري الراحة للمنطقة دي وتغذيها وترطبيها.

الطريقة التانية: ازالة مكياج العيون بشامبو الاطفال:

1- اول حاجة شيلي مكياج الوش.

2- رشي الوش كله بالمية مع التركيز على العيون, صبي كمية بسيطة من الشامبو على راحة ايدك.

3- حطي الشامبو على الجفون وابدأي دلكيه بالراحة رايح جاي على العين.

4- رشي مية مرة تانية لازالة الشامبو.

5- كرري وضع الشامبو مرة تانية لو احتاجتي, او حسيتي ان لسه في بقايا مكياج.

6- اغسلي وشك باستخدام غسول خفيف مناسب لبشرتك.

7- بعد غسل الوش, استخدمي تونر لانه بيساعد على قفل المسام وبيخلي البشرة شكلها صحي, وبيقلل من الشوائب وبينقي البشرة.

8- استخدمي مرطب مناسب لبشرتك.

9- استخدمي كريم العين على الجفون وتحت العين, هيساعدك على تجنب اكياس العين والهالات السودا.

لازم تعرفي ان شامبو الاطفال ممكن يكون مش فعال اوي مع مكياج العيون ال Long stay او اللي بيدوم فترة طويلة.

نصايح لمكياج العيون 6

الدليل الكامل ازاي تحطي مكياج العين بتاعك باحتراف

الدليل الكامل لمكياج العيون
الدليل الكامل لمكياج العيون

مقالات متعلقه

11 نصيحة لتحديد حواجبك بنفسك في البيت زي المحترفين

11 نصيحة لتحديد حواجبك بنفسك في البيت زي المحترفين

نصايح مكياج للعيون المبطنة

نصايح مكياج للعيون المبطنة

10 حيل تجميلية بسيطة ممكن تعمليها عشان تطلعي بلوك احلى في وقت سريع

10 حيل تجميلية بسيطة ممكن تعمليها عشان تطلعي بلوك احلى في وقت سريع