حيل سرية لو عايزة تطلعي بلوك حلو في اسرع وقت

ريهام محمود

في

935

احيانا كتير بتحسي انك معندكيش وقت كفاية, لكن في نفس الوقت عايزة تطلعي بلوك حلو, يبقى انتي في المكان الصح, عشان النهاردة هنقول لكل بنات حوا من خلال السطور الجايه حيل سريعة للبشرة والمكياج واللبس, ومجموعة نصايح للوك حلو وسريع مياخدش منك اي وقت.

نصايح للوك حلو وسريع:

1- رطبي ايديكي:

نصيحة وحيلة سريعة جدا ومتاخدش منك وقت لكن بتفرق في اللوك, ممكن يكون اللوك بتاعك كله حلو لكن ايديكي شكلها جاف تبوظلك شكل اللوك, خصوصا لما بيكون الجو برد ده بيخلي الجلد ينشف بسرعة, عشان كده بننصحك قبل ما تخرجي لازم ترطبي ايدك باللوشن او بالكريم المرطب المناسب, ومش بس وقت الخروج لازم تحافظي على رطوبة الايد على طول بعد التعرض للمية والصابون اي وقت خلال اليوم.

2- استخدمي BB كريم:

ال BB كريم او الكريم الملون من الحاجات السريعة اللي ممكن تستخدميها كبديل للفونديشن, حطي الكريم الملون او ال BB وكملي باقي المكياج بتاعك, الكريم الملون هيديكي التغطية والترطيب, يعني هتوفري خطوتين في خطوة واحدة, وده يعتبر حل سريع للايام اللي معندكيش فيها وقت مش هتحتاجي اكتر من 5 دقايق عشان تخلصي اللوك بتاعك.

3- العناية بالبشرة والمكياج:

عشان نكون صادقين مع نفسنا, المكياج اكتر حاجة في اللوك بتاخد وقت, وبيكون صعب انك تعملي مكياج كامل بشكل يومي, عشان كده خبراء التجميل بينصحوا انك تهتمي ببشرتك وتعتني بيها كويس جدا, لان البشرة لما تكون صحية ومترطبة بشكل كويس, هتبقي في الحالة دي مش محتاجة لمكياج كامل عشان تداري اي عيوب ويمكن متحتاجيش المكياج خالص كمان, انتظمي دايما على استخدام الغسول مرتين في اليوم, واستخدمي بعده المرطب, واعملي سكراب للبشرة مرتين في الاسبوع بالكتير, وبشرتك هتبقى صحية جدا ومش هتبقي محتاجة مكياج كتير.

4- اعملي Wardrobe Capsule:

احنا اتكلمنا قبل كده بالتفصيل على طريقة ال Wardrobe Capsule, وهي انك دولابك يبقى في قطع معينة تقدري تنسقيها مع بعض بسهولة, تقدروا تشوفوا من هنا بالتفصيل ايه هو ال Wardrobe Capsule وازاي تعمليه عشان تخلي دولابك متجدد وعلى الموضة على طول.

5- الشوز:

الشوز من الحاجات اللي بتعمل فرق فعلا في اللوك لو اختارتيها صح, ومن ستايلات الشوزات اللي تقريبا بتليق على كل حاجة وهاطلع بلوك حلو هي ستايل الشوز ال Pointy, بغض النظر انها تكون بكعب او فلات, ومتنسيش اكيد انك تمسحي الشوز وتلمعيه قبل اللبس وتكون حالته كويسة مش مقشر مثلا او فيه اي عيوب.