10 اسباب ليه معظم النساء مش بيلاقوا الراجل الحقيقي

بقلمريهام محمود فيعلاقات visibility271

معظم النساء في الوقت الحالي بتشتكي ان مبقاش موجود الراجل الحقيقي او الجنتل مان, او اللي كان بيتقال عليه زمان في العصور الوسطى الفارس اللي كان بيتميز بصفات الشهامة والرجولة الحقيقية, يا ترى ده ليه ده بقى مبقاش موجود دلوقتي في العصر اللي احنا فيه؟ ده اللي هنعرفه النهاردة من خلال السطور الجايه وهنقول لكل بنات حوا 10 اسباب ليه النساء مش بتلاقي الراجل الحقيقي.

ليه النساء مش بتلاقي الراجل الحقيقي:

1- مستنية الامير اللي في الافلام:

معظم البنات بيبقوا مستنيين فارس الاحلام اللي ياخدهم على حصان ابيض لارض الاحلام ويعيشوا كل حياتهم في رومانسية, لان دي الصورة اللي دايما بتتصدر لنا في الافلام والكتب والقصص الرومانسية, وده اللي بتبقى عايزاه كل بنت وبتفكر فيه, ولما تيجي للواقع وتلاقيه مش مشابه للي في خيالها بتحس باحباط, لكن الحقيقة والواقع مختلف عن عالم الخيال والافلام, بالتالي بتقعدي تدوري على حاجة اصلا مش موجودة في العالم الواقعي.

2- بتدوري على الراجل المنقذ:

تكملة للفكرة اللي فاتت, البنت دايما بتحلم بالراجل المنقذ اللي يساعدك اول ما تحتاجي مساعدته حتى في ابسط الامور, يمكن كتير مننا بيحلم بلقطة الافلام المعروفة “الكتب تقع منك في الارض وتلاقي واحد جري يجيبهم لك من على الارض”, لكن ده كمان مش موجود غير في الافلام بس والواقع بيكون مختلف, لان الحقيقة هنلاقي معظم الرجالة مش بتساعد غير لما انتي تطلبي ده منه بنفسك.

او لو راجل اخد الخطوة وحب يساعد من نفسه ممكن يلاقي رد مثلا “انا مش محتاجة مساعدة انا اقدر اعمل ده بنفسي” خصوصا خلال فترة ال 50 سنة الاخيرة مع نشر مبدأ المساواة اللي كتير من النساء بيطالبوا بيه وان الست زي الراجل وانك مش محتاجة مساعدته وتقدري تعملي كل حاجة بنفسك زيك زيه, فلو انتي عايز الراجل الفارس اللي يساعد يرجع تاني انتي لازم تشجعيه على ده.

ليه النساء مش بتلاقي الراجل الحقيقي
ليه النساء مش بتلاقي الراجل الحقيقي

3- الراجل هو اللي المفروض يدفع:

كمان النقطة دي مكملة للنقطة اللي فاتت اننا بندور على المساواة لكن في نفس الوقت, في حاجات وحاجات, يعني لما هنيجي مثلا عند الفلوس, هتبقي بتدوري او عايزة الراجل اللي لو في مكان مع بعض هو اللي يدفع, ولو حصل انه خلى المعاملة “انجليزي” بمعنى كل واحد يدفع لنفسه هتقولي عليه حاجة من الاتنين ياما بخيل او مش جنتل مان, وبالتالي هتشوفي ان مبقاش في الراجل الحقيقي الفارس اللي يتحمل المسئولية, فلو انتي بتدوري على الراجل الحقيقي الكريم يبقى لازم انتي كمان تراجعي نفسك وقناعاتك.

4- التمسك بفكرة “The One”:

مافيش حد كامل ولا حد هيجي زي توقعاتك بالظبط يعني مش هتلاقي “The One” او الراجل اللي في خيالك, وبالتالي اي حد هترتبطي بيه هيبقى اقل من توقعاتك تماما, لان زي ما قولنا مافيش حد كامل حتى انتي نفسك.

ليه النساء مش بتلاقي الراجل الحقيقي
ليه النساء مش بتلاقي الراجل الحقيقي

5- وضع الامن المالي قبل الحب:

مش هننكر ان كتير من البنات بتدور على الوضع المالي العالي قبل الحب, وبتبقى مركزة انها تتجوز دكتور او مهندس او اي مهنة مرموقة ويكون ليها دخل مادي عالي, لكن الواقع ان المهن دي بتكون ظروف شغلهم صعبة وبيشتغلوا ساعات شغل كتير وبالتالي هو مش هيكون عنده وقت ليكي ولا لمتطلباتك, وممكن يديكي الفلوس تشتري اللي انتي عايزاه لكن هتبقي لوحدك مش هيكون معاكي, يعني خيالك عن الراجل اللي هيسهرك سهرة رومانسية ويفتحلك باب العربية ويلبسك البالطو الفرو دي موجودة في الافلام بس, على العكس انك ممكن ترتبطي بشخص تكافحي وتتعبي معاه شوية من الناحية المادية لكن يكون راجل حقيقي وتعيشي معاه سعيدة.

6- عايزة الراجل اللي عنده كل حاجة:

كتير من البنات اكيد ممكن يكونوا بيدوروا على الراجل اللي عيلته او اهله موفرين له كل حاجة وعايش حياة مرفهة,  لكن المشكلة مع الرجالة اللي من النوع ده ان هو معملش طريقة بنفسه, اخدوا افضل تعليم, وعندهم عربيات فاخرة, وكل طلباتهم مجابه, وبالتالي هتلاقيه مش بيقدر قيمة اي حاجة لانه مكنش مضطر انه يكسب فلوسه بنفسه او يكافح ويتعب وممرش بصعوبات في حياته لتحقيق حاجة, وبالتالي انتي هتبقى مجرد حاجة من الحاجات اللي هو بيمتلكها مش اكتر من كده, حاجة هيزهق منها ويهملها مجرد ما تبقى في ايده, فيا ترى هل ده اللي انتي تبدوري عليه؟ اكيد لا وبالتالي هتلاقي عكس توقعاتك معاه.

ليه النساء مش بتلاقي الراجل الحقيقي

7- الاشخاص مش بتتغير:

مافيش حد بيتغير, يعني لو هو انسان مش كويس وفيه صفات مش حلوة ومش بيحترمك ودايما بيغضب او بيزعق فيكي, اتأكدي انه هيفضل زي ما هو ومش هيتغير, عشان كده دوري على الشخص اللي يعاملك كويس ويحترمك ويقدرك من البداية.

8- متوقعة انك ممكن تغيريه:

وتكملة للنقطة اللي فاتت ان مافيش حد بيتغير, كمان انتي مش هتقدري تغيريه, يعني متدخليش في علاقة مع حد ومتخلية انه هيتحول لحاجة تانية مكنتش موجودة فيه من الاول, يعني متتوقعيش انه الراجل ممكن يتغير فجأة ويتحول ل The one لمجرد انك بتحبيه.

9- اختاري حد شبهك:

متختاريش او تدخلي في علاقة مع حد مش شهبك او بينكم فروق اجتماعية او تعليمية او مادية كبيرة وتتوقعي انك ممكن تخليه شبهك او تغيريه وتدخليه العالم بتاعك ويتحول ويبقى حاجة تانية, ياما تقبليه زي ما هو من غير تغيير ياما من الاول تختاري اللي شبهك.

10- متحكميش عليه من بره بس:

متحكميش على الكتاب من عنوانه بس, ممكن تشوفي شخص من بره بس وتحكمي عليه انه مش مناسب او مش الجنتل مان اللي في خيالك او مافيهوش الصفات اللي انتي عايزاها, لكن لما تقربي منه اكتر تكتشفي ان هو ده الراجل الحقيقي اللي انتي بتدوري عليه.

في النهاية بنقولك خليكي واقعية, وعيشي في العالم الحقيقي واخرجي من عالم الافلام الرومانسية اللي مش موجودة في الحقيقة, عشان تقدري تلاقي الراجل الحقيقي او الجنتل مان بعيدا عن الخيالات, وارتبطي بالشخص اللي تحسي معاه فعلا انك سعيدة.

6 اشارات تقولك ان الشخص ده بيحبك .. و 6 اشارات تقولك انه بيستغل مشاعرك

علامات تبين لك مشاعر شريكك