ازاي تخلي صاحبتك هي الستايلست بتاعتك وتساعدك في الشوبينج!

بقلمريهام محمود فيموضة وأزياء visibility98

هل بتحسي دايما ان دولابك كله ستايل واحد ومش عارفة تخرجي منه؟ وفي النهاية بتلاقي نفسك بتشتري وبتلبسي نفس الستايل وبتكرريه على طول؟ النهاردة من خلال موضوعنا هنقولك ازاي تجددي ستايلك وترجعي تحبيه تاني, بمساعدة صاحبتك وازاي تخليها الستايلست بتاعتك وانتي بتشتري هدومك.

ازاي تجددي ستايلك بمساعدة صاحبتك:

احيانا لما بنبص في المرايا للاسف بنميل اننا نركز على العيوب بس, واننا ازاي شايفين نفسنا ده بيأثر على الملابس اللي بنلبسها عادة.

لكن الاشخاص المقربين مننا واصحابنا والناس اللي بيحبونا, غالبا بيشوفونا بطريقة مختلفة بوجهة نظر تانية غير اللي احنا شايفين بيها نفسنا, عادة صاحبتك هتميل اكتر للمميزات, والحاجات اللي احنا مش شايفنها في نفسنا.

ليه صاحبتك ممكن تكون احسن ستايلست ليكي:

لما تاخدي صاحبتك المقربة معاكي وتخليها الستايلست بتاعتك وانتي بتعملي شوبينج, ده هيساعدك انك تشوفي نفسك بعين حد تاني غيرك وبوجهة نظر مختلفة.

ده بالاضافة ان صاحبتك ممكن تساعدك تجددي ستايلك والنمط اللي انتي متعودة عليه وتخليكي تجربي حاجة جديدة, وهتشجعك تجربي الوان وستايلات جديدة مجربتيهاش قبل كده, وتلاقيها حلوة عليكي.

ازاي تجددي ستايلك بمساعدة صاحبتك
ازاي تجددي ستايلك بمساعدة صاحبتك

ازاي تختاري صاحبتك اللي تساعدك في الشوبينج:

ممكن الشخص اللي يساعدك في الشوبينج صاحبتك المقربة, مامتك, اختك, يعني اي شخص بتثقي في رايه وبتحسي بالراحة معاه.

اختاري شخص فعلا يختار معاكي بحب, ويحاول انه يخليكي تلبسي افضل حاجة.

ممكن تختاري شخص انتي بتحبي طريقة تنسيق الوانه او ستايله, وبتحبي طريقتة في اللبس وتجربته لستايلات جديدة غير تقليدية وبتعجبك.

ده هيساعدك انك تثقي في اختياراتهم, والستايل اللي بيقترحوه عليكي, لانك هتبقي عارفة انهم بيختارولك الافضل واللي شايفينه فعلا حلو عليكي.

ازاي تجددي ستايلك بمساعدة صاحبتك
ازاي تجددي ستايلك بمساعدة صاحبتك

تلبسي ايه وانتي رايحة تعملي شوبينج:

اختيار اللبس اللي هتلبسيه في يوم الشوبينج مهم لانه هيسهل عليكي اليوم وهيخليكي مرتاحة.

اختاري اللبس اللي بيكون سهل وسريعة في القلع واللبس, زي التوب, والسويتر الواسعة.

واتأكدي ان ملابس الشوبينج مش بس تكون مريحة, لكن كمان تكون قطع ملابس بتحبيها على نفسك.

لانك لما تلبسي حاجة انتي اصلا بتحبيها عليكي, هتخليكي نفسيا مرتاحة وراضيه عن نفسك, وده هيساعدك انك تركزي وتشتري وانتي مرتاحة وتختاري صح.

افضل ملابس داخلية تلبسيها وانتي بتعملي شوبينج:

البسي ملابس داخلية مريحة اللي انتي متعودة تلبسيها دايما, عشان تشوفي شكل الحاجة اللي انتي هتشتريها على الملابس الداخلية اللي انتي متعودة عليها او المفضلة بالنسبة لك.

كمان الملابس الداخلية اللي بتنحت الجسم ال Body-shaping,  بتحدد الجسم بطريقة ناعمة, واللي ممكن تكون مفيدة فعلا لو هتشتري حاجة ضيقة على قد الجسم.

لو هتشتري حاجة سواريه مثلا او قطعة من غير حماله, حاولي تاخدي معاكي حمالة صدر تكون من غير حمالات او حمالة صدر نيود بلون الجسم عشان تجربي عليها الحاجة اللي انتي هتشتريها وتشوفيها عليكي زي ما هتلبسيها بالظبط.

قبل ما تجربي ستايل جديد اعملي الخطوة دي:

لو بتحبي شكلك بستايل شعر ومكياج معين, اعمليه وانتي رايحة تعملي الشوبينج عشان تبقي مرتاحة نفسيا.

لما تلبسي الحاجة اللي انتي بتحبيها عليكي وتعملي شعرك وتحطي مكياج بالطريقة اللي تكوني حاسه فيها بالرضا عن نفسك, ده كله هيساعدك انك تبقي مرتاحة اكتر في اللبس اللي صاحبتك هتختاره ليكي, ويخليكي مستعدة انك تجربي ستايلات جديدة.

ازاي تجددي ستايلك بمساعدة صاحبتك

خدي الاكسسوارات دي معاكي في الشوبينج:

– حزام:

لو هتجربي فستان, جربيه بحزام ومن غير حزام, عشان تشوفي هيأثر ازاي على شكل الفستان واي شكل هو الافضل او الاحلى.

خدي معاكي حزام رفيع بلون محايد عشان يمشي على اي لون هتختاريه.

– شوز بكعب عالي:

الشوز اللي بكعب هيخليكي تشوفي الطقم اللي هتشتريه هيبقى شكله عامل ازاي لو هتخرجي بيه بالليل مثلا, لان ممكن تشتري حاجة معينة يكون شكلها مش حلو اوي مع الشوز الفلات, لكن لما تجربيها مع الكعب شكلها يختلف وتطلع احلى.

جاهزة عشان تجددي ستايلك؟ هنقولك شوية نصايح:

امشي على النصايح دي عشان تساعدك انك تشوفي الستايلات الجديدة اللي صاحبتك هتختارهالك, وهتتفاجئي بالنتايج في النهاية.

1- اختاري المحل الصح:

اولا اختاري محل مناسب لميزانيتك وامكانياتك المادية, وفي نفس الوقت يكون متنوع في ستايلاته والوانه عشان يبقى قدامك اختيارات كتير تختاري منها.

اعتمدي على المحلات الكبيرة, لان هتلاقي فيها تنوع في الاذواق والستايلات, بالاضافة انه بيكون فيها اكسسوارات بستايلات مختلفة اللي هتخلي قدامك اختيارات كتير تختاري منها عشان تنسقيها مع الطقم بتاعك.

2- ادي صاحبتك نبذة مختصرة عن اللي انتي عايزاه:

عشان تساعدي صاحبتك تختار معاكي اديها نبذة مختصرة كده انتي عايزة تركزي على ايه بالظبط وايه نوع الملابس اللي انتي نازلة تشتريها.

مثلا “قوليلها بدور على حاجة كاجوال لخروجات الصبح”, كده انتي هتخليها تركز على اللي الستايلات المناسبة لده.

او “انا عايزة حاجة لسهرة او لمناسبة” هنا هتبدأ تركزلك على الستايلات الانيقة المناسبة لكده.

وسيبي الاختصار مفتوح, يعني تقولي بس انتي عايزة طقم لايه, عشان يكون في فرصة انك تشوفي ستايلات والوان جديدة, والفكرة هنا انك تسهلي على صاحبتك انها تختارلك ستايلات جديدة تجربيها وتخرجك من منطقة الراحة بتاعتك او الحاجات اللي انتي متعودة عليها دايما.

3- قولي “ايوه” على اي حاجة صاحبتك تقترحها عليكي تجربيها:

حتى لو اختارت حاجة انتي من النظرة الاولى محبتيهاش او شايفة انها مش مناسبة ليكي.

بس خلي عقلك متفتح للجديد وجربيه, وممكن جدا تتفاجئي بالنتيجة اول ما تلبسيها وتبصي في المرايا وتلاقي شكلك حلو فيها.

مثلا, ممكن يطلع الستايل مش حلو لكن اللون حلو, وهنا هتبقي اكتشتفتي لون جديد حلو عليكي, يبقى في الحالة دي اختاري اللون ده في ستايل تاني مختلف.

اسألي صاحبتك السؤال ده كل مرة تختارلك حاجة:

مثلا صاحبتك اختارتلك فستان طويل باللون الاحمر الغامق, وانتي حاسه ان طول الفستان مش مناسب ليكي.

4- اسألي صاحبتك ليه اختارتيلي الستايل ده؟

هتقولك مثلا انها شايفة ان اللون ده هيبقى حلو مع لون بشرتك وشعرك وهيليق عليكي.

في الحالة دي حتى لو انتي موافقتيش على الستايل وشايفة انه طوله مش مناسب ليكي, لكن ممكن توافقي على اللون اللي هيظهر لون بشرتك وشعرك اكتر.

فهنا الفستان ممكن ميكونش مناسب ليكي كستايل, ولكن هتبقي لقيتي اللون المناسب وجربتي لون جديد, وهتبقي كسبتي نصيحة جديدة هتفيدك في المستقبل لما تيجي تشتري اي حاجة تانية.

ازاي تجددي ستايلك بمساعدة صاحبتك

اسألي نفسك السؤال ده قبل ما تاخدي القرار النهائي:

نتخيل كده ان صاحبتك اختارتلك ستايلات جديدة وحلوة وانتي خلاص مقتنعة بيها.

لكن قبل ما تاخدي القرار النهائي وتروحي تدفعي عشان تشتريها خلاص, اسألي نفسك السؤال ده.

“هل القطعة اللي انتي اشترتيها ممكن تمشي على حاجات كتير موجودة بالفعل في دولابك؟”.

لو الاجابة “ايوه” يبقى تشتريها وانتي مطمنة, لان كده هتضمني انك هتقدري تنوعي في لبسها على اكتر من حاجة عندك.

ازاي تستمتعي بالنيولوك بتاعك!

لما تلبسي ستايل جديد عليكي لاول مرة, طبيعي انك ممكن تحسي انك مش مرتاحة اوي عشان خرجتي من منطقة الراحة بتاعتك او اللي انتي متعودة عليه.

لكن مجرد ما هتسمعي تعليقات حلوة على ستايلك وشكلك, ده هيديكي ثقة في نفسك, وهيشجعك اكتر انك تستمري وتجربي ستايلات جديدة, وتلبسي حاجات غير اللي انتي متعودة عليها بشكل اكتر.

هتعملي ايه دلوقتي!

روحي النهاردة اطلبي من صاحبتك انها تبقى “الستايلست” بتاعتك واتفقوا على يوم عشان تروحوا المحل المفضل ليكي.

افتكري دايما انه مش لازم تشتري اي حاجة في اليوم ده, ببساطة ممكن يبقى اليوم كله لتجربة حاجات جديدة, تفيدك او تلهمك للمستقبل او لما تيجي تشتري في يوم تاني.

نتمنى ان النصايح دي تكون فادتكم, عن ازاي تستفيدي من صاحبتك وتخليها تساعدك في الشوبينج بتاعك, وانك تحبي الستايل الجديد بتاعك.

9 نصايح لستايلك هتساعدك تطلعي بلوك أحلى ومختلف في كل مرة

9 نصايح لستايلك هتساعدك تطلعي بلوك أحلى ومختلف في كل مرة
9 نصايح لستايلك هتساعدك تطلعي بلوك أحلى ومختلف في كل مرة