طريقة عمل الستيك مع صوص المشروم زي المطعم بالخطوات والفيديو
الستيك من الاطباق المميزة جدا, واللي لازم تكون معمولة مظبوطة اوي وصح عشان تطلع حلوة, من اول اختيار قطعة اللحمة لطريقة الطبخ, يعني لازم نهتم بكل حاجة عشان تدينا في النهاية نتيجة زي بتاعة المطعم بالظبط, والنهاردة من خلال موضوعنا هنقولكم طريقة عمل الستيك مع صوص المشروم بالفيديو والخطوات, وقطع اللحمة المناسبة للستيك.
انواع قطع الستيك:
اول حاجة اختيار قطعة اللحمة المناسبة وهنلاقي في اكتر من قطعة في البقرة تنفع انها تتعمل ستيك هنعرفهم مع بعض ونقولك الفرق بين كل نوع.
1- ستيك ريب أي Ribeye:
القطعة دي معروفة كمان باسماء تانية زي Scotch filet, Beauty steak, والقطعة دي بتيجي من القطع الطويلة في ضهر البقرة, والقطعة دي بتتميز ان بيكون فيها نسبة دهون بتديها طعم حلو جدا, ويعتبر النوع ده هو اكتر نوع دسم وطري من بين كل انواع الستيك التانية.
وافضل طريقة لعمل النوع ده هو بالشوي على الجريل, او الشوي على الطاسه, او التحميص من غير دهون هي الدهون اللي فيه بتسيح اثناء الشوي وبتديه طعم حلو جدا.
2- شريحة لحم الوسط:
والشريحة دي معروفة كمان باسم New york strip, والقطعة دي بتتميز بدرجة طراوة متوسطة اقل من القطعة اللي فاتت, وطعمها او نكهتها كمان مش بنفس قوة الريب اي, وكمية الدهون فيها اقل.
3- ستيك البيف تندرلوين:
النوع ده من الستيك معروف كمان باسم الفيليه مينيون, والقطعة دي بتتميز انها طرية جدا زي الزبدة, وفيها نسبة دهون قليلة, وده بيخلي النوع ده طعمة اقل من الانواع التانية.
وافضل طرق لعمل القطعة دي بالشوي على الجريل, او الشوي على الطاسة, وبتاخد وقت اقل على النار من كل الانواع التانية لكن معرضة اكتر انها تنشف بسرعة لان فيها نسبة الدهون قليلة اوي, وبعض الشيفات بيشوا القطعة دي باضافة زيت في الطاسة في البداية وبعدين بيضيفولها قطعة زبدة, وتتقدم مع صوص بنكهة قوية.
4- ستيك تي بون T-Bone:
الجزء ده بيكون من جزئين في وسطهم عضمة على شكل حرف T, الجزء الاولاني منها من البيف تندرلوين, والجزء التاني من لحمة الوسط, وافضل طريقة لعمل النوع ده هو بالشوي على الجريل او التحميص, وبيكون صعب شوية يتعمل على طاسه بسبب وجود العضمة في نص القطعة, لكن لازم تاخدي بالك اثناء الشوي لان ممكن الجزء اللي من قطعة البيف تندرلوين يستوي قبل القطعة التانية ويخليه ينشف معاكي, عشان كده اثناء الشوي ان الجزء ده يكون ابعد عن مصدر الحرارة من لحمة الوسط.
نصايح قبل الشوي:
– قبل ما تبدأي في الشوي لو حافظة اللحمة في الفريزر او في التلاجة طلعيها قبلها وسيبيها لحد ما توصل لدرجة حرارة الغرفة حوالي ساعة, عشان لو متجمدة البرودة مش هتخلي الحرارة توصل لوسط اللحمة.
– اتأكدي ان الطاسة او الصينية اللي هتستخدميها في الشوي تكون سخنة جدا قبل ما تنزلي فيها قطعة اللحمة.
– نزلي قطعة اللحمة في الطاسة وهي سخنة اوي, واختاري درجة السوا اللي انتي عايزاها, وزي ما كلنا عارفين ان في درجات لسوا الستيك.
درجات شوي الستيك:
– ال Bleu: الدرجة دي بتكون تقريبا اللحمة نية تماما من جوه وواخدة لون من بره بس.
– ال English: بتكون مستوية درجة بسيطة عن النوع اللي فات.
– ال Medium rare: سوا نص نية.
– ال Medium: درجة النص سوا.
– Medium well: ده بتكون الدرجة اللي قبل السوا الكامل على طول, ودرجة السوا دي تعتبر افضل حاجة للستيك عشان يبقى جوسي وطعمه حلو.
– ال Well done: درجة السوا الكامل.
طريقة عمل الستيك:
1- هاتي قطعة الستيك تبليها كلها كويس من الجنبين بزيت الزيتون والملح والفلفل الاسود.
2- حطي شريحة اللحمة لطاسة سخنة جدا, وسيبيها تستوي لدرجة الشوي اللي انتي عايزاها, بس اقلبيها على الجنب التاني كل دقيقة تقريبا, وافضل قلبي فيها لحد ما تستوي.
3- عشان تديها نكهة احلى واقوى, ممكن تجيبي راس ثوم تقسميها نصين وخدي نص الراس افركي بيه شريحة اللحمة في كل مره تقلبيها فيها.
4- افركي شريحة اللحمة بقطعة زبدة عشان تديها نكهة احلى.
5- هاتي كام عود من الزعتر الطازة او الروز ماري اربطيهم مع بعض, وخدي بيهم زي الفرشة من الدهون اللي نازلة من اللحمة وادهني بيها شريحة اللحمة كل دقيقة كل ما تقلبيها.
6- بمجرد ما اللحمة توصل لدرجة السوا اللي انتي عايزاها, طلعيها على طبق, وسيبيها ترتاح شوية لمدة دقيقتين وتنزل كل العصارة بتاعتها في الطبق.
7- وكده يبقى الستيك جاهز تقدري تقطعيه شرايح وتاكليه كده من غير اي صوص وتكتفي بس بالصوص اللي نازل منه, او تحطي عليه اي صوص تفضليه, والنهاردة احنا هنقولك معاه طريقة صوص المشروم اللي يعتبر من اشهر انواع الصوصات اللي بتتقدم مع الستيك, وجنبه خضار سوتيه او بطاطس مهروسة.
طريقة عمل الستيك بالفيديو:
طريقة عمل صوص المشروم:
المكونات:
– 2 معلقة كبيرة زبدة من غير ملح.
– ½ معلقة كبيرة زيت زيتون.
– 300 جرام مشروم متقطع شرايح.
– ملح – فلفل.
– 2 فص ثوم مفروم.
– ¼ كوباية صودا “سفن اب”.
– ½ كوباية مرقة خضار او فراخ او لحمة.
– 1 كوباية كريمة طبخ.
– ½ كوباية جبنة بارميزان مبشورة “الافضل مع الستيك بلاش الجبنة, ضيفي الجبنة لو هتحطي الصوص على مكرونة او اي طبق تاني”.
– 2 معلقة صغيرة من اوراق الزعتر الطازة ( او من ¼ – ½ معلقة صغيرة زعتر ناشف).
طريقة التحضير:
1- هاتي طاسة كبيرة حطي فيها الزيت سخنيه وضيفي له الزبدة على نار متوسطة, لما الزبدة تدوب ضيفي المشروم وسيبيه لحد ما يستوي ويبقى لونه بني دهبي, هياخد حوالي من 3 – 4 دقايق, ومش لزام تقلبيه باستمرار وهو على النار.
2- قبل ما المشروم يستوي بدقيقة واحدة ضيفي الثوم المفروم, والملح والفلفل حسب الرغبة, قلبيهم لحد ما الثوم ياخد اللون الدهبي.
3- ضيفي الصودا وقلبي المكونات كلها مع بعض لمدة دقيقة او لحد ما تلاقي معظم الصودا اتبخرت.
4- ضيفي المرقة والكريمة والجبنة البارميزان, وقلبي المكونات مع بعض, وخفضي حرارة النار لحد ما المكونات كلها تغلي مع بعض, ومتعليش النار عشان ممكن الكريمة تفصل, سيبيها تغلي على نار هادية.
5- قلبي الخليط من وقت للتاني وسيبيه على نار هادية لمدة من 2 – 3 دقايق, لحد ما يبقى سميك, لكن ميبقاش سميك اوي يعني قوامة يكون متوسط وغني.
6- حطي الزعتر وقلبيه مع المكونات, وارفعي الصوص من على النار.
وكده الصوص يبقى جاهز, تقدري تحطيه على الستيك اللي حضرناه, وممكن تضيفيه على اكتر من طبق تاني ممكن تضيفيه على المكرونة, بطاطس مخبوزة, اللحم البقري المشوي, الفراخ, او حتى مع العجة او البيض المخفوق.