11 عادة يومية بنعملهم غلط محتاجين نتعلمهم من اول وجديد

بقلمريهام محمود فيمنوعات visibility384

روتينا اليومي مليان بالعادات والطقوس اللي تقريبا معظمنا بيعملها, ويمكن ميعرفش انها ممكن تكون مضره لكن في الحقيقة انها ممكن تضرنا على المدى البعيد من غير ما نحس, والنهاردة من خلال السطور الجاية هنقولكم على مجموعة عادات يومية غلط محتاجة اننا نصححها.

عادات يومية غلط:

1- فك اللحوم المجمدة تحت المية السخنة:

عادة لما بتكوني مستعجلة, هتطلعي اللحمة او الفراخ من الفريزر وهتحطيها تحت المية السخنة عشان تفك بسرعة, لكن الطريقة دي مش صح ومش آمنه على الصحة, زي انك تسيبي اللحوم تفك مع نفسها في درجة حرارة الغرفة قبلها بيوم, بمجرد ما اللحمة تبقى ادفى من 10 درجات مئوية, هتبدأ كل البكتيريا اللي كانت موجودة فيها قبل ما تتجمد انها تتكاثر.

الطريقة الصح:

حطيها في التلاجة: اول طريقة هي انك تطلعيها من الفريزر تحطيها على رف التلاجة العادي, ودي هتحتاج تقريبا يوم كامل عشان تفك, عشان كده لازم تكوني عاملة حسابك ومطلعاها قبل طبخها بيوم.

استخدام المية الباردة: اتأكدي ان اللحمة في عبوة او كيس محكم الغلق ومش بيسرب, عشان متمتصش المية, وحطيها في طبق وحطيها تحت المية الباردة, وغيري المية كل 30 دقيقة لحد ما تفك.

استخدمي الميكروويف: مع الطريقة دي لازم تكوني حذره عشان مافيش اجزاء منها تسخن زيادة عن اللزوم وتبدأ انها تستوي, وبعد ما تفك لازم تطبخيها مباشرة.

عادات يومية غلط
عادات يومية غلط

2- بتبصي لتحت على موبايلك بالساعات:

الموبايلات دلوقتي بقت في ايدينا تقريبا طول الوقت, والطريقة اللي بنستخدمها بيها ممكن تأثر على صحتنا بشكل مباشر, يعني لو مثلا دايما بتمسكية لتحت قريب من الصدر لفترة طويلة مع تني الرقبة, ده ممكن يطور حاجة اسمها “الرقبة النصية” Text neck والوضع ده رقبتك مش هتبقى مرتاحة فيه ابدا, وممكن انه يسبب تيبس او تصلب شديد في الرقبة, والم, وضعف عضلي, وصداع.

الطريقة الصح:

الموبايل لازم يكون في مستوى العين مش تحت.

لازم تاخدي استراحة من استخدام الموبايل, وتعملي استريتشنج او تمدد لرقبتك.

حافظي على ضهرك مفرود وانتي قاعدة.

عادات يومية غلط
عادات يومية غلط

3- مش بتنهي الشاور بتاعك بمية باردة:

حتى لو مش بتحبي استخدام المية الباردة, لكن الخطوة دي ليها فوايد صحية كتير جدا, التبديل ما بين المية السخنة والباردة ده بيساعد على تحسين الدورة الدموية, تحسين تدفق الغدد اللمفاوية, تقوية جهاز المناعة, تحسين حالة بشرتك, حتى انها كمان بتساعد على التخلص من التوتر وتحفيز فقدن الوزن, بس انهي الشاور بتاعك بمية باردة لمدة من 10 – 30 ثانية هتفرق معاكي جدا وهتلاحظي نتايج مذهلة.

الطريقة الصح:

ابدأي الشاور بتاعك بالمية الدافية العادية, وفي اخر الشاور قللي درجة الحرارة وخليكي تحت المية الباردة لمدة 10 ثواني في البداية, وبعدها زودي الوقت لحد ما توصلي لمدة 30 ثانية.

عادات يومية غلط

4- بتغسلي وشك بعد التمرين, ومش قبله:

اكيد غسل الوش بعد الجيم مفيد لانه بينضف البشرة من اثار العرق, لكن مع ذلك بننسى عادة غسل الوش قبل التمرين كمان, مهم جدا انك تغسلي وشك بشكل صحيح وتشيلي كل المكياج والاتربة قبل التمرين, لانك لو معملتش كده ممكن الاتربة والمكياج يتفاعل مع العرق اثناء التمرين ويسد المسام ويسببلك مشاكل في البشرة, وغسل كل ده بعد التمرين معناها انك بتفركي عرق واتربة وزيوت اكتر على جلدك, وده في النهاية هيأدي لمشاكل كتير لجلدك.

الطريقة الصح:

اتأكدي انك شيلتي كل المكياج وغسلتي وشك قبل التمرين.

اثناء التمرين متمسحيش العرق من على وشك, لان ده ممكن يدخل الاتربة ولو في لسه بقايا مكياج لجوه المسام ويسدها, حاولي بس انك تتخلصي من العرق بفوطة عن طريق الضغط او الطبطبة بس من غير فرك.

اغسلي وشك بعد التمرين.

عادات يومية غلط

5- مش بتغسلي الخضروات تاني:

في انواع خضار ممكن نشتريها من السوبر ماركت بتكون مغلفة ومغسولة قبل التغليف, ولكن ده مش معناه ان المنتج نضيف بنسبة 100% وجاهز للاستخدام, بردوا ممكن انها متخلاش من الاتربة او بعض بقايا المواد الكيميائية, عشان كده حتى لو مكتوب عليها انها مغسولة قبل التغليف لازم تتغسل تاني.

الطريقة الصح:

افضل طريقة عشان تتخلصي من اي حاجة على الخضروات تغسليها تحت المية الجارية لمدة دقيقتين قبل الاستخدام.

عادات يومية غلط

6- استخدام الجهزة الالكترونية على السرير:

استخدام الاجهزة الالكترونية قبل النوم على طول ده ممكن يضرك ويسبب مشاكل كتير, لان الضوء اللي طالع من شاشة التليفون لعينك مباشرة بيقلل من انتاج الميلاتونين اللي بينظم نومك, وده هيخليكي تحسي بالتعب وهيأثر على تركيزك.

الطريقة الصح:

اثناء النوم حاولي تخلي اي اجهزة الكترونية بره الغرفة خالص.

الافضل قبل النوم انك تقري كتاب او تسمعي موسيقى مريحة بدل استخدام الموبايل.

لو في حاجة ضرورية عايزة تبصي عليها في الموبايل قبل النوم اظبطي الشاشة على “الوضع الليلي” Night shift لان ده هيقلل من الضوء الازرق اللي خارج منه.

7- منع العطسة:

منع العطسة ممكن يسبب مشاكل خطيرة, لان ده ممكن يدخل هوا في الصدر بين الرئتين, ممكن انه يسبب كسر في طبلة الاذن, ممكن كمان يسبب تضخم في الاوعية الدموية في المخ, والعطس يعتبر الطريقة الطبيعية للانف لاعادة الظبط والتخلص من البكتيريا والغبار, عشان كده الافضل اننا نسيبها على طبيعتها.

الطريقة الصح:

لو مش عايزة تحصل اي مشاكل سيبي العطسة تخرج بطبيعتها, بس غطي الانف اثناء العطس بمنديل او بايدك, ولكن من غير ضغط على الانف.

8- منع الغازات:

الغازات اكيد حاجة مش لطيفة ومشكلة محرجة جدا, عشان كده هنلاقي كتير بيحاولوا باقصى جهدهم انهم يمنعوها من الخروج, ولكن للاسف الغازات دي مش بتختفي جوه الجسم وتبقى كده انتهت المشكلة, لكن الحقيقة انها بتحاول تدور على طريقة تانية للخروج, على سبيل المثال عن طريق الفم, لانك لما بتمنعيها من الخروج بالشكل الطبيعي بتضغطي عليها وده ممكن يخلي البطن تتمدد وممكن الدورة الدموية تمتصها وده معناه ان بعض الغازات دي ممكن تخرج اثناء الزفير من الفم.

الطريقة الصح:

لو حسيتي انك محتاجة تخرجي غازات روحي لمكان منعزل ممكن التويلت او اي مكان مافيهوش حد وسيبيه يخرج بشكل طبيعي.

لو بتعاني من غازات كتير, حاولي انك اثناء الاكل تمضغي ببطء, لان ده هيقلل الهوا في المعدة وبالتالي هيقلل من مشكلة الغازات, اتجنبي الاطعمة اللي ممكن تسبب غازات او تزودها.

لو حسيتي انك دايما عندك كمية زيادة من الغازات, الافضل انك تستشيري دكتور.

9- بتسمعي موسيقى عالية بالهيدفون:

اكيد السماعات بتديكي خصوصية وبتخليكي تسمعي اللي انتي عايزاه براحتك, لكن رغم ذلك لازم تحطي في اعتبارك ان استخدامها بطريقة غلط ممكن يضرك, في بعض الاحيان لو بتحبي اغنية معينة اوي بتبدأي ترفعي الصوت زيادة لمستوى ممكن يضرك, لان الصوت العالي اوي ممكن يأدي لتلف السمع او حتى فقدان السمع خالص.

الطريقة الصح:

حاولي انك تستخدمي سماعات تكون عالةي الجودة وفيها نظام عزل الضوضاء او الاصوات اللي حواليكي بحيث انك متحتاجيش تعلي الصوت حتى لو بتسمعي وانتي في الشارع.

لو بتسمعي موسيقى في مكان هادي, قللي الصوت على قد ما تقدري, وقصري وقت السمع.

10- شرب القهوة اول ما تصحي من النوم على طول:

فنجان القهوة اساسي عند اشخاص كتير كل يوم الصبح, لكن اجسامنا بتنتج هرمون اسمه الكورتيزول, واللي اسمه كمان “هرمون الاجهاد” واللي انتاجه بيزيد لما نحس بالخوف او التوتر, وانتاج الهرمون ده بيكون مرتفع الصبح بشكل خاص ولما بتشربي قهوة والكافيين بيتفاعل معاه, الجسم بعد كده بيبدأ يخلق او بينتج مستويات اقل من الهرمون ده وبيعتمد على الكافيين اكتر, وده بيخلينا ناخد زيادة الطاقة من القهوة بدل الجسم وده مش صحي.

الطريقة الصح:

قللي استهلاكك اليومي من القهوة.

لو محتاجة انك تشربي فنجان قهوة الصبح, يبقى اشربي كوباية واحدة بس بعد حوالي 3 ساعات من الصحيان من النوم.

11- استخدام منتجات مضادات الجراثيم:

كتير مننا ممكن يكون بيستخدم معقمات اليد بشكل مستمر, لكن معظم المنتجات اللي ضد البكتيريا والجراثيم بتحتوي على مكون اسمه التريكلوسان, وممكن البكتيريا اللي بتلمسه تتفاعل معاه وتتطور وتبقى مقاومة ليه ولبعض المضادات الحيوية وتخلي الجسم ميستجبش ليها.

الطريقة الصح:

مافيش حاجة بتقتل البكتيريا افضل من الصابون العادي, حاولي انك تغسلي ايدك بيه كل ما تيجي قدامك فرصة, بدل ما تستخدمي المطهرات او مضادات البكتيريا.

يا ترى بتعملي كام عادة غلط من العادات اللي احنا قولناها دي بشكل يومي؟

افكار وعادات صحية لازم تغيريها

عادات صحية لازم تغيريها
عادات صحية لازم تغيريها