بالخطوات .. طريقة عمل وصفة الريش الضاني بالروزماري Rosemary Crusted Lamb

آية حسان

في

851

عيد الأضحى خلاص على الأبواب وده معناه انه جه وقت اللحمة الضاني، ولأنه من وقت للتاني لازم نجدد من طريقة الطبخ والتقديم، فلو كنتي زهقتي من الفتة واللحمة المشوية في المقال ده هنقولك على طريقة جديدة، اعرفي معانا بالخطوات .. طريقة عمل وصفة الريش الضاني بالروزماري Rosemary Crusted Lamb اللذيذة والسهلة

بالخطوات .. طريقة عمل وصفة الريش الضاني بالروزماري Rosemary Crusted Lamb

وقت التحضير :

50 دقيقة

عدد الأفراد :

تكفي لفردين

المقادير :

من 2 لـ 4 قطع ريش ضاني عريضة (زي اللي في الصورة)

معلقتين كبار روزماري

معلقة صغيرة ملح

معلقة صغيرة فلفل أسود مطحون

فص توم مفروم

4 معالق زيت زيتون.

طريقة التحضير

الخطوة الأولى:

تبلي الريش الضاني، عشان تعملي وصفة الريش الضاني بالروزماري وتطلع مظبوطة هتحتاجي تتبلي الريش في بولة صغيرة وتضيفي معاها مقدار الروزماي و الملح والفلفل ومعلقتين من زيت الزيتون، غطي الريش كويس بالمزيج ده وادعكي اللحمة بيه كويس ، وبعدين غطي البولة وسيبي الريش منقوعه في الخليط ده لحوالي نص ساعة لـ 45 دقيقة عشان الريش تتشرب التتبيلة كويس. وممكن تحطيها في التلاجة او تسيبيها في درجة حرارة المطبخ عادي.

الخطوة التانية :

في طاسة غويطة مابتلزقش وتكوني سخنتيها كويس، حطي معلقتين زيت الزيتون اللي فاضلين ولما الزيت يسخن حطي الريش في الطاسة وسيبيها تستوي لمدة من دقيقتين لـ 3 دقايق على كل جنب عشان توصلي لمستوي سواء medium- rare ، أو هتبقى نص سواء، أما لو عايزة الرش تكون مكتملة النضوج او well done فممكن بعد مرور الـ 3 دقايق او لما توصل للون البني المطلوب على كل جنب تحطيها في طاسة تانية صغيرة بدون ايد او صينية مناسبة للفرن وغطيها بفويل، وتحطيها في فرن سخن على درجة حرارة 200 من 5 لـ 10 دقايق عشان تكمل السواء .

بعد ما تطلعيها من الفرن سيبيها ترتاح حوالي 5 دقايق وبعد كده هتكون جاهزة للتقديم، يلا جربيها في العيد وشاركينا رأيك في الوصفة.