طريقة عمل كرسبي تشيكن بروست Crispy Chicken Broast بالخطوات والفيديو

بقلمريهام محمود فيمطبخ visibility300

مافيش حد فينا مش بيحب وجبات الفراخ, ومن اكتر الطرق اللي طعمها حلو جدا هي التشيكن بروست, هي وجبة لذيذة ومليانة بالقيمة الغذائية وبيحبها الصغيرين والكبار, واللي تقدري تقدميها مع العيش الكيزر والبطاطس المحمرة مع الكاتشب وسلطة الزبادي كوجبة غدا او عشا, والنهاردة هنقول لكل بنات حوا طريقة عمل كرسبي تشيكن بروست بالخطوات والفيديو وهتطلع معاكي زي بتاعة المطعم بالظبط.

طريقة عمل كرسبي تشيكن بروست:

المكونات:

6 قطع فراخ بالجلد “حوالي ½ كيلو”.

1 معلقة كبيرة عصير ليمون.

كوباية لبن دافي.

ملح “حسب الرغبة”.

2 معلقة كبيرة خل.

1 معلقة كبيرة ثوم مفروم ناعم جدا.

1 معلقة صغيرة شطة.

1 معلقة صغيرة فلفل.

1 معلقة صغيرة بابريكا.

1 كوباية دقيق.

1 معلقة صغيرة ثوم بودر.

2 معلقة كبيرة نشا.

بيضة.

مية.

2 كوباية دقيق.

من 2 – 3 معالق صغيرة بابريكا.

كرسبي تشيكن بروست
كرسبي تشيكن بروست

طريقة التحضير:

1- اول خطوة هنحضر اللبن الرايب لو معندكيش لبن رايب متوفر في البيت, هاتي طبق كبير حطي فيه كوباية لبن عادي مع عصير الليمون, قلبيهم مع بعض وسيبيهم يرتاحوا لمدة من 5 – 8 دقايق اللبن هيفصل وهيبقى رايب وكده يبقى جاهز للاستخدام في الوصفة.

كرسبي تشيكن بروست
كرسبي تشيكن بروست

2- هنحضر تتبيلة الفراخ, هاتي طبق تاني كبير حطي فيه قطع الفراخ وصبي عليها ½ كوباية لبن رايب من اللي حضرناه الخطوة اللي فاتت, وضيفي عليهم الملح, الخل, الثوم المفروم, الشطة, الفلفل, البابريكا, قلبي الخليط كله مع بعض كويس جدا لحد ما تغطي الفراخ كلها بالخليط, حطي خليط الفراخ في التلاجة لمدة ساعتين على الاقل او من بالليل للصبح.

كرسبي تشيكن بروست
كرسبي تشيكن بروست

3- دلوقتي هنحضر الخليط اللي هنغطي بيه الفراخ عشان نحمرها, هاتي طبق كبير حطي فيه كوباية دقيق, الثوم البودر, النشا, ملح, البيضة, قلبي المكونات مع بعض وضيفي عليهم مية بالتدريج لحد ما الخليط يبقى ناعم وسلس معاكي مش سميك ولا سايل اوي.

كرسبي تشيكن بروست

4- هنحضر الدقيق اللي هنغلف بيه قطع الفراخ بعد الخليط اللي فات, هاتي طبق كبير حطي فيه كوبايتين دقيق, ومن 2 – 3 معالق صغيرة بابريكا, ملح.

كرسبي تشيكن بروست

5- دلوقتي جيبي قطع الفراخ اغمسيها في خليط الدقيق السايل, وبعدين غطيها كلها بخليط الدقيق المتبل.

6- بعد ما تتبلي قطع الفراخ كلها حمريها في زيت غزير سخن على نار متوسطة لحد ما لونها يتحول للدهبي وتبقى كرسبي, قدميها مع البطاطس المحمرة مع الكاتشب وسلطة الزبادي المتبلة.

كرسبي تشيكن بروست

الطريقة بالفيديو:

أجنحة الفراخ المشوية الحارة مع صوص الرانش

أجنحة الفراخ المشوية