9 استخدامات للشمع مكنتيش تعرفيهم قبل كده

بقلمريهام محمود فيمنوعات visibility458

لما هنقول “شمع” كل اللي هيجي في بالنا هو استخدامه في الاضاءة مش اكتر من كده, لكن الحقيقة ان الشمع نقدر نستخدمه في حاجات كتير وبطرق مختلفة في البيت, وكمان تقدري تستخدميه استخدامات جمالية وعلاجية, وده اللي هنعرفه النهاردة مع بعض من خلال السطور الجايه هنقول لكل بنات 9 استخدامات للشمع وازاي تستفادي منه بطرق مختلفة.

9 استخدامات للشمع:

1- كمادة حافظة:

الشمع ممكن تستخدميه كمادة حافظة, كتير بيفضلوا عمل المربى في البيت خصوصا لو عندك كمية فاكهة كتير وعايزة تستفادي بيها, لكن طبعا لان المربى اللي معمولة في البيت بيكون فيها نسبة سكر اقل ومش بتحتوي على اي مواد حافظة مقارنة بالجاهزة اللي بتتباع بره عشان كده ده ممكن يكون سبب انها تبوظ بسرعة, وعشان تحافظي عليها المفروض تمنعي ان الهوا يدخلها وده ممكن يحصل باستخدام الشمع.

كل اللي هتعمليه هاتي الشمع وسيحيه خالص, وبعدين صبيه واحدة واحدة على وش البرطمان, وامسكي البرطمان لفي الشمع حوالين داير عشان تتأكدي ان الشمع مغطي الوش كله.

استخدامات للشمع
استخدامات للشمع

2- ختم الازايز:

لو عملتي اي حاجة في البيت وخزنتيها في ازايز, تقدري تستخدمي الشمع عشان تختمي الازازة وتحفظيها.

سيحي الشمع, ولفي حوالين الازازة من فوق سيلوتيب, لان ده هيخليكي تفتحي ختم الازازة بسهولة بعد كده لما تحبي تستخدميها, بعدها اغمسي الازازة من فوق في الشمع السايح ولفيها بحيث ان الشمع يغطي كل الجوانب.

استخدامات للشمع
استخدامات للشمع

3- تليين الادراج:

الادراج مع الوقت وكتر الاستخدام الخشب بيخشن ومش بتبقى سهلة في الفتح والقفل, وعشان تعيدي تليينها تاني, افركي قطعة شمع عليها من تحت.

استخدامات للشمع
استخدامات للشمع

4- الشمع للابواب والشبابيك:

كمان الابواب والشبابيك ممكن مع الوقت تبقى تقيلة وتعمل صوت في الفتح والقفل, وعشان تحافظي على قفلها وفتحها بسلاسة وسهولة, مرري شمع على المفصلات والاطارات بتاعتها.

استخدامات للشمع
استخدامات للشمع

5- تصليح السوستة:

لو عندك سوستة معلقة, الشمع هيكون افضل حل لتصليحها.

هاتي قطعة شمع وافركيها على السوستة بخفة فوق وتحت, وممكن تحتاجي انك تكرري العملية دي اكتر من مرة لحد ما السوستة تفك معاكي.

استخدامات للشمع

6- للتخلص من الثلج:

الاستخدام ده للاشخاص اللي ممكن يكونوا عايشين بره مصر في مناطق فيها ثلج, عارفين كويس جدا المشكلة دي اللي تقريبا بيقابلوها يوميا في موسم الشتا, انهم بيحتاجوا يشيلوا التلج يوميا من قدام البيت, والتلج ممكن يلزق في الجاروف وميكونش سهل التخلص منه, وده بيصعب المشكلة اكتر وبيخليكي تاخدي وقت اطول, لكن الشمع هيساعدك في حل المشكلة دي.

كل اللي هتعمليه افركي الثلج من على الجاروف بالشمع هيطلع معاكي بسهولة.

استخدامات للشمع

7- للحفاظ على لوح التقطيع الخشب:

لوحة التقطيع بنستخدمها على طول لتقطيع الاكل يوميا تقريبا, ولازم نحافظ عليها دايما نضيفة ونستخدم طريقة سهلة لتنضيفها, واللي هيساعدك في المهمة دي هو الشمع.

هاتي كمية صغيرة من الشمع لفيها في قطعة قماش نضيفة او استخدمي الشمع مباشرة على اللوح, وافركي بيه اللوح كله, واتأكدي انك غطيتي سطح لوح التقطيع كله بالشمع, سيبيها شوية عشان تتأكدي انه امتص الشمع كله, وبعدها زيلي اي بقايا شمع من على اللوح بقطعة قماش نضيفة وجافة, الطريقة دي هتنضف اللوح تنضيف فعال جدا, وكرري العملية حسب الحاجة كل ما اللوح يحتاج تنضيف.

8- علاج للايدين:

ايدينا بنستخدمها في كل حاجة وبتتعرض للمية والبرد والحرارة, وعوامل كتير ممكن يخلي جلد الايدين جاف, وهنا هتيجي مهمة الشمع يعتبر علاج فعال لتنعيم الايدين.

دوبي الشمع ولما يوصل لدرجة حرارة منخفضة خالص الجلد يقدر يتحملها, اغمسي ايدك فيه, بعدها طلعي ايدك من الشمع والبسي كيس بلاستيك, والبسي فوقيه جوانتي قماش, سيبيه من 10 – 15 دقيقة وبعدها افركي الشمع بالراحة من على ايدك, كرري العملية لايدك التانية, ممكن تحتاجي انك تكرري نفس الطريقة اكتر من مرة لنتايج افضل.

9- علاج للقدمين:

العملية دي تشبه لعمليه علاج الايدين, وبتساعد على تنعيم القدمين وعلاج تشققات الكعوب.

هتعملي نفس الطريقة اللي فاتت, اغمسي رجلك في شمع حرارته منخفضة, والبسي كيس بلاستيك في رجلك او استخدام غلاف بلاستيك شفاف لفي بيه الرجل, ولفي القدم بفوطة او ممكن تلبسي شراب, سيبيه من 10 – 15 دقيقة وبعدها افركي الشمع من على القدمين, كمان ممكن تحتاجي تكرريها اكتر من مرة لنتايج افضل.

ياللا جربوا استخدامات الشمع اللي عرفتوها معانا النهاردة وشاركونا تجاربكم.

10 استخدامات صحية وجمالية غير تقليدية للملح

استخدامات الملح الجمالية والصحية
استخدامات الملح الجمالية والصحية