طريقة عمل كعكة الارز الكوري “الدكبوكي الحار” بالخطوات والفيديو

المطبخ الكوري واحد من الماطبخ اللي ليها شهرة عالمية, وفي الفترة الاخيرة بشكل خاص بدأت تنتشر في المنطقة العربية بعض الاكلات الكورية المشهورة واللي بنكون نفسنا نجربها, وواحدة من الاكلات دي هي كعكة الارز الكوري “الدكبوكي”, تعتبر واحدة من اشهر الاكلات في المطبخ الكوري, والنهاردة من خلال موضوعنا هنقولك طريقة كعكة الارز الكوري بالتفصيل, وازاي تعملي بيه اكلة الدكبوكي الحار.

طريقة كعكة الارز الكوري:

المكونات:

2 كوباية ارز مطحون حبة قصيرة “الارز المصري العادي”.

½ معلقة صغيرة ملح.

كوباية مية مغلية “ممكن تحتاجي مية اكتر او اقل حسب تماسك العجينة معاكي”.

1 معلقة صغيرة زيت سمسم.

طريقة كعكة الارز الكوري
طريقة كعكة الارز الكوري

الطريقة:

– ممكن تستخدمي دقيق الارز الجاهز من السوبر ماركت, لو مش متوفر استخدمي الارز المصري العادي انقعيه من 8 – 10 ساعات وبعدين اطحنية ناعم جدا وانخليه, وكده يبقى جاهز للاستخدام.

– في طبق كبير اخلطي دقيق الارز مع الملح والمية المغلية, ضيفي المية المغلية بالتدريج لحد ما تلاقي ان العجينة متماسكة معاكي المفروض متكونش طريه اوي, هي المفروض تتعمل على البخار لو مش متوفر الحلة بتاعة البخار, حطي حله فيها مية وفوقيها حلة تانية اصغر, وحطي عجينة الارز في ورق زبدة وحطيها في الحلة اللي فوق وغطيها وسيبيها لمدة 25 دقيقة تستوي على البخار على نار خفيفة.

– لو عندك ميكروويف هتحطيها في الميكروويف على طول, غطيها بكيس بلاستيك, ودخليها الميكروويف لمدة دقيقتين, طلعي العجينة اعجنيها شوية ودخليها الميكروويف تاني لمدة دقيقتين كمان.

– على الرخامة ادهني زيت سمسم وهاتي العجينة وابدأي اعجنيها افردي واتني فيها كذا مره, وممكن تستخدمي ايد الهون تفضلي تتنيها وتدوسي عليها بايد الهون كذا مره كويس جدا لحد ما تبقى ناعمة في ايدك وبتمط شوية, الخطوة دي مهمة جدا لانها على اساس نجاح العجينة.

– قطعي العجينة ل 8 قطع متساوية, وابرمي كل قطعة على شكل اسطوانة طويلة, وبعدين قطعي كل اسطوانة لصوابع متساوية الطول.

– في الاخر ادهني ايدك بزيت السمسم وامسكي كل الصوابع اللي عندك غلفيها كلها بالزيت, هيديهم نكهة وفي نفس الوقت هيمنع انهم يلزقوا في بعض.

– كده كعكة الارز تبقى جاهزة عندك لعمل الدكبوكي, لو هتعمليه على طول سيبي العجينة تبرد وترتاح شوية وبعدين استخدميها, ولو هتعمليه وقت تاني احفظيه في كيس في الفريزر, ولما تيجي تستخدميه طلعيه وسيبيه يفك خالص او انقعيه في مية عادية بدرجة حرارة الغرفة لمدة 30 دقيقة لحد ما يفك وبعدين استخدميه.

طريقة كعكة الارز الكوري

الطريقة بالفيديو:

طريقة عمل الدكبوكي:

المكونات:

250 جرام من كعكة الارز اللي احنا جهزناها.

2 معلقة كبيرة صلصة.

1 معلقة كبيرة صويا صوص.

معلقة كبيرة زيت سمسم.

شطة.

معلقة كبيرة زيت سمك “لو متوفر”.

2 معلقة صغيرة عسل “اختياري”.

1 معلقة صغيرة ثوم مفروم.

1 معلقة صغيرة جنزبيل مفروم.

2 معلقة كبيرة بصل اخضر متقطع.

120 جرام نودلز.

طريقة عمل الدكبوكي

الطريقة:

– في حلة على النار حطي زيت السمسم وضيفي له الثوم والجنزبيل المفروم, وشطة حسب الرغبة, بعدها ضيفي الصلصة ومعاها شوية مية صغيرين, وبعدها ضيفي الصويا صوص والعسل وقلبي المكونات كلها مع بعض كويس, وبعدها ضيفي زيت السمك لو متوفر ولو مش موجود تقدري تستغني عنه وتكتفي بالصويا صوص بس.

– سيبي الخليط يغلي على نار خفيفة لمدة 5 دقايق, وبعدين ضيفي كمية المية المناسبة للنودلز اللي عندك سيبيها تغلي وبعدين ضيفي النودلز والتوابل بتاعتها, وكعكة الارز, سيبي الخليط يغلي على نار متوسطة لمدة 10 دقايق تقريبا.

طريقة عمل الدكبوكي

– في اخر 3 دقايق ضيفي لها البصل الاخضر وقلبيهم مع بعض, وبعدين ارفعيها من على النار, وكده يبقى الدكبوكي جاهز, قدميه في الطبق ورشي على الوش سمسم.

طريقة عمل الدكبوكي

– تقدروا تعملوا الدكبوكي بكعكة الارز لوحدها من غير النودلز, بنفس الطريقة بس هتقللوا كمية المية شوية وتحطوا مية على قد كمية كعكة الارز اللي هتعملوها.

طريقة عمل الدكبوكي

وعادة الكوريين بياكلوه مع البيض المسلوق, ممكن في الاخر خالص تقطعي بيض مسلوق شرايح وتضيفيه معاه.

طريقة عمل الدكبوكي

الطريقة بالفيديو:

طريقة عمل الراتاتوي “خلطبيطة بالصلصة” بالخطوات والفيديو

طريقة عمل الراتاتوي