اسرار جمال النساء اللاتينيات للبشرة والشعر والضوافر

بقلمريهام محمود فيشعر visibility1192

المرأة اللاتينية من النساء المعروفين بجمالهم على مستوى العالم, واكيد مش صدفة ان كلهم بيتميزوا بشعر ناعم وصحي وبشرة مثالية خالية من العيوب, في علاجات او روتين معظمهم تقريبا بيكونوا ماشيين عليه عشان يحافظوا على جمالهم, ولو انتي عايزة توصلي النتايج دي, اقري المقالة بتاعتنا النهاردة اللي هنقولك فيها اسرار جمال النساء اللاتينيات للبشرة والشعر والضوافر من خلال مجموعة من الوصفات اللي بيستخدموها.

اسرار جمال النساء اللاتينيات:

1- وصفة المايونيز للترطيب العميق للشعر:

المكونات:

½ كوباية مايونيز.

½ كوباية زيت زيتون.

الطريقة:

اخلطي المكونين مع بعض وقلبيهم كويس, طبقي الخليط على فروة الراس والشعر, غطي شعرك بفوطة سخنة وسيبيه لمدة 30 دقيقة, بعدها اغسلي شعرك بشامبو خالي من السلفات ومية باردة.

كرري الوصفة مرة واحدة في الاسبوع.

المكونات اللي موجودة في الوصفة بتساعد على ترطيب وتغذية الشعر بشكل فعال جدا, وكمان بتساعد على علاج الشعر التالف.

اسرار جمال النساء اللاتينيات
اسرار جمال النساء اللاتينيات

2- زيت الزيتون للضوافر:

المكونات:

3 معالق كبيرة زيت زيتون.

بوله صغيرة.

الطريقة:

حطي زيت الزيتون في البولة وسخنيها في الميكروويف لمدة 10 ثواني, ولو مش متوفر ميكروويف ممكن تسخنيه شوية على حمام مية سخنة, بعدها انقعي ضوافرك في زيت الزيتون لمدة من 10 – 20 دقيقة, طلعي ضوافرك من زيت الزيتون وابدأي دلكيها ودلكي الجلد اللي حوالين الضوافر لمدة دقيقة, وسيبي الزيت على ضوافرك طول الليل واغسليه الصبح.

كرري الوصفة 3 مرات في الاسبوع.

زيت الزيتون بيدخل جوه الجلد والضوافر بعمق, وده بيساعد على اصلاح الضوافر وترطيبها والحفاظ عليها من التكسر وتقويتها وبيحافظ عليها صحية, وكمان بيرطب ويغذي الجلد اللي حوالين الضوافر.

اسرار جمال النساء اللاتينيات
اسرار جمال النساء اللاتينيات

3- جوز الهند لترطيب الجسم:

المكونات:

1 كوباية من زبدة الشيا.

½ كوباية من زيت جوز الهند.

8 نقط من اي نوع زيت عطري.

الطريقة:

على حمام مية سخنة اخلطي زبدة الشيا مع زيت جوز الهند وسيبيهم لحد ما يدوبوا, ولما تبرد ضيفي لهم الزيت العطري واحفظي الخليط  في التلاجة, سيبيه لحد ما يجمد شوية وبعدين طلعيه واضربيه بالبلندر لحد ما يبقى كريمي وخفيف, احفظيه في اي علبة فاضية واستخدميه كلوشن مرطب ومغذي للجسم دلكي بيه جسمك بعد الشاور.

اسرار جمال النساء اللاتينيات

4- بلسم العسل للشعر:

المكونات:

3 معالق كبيرة من زيت جوز الهند.

صفار بيضة.

1 معلقة صغيرة عسل.

6 نقط من اي نوع زيت عطري.

الطريقة:

اخلطي كل المكونات وامزجيهم مع بعض كويس, قسمي شعرك خصل وحطي الخليط على كل خصلة ودلكيه لمدة كام دقيقة, لمي الشعر كله كحكة وغطيه بفوطة سخنة واستخدمي هوا السيشوار السخن فوقيها, سيبيه من 2 – 3 ساعات, وبعدين اغسليه كويس بمية دافية.

كرري الوصفة مرتين في الاسبوع.

العسل بيساعد على ترطيب ترطيب وتقوية بصيلات الشعر, كمان بيحتوي على خصائص مضادة للجراثيم اللي بتساعد تنضيف فروة الراس وتهدئتها.

اسرار جمال النساء اللاتينيات

5- مية الورد للبقع وحب الشباب:

المكونات:

من 4 – 5 نقط من زيت شجرة الشاي.

من 40 – 50 نقطة من مية الورد.

الطريقة:

اخلطي زيت شجرة الشاي مع مية الورد كويس, خطي بقطعة قطن من الخليط, وادهني بيها مكان البقع وحب الشباب, سيبيه لما ينشف, واغسلي البشرة بمية باردة.

كرري الوصفة دي مرتين في اليوم يوميا لحد ما توصلي للنتايج اللي انتي عايزاها.

مية الورد بتساعد على امتصاص الزيوت الزيادة من البشرة وتنضيف المسام من الشوائب اللي ممكن تسبب ظهور البثور وحب الشباب, وزيت شجرة الشاي فعال في علاج البقع الغامقة.

اسرار جمال النساء اللاتينيات

6- الكوكاكولا للشعر:

المكونات:

200 ملل كوكاكولا.

1 معلقة كبيرة شامبو.

الطريقة:

اول حاجة بلي الشعر بالمية, اخلطي المكونات مع بعض في طبق كبير وقلبيهم مع بعض كويس, هاتي فوطة وحطيها في الخليط لحد ما تشربه كله, اعصري الفوطة لحد ما تتخلصي من السوايل الزيادة جوه الطبق, اقلبي شعرك كله على قدام وبكوباية او بايدك وزعي الخليط على الشعر, وبعدين حطي الفوطة المبلولة على الشعر من فوق وسيبي شعرك منقوع في الخليط لمدة 5 دقايق, بعدها اغسلي شعرك بمية دافية والشامبو البلسم.

كرري الوصفة مرة واحدة في الاسبوع.

الكوكاكولا بتحتوي على درجة حموضة منخفضة, اللي بتساعد على تنعيم الشعر.

7- رمل البحر كسكراب للجسم:

المكونات:

1 معلقة كبيرة من زيت جوز الهند.

2 معلقة كبيرة من رمل البحر.

2 معلقة صغيرة من زيت المشمش “ممكن تستبدليه بزيت الزيتون”.

½ معلقة صغيرة طحالب مطحونة “هنلاقيها عند العطار”.

½ معلقة صغيرة فيتامين C ” ممكن تجيبوا اقراص الفيتامين من الصيدلية وتطحنوها” او “تستخدموا زيت فيتامين C”.

الطريقة:

اخلطي كل المكونات كلها مع بعض كويس, رطبي جسمك بمية دافية عشان تفتحي المسام, خدي من الخليط ودلكي بيه الجسم لمدة 5 دقايق في حركات دائرية, وبعدها اغسليه بالمية, ونشفي جسمك ورطبيه بالمرطب.

كرري السكراب مرتين في الاسبوع.

الرملة تعتبر مقشر طبيعي للبشرة بيساعد على تنضيف البشرة من خلايا الجلد الميتة وتنعيم البشرة.

8- العنب والنشا للبشرة:

المكونات:

3 معالق كبيرة عنب احمر.

1 معلقة كبيرة نشا او دقيق ذرة.

الطريقة:

اغسلي العنب كويس, اضربيه في الخلاط لحد ما ينعم ويبقى سايل, ضيفي له النشا وقلبيهم لحد ما يتكون عندك خليط قوامه مناسب, افردي الخليط على البشرة وسيبيه لمدة 10 دقايق, وبعدين اغسليه بمية باردة.

كرري الوصفة من 1 – 2 مرة في الاسبوع.

العنب غني جدا بمضادات الاكسدة اللي بتساعد على علاج بهتان البشرة والتجاعيد, وتفتيح الجلد.

9- السكر والليمون لتقشير الجسم:

المكونات:

1 كوباية سكر ابيض.

¼ كوباية من زيت جوز الهند.

15 نقطة من زيت الليمون.

الطريقة:

اخلطي المكونات كلها مع بعض كويس, بلي جسمك بالمية, وخدي من الخليط دلكي بيه البشرة في حركات دائرية من 2 – 3 دقايق, بعدها اغسلي البشرة بمية فاترة, ونشفيها ورطبيها بالمرطب.

كرري الوصفة مرتين في الاسبوع.

السكر بيساعد على تقشير الجلد بشكل طبيعي, وزيت جوز الهند بيساعد على ترطيب وتنعيم وتغذية الجلد.

10 اسرار جمالية كورية كل بنت محتاجة تعرفهم

اسرار جمالية كورية
اسرار جمالية كورية