10 حاجات هتحصل لبشرتك وجسمك لما تتوقفي عن استخدام المكياج

بقلمريهام محمود فيبشرة visibility1466

معظم البنات, المكياج يعتبر اساسي في روتينهم اليومي, والابحاث اظهرت ان 44% من النساء مش بيخرجوا من البيت غير بالمكياج, حتى في المشاوير القريبة, وبقى المكياج طبيعي جدا في ثقافتنا لدرجة اننا ممكن نستغرب لو لقينا واحدة مش حاطه مكياج, لكن احنا النهاردة من خلال موضوعنا هنقولك مميزات عدم استخدام المكياج وهنعرف مع بعض 10 حاجات هتحصل لجسمك لما تتوقفي عن استخدام المكياج.

اظهرت الابحاث النفسية مؤخرا ان في اسباب كتير نفسية ورا ان النساء مش بيقدروا يستغنوا عن استخدام المكياج, السبب الرئيسي اقتناعهم ان المكياج بيظهر او بيبرز جمالهم وملامحهم اكتر زي العيون والشفايف, بالاضافة ان مستحضرات التجميل ممكن تستخدم عشان نداري بيها عيوب معينة في الوش احنا مش حابينها زي الندبات وحب الشباب وغيرها, وسبب تاني لاستخدام النساء للمكياج انهم شايفين انه بيجذب الجنس الاخر ليهم اكتر, لكن مع ذلك في نسبة من النساء بتاخد قرار انهم يبعدوا عن المكياج خالص طول حياتهم, بس يا ترى هل ده ليه تأثير ايجابي عليهم وعلى صحتهم؟

هتتفاجئي لما تعرفي فعلا ان عدم استخدام المكياج ليه بالفعل اثار ملحوظة على جسمك, وده اللي هنعرفه دلوقتي من خلال السطور الجايه, وقد ايه انه التوقف عن استخدامه مؤثر جدا على الجسم والبشرة.

مميزات عدم استخدام المكياج:

1- عيونك مش هتصاب بالعدوى بسهولة:

ده مهم جدا بالنسبة للبنات اللي دايما بيلبسوا عدسات, لان ممكن يحصل بسببها التهاب العيون الوردي او التهاب الملتحمة, او ممكن يحصل بسبب استخدام مكياج خاص بشخص تاني, عشان بنقولك فكري مرتين قبل ما تستخدمي الماسكارا الخاصة بصاحبتك, بالاضافة كمان ان التهابات العين شائعة جدا عند الاشخاص اللي بيحطوا العدسات بنفس الايد اللي حطت بيها المكياج, عشان كده بمجرد ما تتوقفي عن استخدام المكياج تماما هتلاحظي ان عينيكي هتبقى اقل تعرض للاصابة بالعدوى والالتهابات.

2- بشرتك مش هيحصل فيها مشاكل:

بالرغم ان معظمنا بيحب المكياج عشان يداري بيها العيوب, لكن الواقع ان المكياج ممكن يكون سبب المشكلة بشكل جزئي, المكياج بيحتوي على كتير من المواد الكيميائية اللي ممكن تسد المسام وتسبب تراكم الاوساخ, خصوصا لو بتنسي انك تغسلي وشك كل يوم قبل النوم, كمان فرش المكياج واحدة من الادوات اللي ممكن تسبب مشاكل للبشرة لو مهتمتيش بنضافتها, عشان كده بننصحك انك تجربي تبعدي عن المكياج شوية وهتلاحظي فرق واضح على بشرتك.

مميزات عدم استخدام المكياج
مميزات عدم استخدام المكياج

3- مسام بشرتك هتصغر:

مرة تانية بالرغم ان المكياج ممكن يكون بيداري العيوب ويصغر مسام البشرة, لكن مع ذلك انتي متعرفيش ايه اللي بيحصل تحت المكياج لبشرتك, لو بتستخدمي مكياج كتير ده ممكن يسبب انسداد المسام وهيزود المشكلة والمسام هتكبر اكتر, لكن لما تتوقفي عن استخدام المكياج هتلاحظي ان مسام بشرتك في حجمها الطبيعي لانها مش مليانة بمواد ومستحضرات التجميل المختلفة.

4- الشيخوخة هتتأخر في الظهور:

دكاترة الجلدية كلهم اجمعوا ان استخدام المكياج كتير بشكل يومي هيأدي لتسريع عملية الشيخوخة, وكل ما زودتي استخدام مستحضرات التجميل لمحاولة تغطية العيوب, هتبرزيها اكتر, لان مهما كانت الماركة اللي بتستخدميها كويسة هي في النهاية هتستقر في خطوط البشرة وهتخليها تظهر اكتر, اتوقفي عن استخدام مستحضرات المكياج وهتلاحظي الفرق.

مميزات عدم استخدام المكياج
مميزات عدم استخدام المكياج

5- جلدك هيبقى رطب اكتر:

واحدة من الاثار الجانبية للمكياج هو ان بقاياه بتخلي البشرة تتوقف عن تكوين وتجديد الجلد اثناء النوم, وده معناه ان بشرتك القديمة ممكن يحصل فيها تقشر, وده هيأدي لظهور بقع جافة وجفاف الجلد, والمواد الكيمائية والسموم اللي موجودة في المكياج هتمنع عملية تجديد الجلد, ولما تتوقفي عن استخدامه هتحسي ان بشرتك اكتر حيوية ورطبة اكتر.

6- هتنامي اكتر:

هل لاحظتي بتاخدي ايه من الوقت في يومك عشان تحطي المكياج بتاعك, عادة ما بين 20 – 30 دقيقة, تخيلي بقى انك بدل ما تقومي بدري عشان تعملي المكياج انك تستفيدي بالوقت ده وتنامي اكتر, والنوم اكتر هيخلي بشرتك صحية اكتر, بالاضافة انك هتبقي نشيطة اكتر خلال اليوم لانك نايمة وقت اكتر.

مميزات عدم استخدام المكياج

7- تحسين روتين العناية بالبشرة:

من غير المكياج اللي بتداري بيه عيوب بشرتك, هتحسي مدى اهمية ان بشرتك تبقى صحية ونضيفة عشان تبقى خالية من العيوب بدل ما تخبيها بالمكياج, وهتستمري اكتر في منتجات العناية بالبشرة زي التونر, الغسول, المرطب, وهتبدأي انك تعملي ماسكات طبيعية اكتر للبشرة, بالتدريج هتلاقي بشرتك هتبقى صافية وبتلمع وصحية بشكل طبيعي, وهتلاقي نفسك مش محتاجة لمستحضرات التجميل.

8- هيبقى عندك ثقة وتحبي نفسك اكتر:

الثقة وحب النفس ده صفة شخصية ومش متوفرة عند الكل, لكن لازم تعرفي ان حتى خبراء ومتخصصين المكياج واللي حياتهم كلها بتدور حوالين المكياج لقوا نفسهم انهم اكتسبوا الثقة بمجرد انهم بدأوا في التوقف عن استخدام المكياج, وانهم يبصوا في المرايا ويشوفوا جمالهم الطبيعي من غير طبقات من المكياج على وشهم.

9- هيبقى عندك ردود فعل اقل للحساسية:

غالبا هنلاقي مكونات زي الكبريتات والبارابين والمعادن في المكياج ومنتجات العناية بالبشرة والشعر, والمواد دي بتسبب مشاكل كتير, واكترها انتشار هي الالتهابات, كتير من الاشخاص ممكن يصابوا بالطفح الجلدي او غيرها من ردود الفعل السلبية من استخدام مستحضرات التجميل, وهنا هيكون افضل حل هو التوقف عن استخدام المكياج, لانه ده هيساعد جلدك انه يتنفس بشكل افضل على المدى الطويل.

10- حماية بشرتك من الشمس:

في مستحضرات تجميل وخصوصا كريم الاساس بيكون فيها عامل حماية من الشمس SPF, وبيكون الاعتماد عليها بس في حماية البشرة, لكن للاسف هي مش بتحمي البشرة بشكل كافي, لكن لما تتوقفي عن استخدام المكياج هيخليكي تهتمي اكتر بواقي الشمس بعامل حماية عالي عشان تحمي بشرتك من اضرار اشعة الشمس الضارة, يعني مينفعش تعتمدي على كريم الاساس بس لحماية البشرة من الشمس.

في النهاية كل النساء اللي جربوا انهم يستغنوا عن المكياج كانت تجربة ايجابية جدا بالنسبة لهم, ليه متجربيش انك تتوقفي شوية عن المكياج وتشوفي تأثيره عليكي؟ هتلاحظي الفرق وهتشوفي الفوايد على بشرتك وثقتك بنفسك وصحتك العامة, ياللا جربي وشاركينا تجربتك.

5 علامات تقولك انك محتاجة تغيري روتين العناية بالبشرة بتاعك فورا