10 علامات تقولك ان شريكك بطل يحبك!

بقلمريهام محمود فيعلاقات visibility3081

ستيف هارفي مؤلف رواية “اتصرف زي الست وفكر مثل الرجل” “Act like a lady, think like a man”, بيقول فيها ان الراجل بيعبر عن حبه ب 3 اشكال مختلفة: انه يعلن بتصرفاته انك تخصيه او ملكه في الاماكن العامه وقدام كل الناس, ويحميكي ,ويهتم بيكي, بس لو جينا لجزء الحماية في العصر اللي احنا فيه الست مبقتش محتاجة الحماية من الراجل هي بقت تقدر تقوم بالمهمة دي بنفسها, لكن اللي بتحتاجة الست فعلا هو الحب, ولسوء الحظ ان احيانا الست بتميل انها تشوف ان الراجل بيحبها حتى لو ده مش موجود فعلا, واحيان تانية بتحس ان في حاجة غلط في العلاقة من تصرفاته من غير ما تسمعها منه بشكل مباشر, وعشان نخرجكم من الحيرة دي جمعنالكم 10 علامات تقولك ان شريكك بطل يحبك, وان مشاعره القوية وحالة الحب اللي كان فيها اختفت.

علامات تقولك ان شريكك بطل يحبك:

1- انتقاد مظهرك:

الشخص اللي بيحب فعلا هيحب كل حاجة في حبيبه حتى العيوب, وهيشوف العيوب في كمال الاشخاص اللي مش بيحبهم, وبالنسبة للراجل اللي بيحبك حب حقيقي دايما هيشوفك جميلة, حتى في اسوأ حالاتك وشعرك منكوش او في يوم مش في كامل اناقتك, مش هيلاحظ ان وزنك زاد شوية او شكل جسمك اتغير لو انتي مقولتيش ده بنفسك, لكن لو لقتيه بيقولك دايما انتي تخنتي لازم تخسي لازم تروحي الجيم, او يلمح مثلا انك محتاجة تجميل في حاجة معينة, في الحالة دي يبقى هو شايف ان مش بس مظهرك اللي مش مناسب ليه لكن انتي كمان مش مناسبة ليه يعني حتى لو خسيتي او غيرتي في شكلك هيدور على عيوب تانية فيكي لانه مش بيحبك حب حقيقي.

علامات تقولك ان شريكك بطل يحبك
علامات تقولك ان شريكك بطل يحبك

2- هيقول عيوبك وينتقدك قدام اصحابه:

الحته دي بتبقى موجودة اكتر في الست ان لو مش عاجبها حاجة في شريكها ممكن تحكيها لصحباتها, لكن الراجل بطبيعته كتوم ومش بيعلن ده, وفي النهاية مافيش حد مثالي لكن الشخص اللي بيحب بجد هنلاقيه دايما بيركز على مميزات الشريك بدل من التركيز على العيوب.

لكن لو شريكك بيسمح لنفسه باذلالك علنا وانتقادك عادي قدام اصحابه ودايما بيحرجك ويكسفك قدامهم, يبقى متتوقعيش اي حاجة كويسة من العلاقة دي, لان ده معناه ان شريكك مش بيحترمك, والعلاقة بتكون مستحيلة من غير احترام متبادل, ومن خلال انتقاده ليكي قدام الناس بيحاول يثبت من غير وعي للناس “ولنفسه” ان غلطتك ان هو بطل يحبك.

علامات تقولك ان شريكك بطل يحبك
علامات تقولك ان شريكك بطل يحبك

3- موقفه اتجاه عاداتك:

دايما الستات بيحبوا يشتكوا من الرجالة انهم فوضويين في البيت وبيرموا هدومهم في كل حته, وفي بعض الاحيان بتكون عندهم بعض العادات المزعجة, زي مثلا انها تشغل الحمام ساعتين, تتكلم مع صحباتها مدة طويلة, بتاخد الدولاب لحسابها وتملاه حاجات ممكن متكونش ضرورية, او تاكل من طبق شريكها, او تقعد تغني نفس الاغنية طول اليوم, في الحالات دي الراجل اللي بيحب بجد كقاعدة عامة كده هتلاقيه متقبل كل كده وكمان بيتفاعل معاكي بشكل مرح جدا, لكن لو لقتيه بينتقد كل تصرف بتعمليه ومش عاجبه اي حاجة وعلى طول بيقول تعليقات سلبية على تصرفاتك, ده معناه ان الشعور الوحيد اللي جواه هو الغضب مش الحب.

علامات تقولك ان شريكك بطل يحبك
علامات تقولك ان شريكك بطل يحبك

4- الانتباه لكلامك:

العلماء اثبتوا ان الراجل يقدر يسمع الست ويكون منتبه لها وهي بتتكلم لمدة 6 دقايق بس, عشان كده بنقولك المرة الجاية لو ناويه تفتحي معاه اي موضوع خلي المحادثة قصيرة, لان غالبا الراجل بيكون صعب عليه ان يركز في موضوعات خاصه لاشخاص هو ميعرفهمش او اخبار المشاهير والتسوق والازياء والاكل, يعني الافضل انك تناقشي الحاجات دي مع اصحابك.

لكن مع ذلك, لو الراجل بيحبك بجد هيبذل مجهود عشان يسمعك باهتمام, حتى لو الموضوع ده هو مش مهتم بيه خالص, لما يحبك مش هيسيبك من غير اهتمام, لكن لو لقتيه بيهرب منك او بيحاول يغير الموضوع وانتي بتكلميه او كل مره تفتحي معاه حديث يقعد يقول في حجج, في الحالة دي هو مش مهتم, وده معناه انه مش هيشاركك حتى في حل اي مشاكل ممكن تحصل بينكم اثناء العلاقة.

علامات تقولك ان شريكك بطل يحبك

5- موقفه اتجاه مشاعرك:

الرجالة عموما كده مبيقدروش لنهم يوقفوا دموع الست ول حست انها عايزة تعيط وتخرج اللي جواها, لكن في تفسير علمي ظهر مؤخرا اثبت ان دموع الست بتحتوي على مواد متقلبة خاصة بتسبب في خفض مستوى هرمون التستوستيرون في دم الرجل وبالتالي ده بيأدي لخفض الرغبة الجنسية, عشان كده بنقولك متستخدميش العياط كوسيلة للتأثير على شريكك دايما.

لانه في الحقيقة انتي لما بتعيطي الحاجة الوحيدة اللي الراجل بيكون عايز يعملها في الوقت ده هو انه يهرب وميشوفش دموعك, لكن لو شخص بيحبك الوضع هيختلف وهيحاول انه يبذل مجهود عشان يفضل معاكي ويرضيكي حتى لو سبب العياط تافه, ومش هيسيبك غير لما يلاقيكي بتبتسمي تاني, لكن لو مش بيحبك فهو هيشوف العياط سبب تاني انه يتعصب عليكي او يسيبك لوحدك.

علامات تقولك ان شريكك بطل يحبك

6- الغزل:

الغزل بين الزوجين يعتبر اداة رائعة جدا لاحياء المشاعر وكسر روتين العلاقة خصوصا لو العلاقة بقالها فترة طويلة, الرسايل النصية والغزل والتلميحات المثيرة للاهتمام وهو بره البيت او انتوا بعيد عن بعض, بتساعد على تنشيط الاهتمام المتبادل بينكم زي ايام الخطوبة او بداية العلاقة, ومهم جدا ان ده يكون متبادل بين الطرفين وهما الاتنين يعملوا ده مش طرف واحد بس.

لكن مع ذلك لو انتي بعتي مثلا 10 رسايل فيهم حاجات مختلفة وبتحاولي تخليه يتواصل معاكي ومع ذلك هو رد فعله صفر, يبقى هنا توقفي اللي انتي بتعمليه, او تحاولي تفكري وتعرفي ايه السبب اللي مخلي شريكك متجاهلك.

علامات تقولك ان شريكك بطل يحبك

7- رد فعله على الطلبات:

بالنسبة للراجل اللي بيحب بجد طلبات شريكته او حبيبته هتفضل دايما في المقام الاول عنده, والحقيقة ان الراجل بيحب مساعدة الست لان ده بيخليهم يبينوا مدي قوتهم ومسؤوليتهم اتجاهك, وحتى لو في حاجة معينة او مش هيقدر يساعد فيها او يعملهالك فهو برضه مش هيخليكي لوحدك وهيكون معاكي اثناء التعامل مع المشكلة, يعني لو مثلا لو حاجة بايظة في البيت وهو مش هيقدر يعملها هو هيهتم ويتصل بالعامل لحد ما المشكلة تتصلح, لكن لو مش بيحب ساعتها لو قولتيله بس غير لمبة في البيت هيحس بالانزعاج من الطلب وانها مهمة لا تطاق, في الحالة دي لازم تاخدي بالك من حاجة تانية هل بتلاحظي ان زوجك ممكن يساعد واحدة تانية بحماس اكبر ولا لا؟ لان هنا لازم تكون في وقفة.

بس في النقطة دي نحب نوضح ان قليل جدا من الرجالة الشرقيين بيستجيبوا للطلبات من اول مره وفي رجالة مش بتستجيب اصلا, وقليل جدا من الرجالة اللي بتتوفر فيهم فعلا النقطة دي, دي ممكن تكون متواجدة في الرجالة الغربيين اكتر لان هما عندهم نسبة المساعدة للست اكتر خصوصا في البيت, لكن في النهاية هو ده الصح واللي المفروض يتعمل ان الراجل يكون دايما موجود للمساعدة على قد ما يقدر.

8- الغيرة:

اتضح حتى ان القرود بيحسوا بالغيرة على اناثهم من الذكور التانيين, لان الغيرة نشأت اثناء مرحلة التطور كوسيلة للحفاظ على العلاقة بين الزوجين, وان الراجل يكون هو “المالك” الوحيد لجمالها, عشان كده من الطبيعي جدا ان الراجل اللي بيحبك يحس بتوتر او يتعصب لو حس ان شخص تاني مهتم بيكي او بيحاول يتقرب منك باي شكل, ولكن طبيعي ان البشر يقدروا يتحكموا في تصرفاهم وان المفروض نوبات الغيرة متبقاش مفرطة وتضر العلاقة.

لكن لو الراجل اللي معاكي مش مهتم وعنده لامبالاه اتجاه اي علامات اهتمام ممكن يظهرها اللي حواليكي ليكي, فدي علامة خطيرة جدا, لان في الحالة دي هو اصلا مش عايز يقاتل عشانك, ومش بيحاول يعمل حاجة عشان يثبت انه الافضل بالنسبة لك.

9- الحماية من الخطر:

الاساس ان الراجل دايما هو اللي بيكون مسؤول عن حماية كل اللي بيحبهم والست هي اللي بتكون محتاجة الحماية, ومع ان الزمن اتغير والدنيا اختلفت والست بقت تقدر تحمي نفسها, لكن مع ذلك ما زال في مخاطر حوالينا محتاجين حماية منها, عشان كده طبيعي جدا ان الراجل اللي بيحب فعلا يحس بالقلق على نصه التاني لو اتأخرت شوية في الشغل, او كانت لوحدها في مكان مش مألوف, هو لو مقدرش يكون موجود معاها على الاقل هيتصل عشان يتأكد انها كويسة, وسواء حقيقة او وهم في النقطة دي الراجل بيحس انه بطل خارق بالنسبة لشريكته.

عشان كده لو ملقتيش الحماية والدعم من شريكك في المواقف الصعبة, زي مثلا انك تضطري ترجعي متأخر لوحدك, او تتوهي في مكان جديد عليكي, دي تعتبر علامة سيئة جدا في العلاقة, وهو كده ممكن يكون انسان جبان او ببساطة مش بيحبك, يبقى في الحالة دي انتي محتاجة له ليه بعد كده؟

10- الكلمات اللطيفة والتعبير عن المشاعر:

لغة الحب بتتكون من كلمات رقيقة, لمسات, حضن, قبلات, وانه يناديكي دايما بالقاب حلوة ده بيخلق جو حميم في العلاقة, واختيار الاسماء الحميمية بينكم دي بتكون من غير وعي وبتكون دليل على مدى الترابط بين الشريكين ومدى توازن العلاقة.

وبالمناسبة الرجالة بيحتاجوا كل الحاجات اللي احنا قولناها دي زي الستات بالظبط, حسب الابجاث اللي اتعملت على 1000 زوج, اثبتت ان الرجالة اللي دايما زوجاتهم بتحضنهم وبتقولهم كلام رقيق ولطيف بيحسوا بسعادة 3 مرات اكتر من الازواج اللي زوجاتهم مش بيعملوا ده.

عشان كده لو بتحسي ان شريكك اتضايق في كل مره بتحاولي انك تحضنيه فيها او تقولي له كلام حلو او تناديه بلقب معين, فالسبب فده مش انه انسان قاسي, لكن ممكن جدا تكون مشاعره ناحيتك اختفت او مبقتش زي الاول.

10 اسرار لعلاقة صحية مع شريكك

اسرار العلاقة الصحية