نصايح ازاي تبقي خبيرة تجميل محترفة
كتير من البنات بيكونوا عايزين يدخلوا في مجال العمل بعالم التجميل, وبيفكروا يبقوا خبراء تجميل محترفين, لانه يعتبر من اكتر المجالات المناسبة للبنات وهتستفيدي منها من كل النواحي, عشان كده النهاردة من خلال موضوعنا هنقولك نصايح ازاي تبقي خبيرة تجميل محترفة وتبدأي في المجال ده بشكل صح.
ازاي تبقي خبيرة تجميل محترفة:
مبدئيا كده عشان تعملي حاجة بتحبيها وفي نفس الوقت تكسبي منها فلوس, لازم تبني شبكة علاقات كبيرة جدا لانها هي دي الاساس اللي هتبدأي بيه, وتاني حاجة جودة الخدمة لازم تقدمي خدمة كويسة جدا عشان تعملي سمعة حلوة في المجال ويبقى ليكي اسم معروف, وتبني ثقة بينك وبين العملاء بتوعك.
ولو انتي بتفكري تدخلي في المجال ده فعلا, يبقى لازم تعرفي انه مجال تنافسي جدا, سواء كنتي بتدوري على وظيفة في بيوتي سنتر, او عايزة تعملي مشروع خاص بيكي, وعشان تنجحي وتقدري تنافسي هنقولك على 3 نصايح هتساعدك للنجاح في عالم الجمال.
1- جودة الخدمة:
بالنسبة للعملاء بتوعك, هما بيعتبروا رحلتهم لصالون التجميل او البيوتي سنتر تجربة قد ما هي خدمة, يعني سواء العميلة دي جايه تعمل شعرها, ضوافرها, حواجبها, واهم حاجة عندها انك تعملي لها اللي هي جايه عشانه, لكن في نفس الوقت معظمهم بيكونوا جايين عشان يدلعوا نفسهم ويحسوا بشعور رفاهية وهما في الصالون.
ولازم تعرفي انك بتلعبي دور رئيسي في التجربة دي لكل عميل عندك, مش بس في جودة الخدمة اللي بتقدميها, لكن كمان مستوى الراحة اللي بتقدميها للعميل في المكان, وانك تخصصي التجربة لكل عميل انه يستمتع بيها.
اهتمي بكل التفاصيل, من اول شكلك ومظهرك العام لحد التصميم الداخلي ونضافة الصالون او المكان اللي انتي بتشتغلي منه, لان الشكل العام والجماليات بتلعب دور مهم جدا في عالم البيزنس, والجمال ده بيدور حوالين مظهرك ونضافة المكان, عشان كده لو عايزة عملائك يستمروا معاكي ويزيدوا لازم تهتمي بالحاجات دي.
2- اتعاملي مع مورد موثوق فيه:
خط الانتاج اللي انتي بتشتغلي فيه هيقطع شوط طويل جدا في الثقة بينك وبين عملائك اللي بياخدوا منك خدمة كويسة, مع مختلف الخدمات اللي انتي بتقدميها, عشان كده المنتجات والمعدات اللي انتي بتشتغلي بيها في المكان اختيارها بعناية مهم جدا.
عشان تقدمي خدمة عالية الجودة باستمرار لعملائك, بمجرد ما تلاقي منتجات او علامة تجارية ترتاحي معاها وترتاحي لها, هيكون هنا ضروري انك تلاقي مورد موثوق فيه وبأسعار معقولة يوردلك المنتجات دي, لان ده المفتاح عشان تحافظي على ميزانية قوية لمشروعك.
ضروري جدا انك تقدري تجيبي مجموعة منتجات مناسبة عالية الجودة من واحد من تجار الجملة, لانه بمجرد انك تاخدي قرار انك هتشتغلي بمنتج معين, هيكون ساعتها منطقي انك تشتري منه كميات كبيرة عشان توفري في الفلوس, وده هيساعدك على التحكم في الميزانية بتاعتك.
3- افهمي السوق:
فهم السوق هو مفتاح اي بيزنس, وزي ما قولنا ان مجال التجميل زيه زي اي مجال تاني يعتبر مجال تنافسي بدرجة عالية جدا, ولو معرفتيش تعملي مكان وتنافسي بقوة مش هتعرفي تكملي.
لو انتي موظفة عند شخص في صالون تجميل, وعايزة تطوري تخصص او خدمة واحدة تقدميها لعملائك وتبقي محترفة فيها, هيبقى الشغل في التخصص والتركيز عليه هو اللي هيساعدك انك تفهميه اكتر وهيعتبر تدريب عملي ليكي, ولو انتي بالفعل صاحبة عمل وعندك مشروعك الخاص وعايزة تركزي علامتك التجارية بشكل اساسي على خدمة واحدة بس او تتفوقي فيها اكتر من المنافسين ليكي في السوق.
في الحالة دي لازم تعملي بحث عن المنافسين ليكي وفهم السوق, وتلاقي ثغرة عندهم او حاجة هما مش بيقدموها وتعمليها ساعتها هتنجحي وتتفوقي عليهم.
وفي النهاية صناعة التجميل كبيرة جدا ومليانة بالتجارب, والنصايح الاساسية اللي قولناها في المقال بتاعنا النهاردة هتساعدك بشكل مبدئي انك تلاقي الطريق اللي تبتدي منه وتحط رجلك على اول سلمة لمهنة عالم الجمال.
أهم 10 خطوات لازم تعمليهم عشان تبدأي البيزنس الخاص بيكي
