روتين مكياج سريع تعمليه في اقل من 10 دقايق وتطلعي بلوك مثالي

بقلمريهام محمود فيمكياج visibility515

المكياج الكامل اكيد بياخد وقت, لكن معظمنا مش دايما بيبقى عنده نص ساعة كل يوم الصبح عشان يحط المكياج كله, عشان كده النهاردة هنسهل عليكي المهمة دي وهنقولك روتين مكياج سريع تعمليه في اقل من 10 دقايق عشان يوفرلك وقتك.

روتين مكياج سريع:

1- استخدمي BB كريم:

لو مستعجلة ومعندكيش وقت, استبدلي روتين مكياجك اللي متعودة عليه بكريم BB, لانه هيعتبر بديل للبرايمر, والفونديشن, والبودر, وبيدي تغطية متوسطة طبيعية للبشرة, وبيغطي البقع في دقيقة واحدة بس.

روتين مكياج سريع
روتين مكياج سريع

2- استبدلي الايلاينر بالايشادو:

بدل ما تاخدي وقت طويل في رسم الايلاينر, استخدمي فرشة رفيعة وارسمي بيها خط رفيع على الحافة السفلية للعين بالايشادو اثناء رسم الايشادو.

هيعمل مظهر سمدج مختلف ومميز جدا, وهيوفرلك في الوقت, بس اتأكدي انك تستخدمي ايشادو يكون نوعه كويس عشان يثبت معاكي طول اليوم من غير ما يسيح.

روتين مكياج سريع
روتين مكياج سريع

3- استخدمي بالتة بلاشر/برونزر/وهايلايتر:

تقدري توفري في الوقت الصبح وتستخدمي البالتة اللي بيكون فيها بلاشر وبرونزر وهايلايتر مع بعض, بدل ما تاخدي وقت في تطبيق الكونتور, والبلاشر, والبرونزر والهايلايتر كل واحد لوحده, لكن مع البالته بكل بساطة هتمرري الفرشة عليهم كلهم مرة واحدة وتطبيقه على الخدود وتحت عضمة الخدين, عشان تعملي لوك متوهج طبيعي دافي بمجموعة من الالوان مع بعض.

روتين مكياج سريع

4- خلي مكياج العين بسيط:

تقدري تعملي مكياج عيون حلو جدا من غير ما تاخدي وقت في ظبط مكياج كل عين.

عشان ترسمي العين سموكي مثالي كل اللي محتاجاه هما 3 الوان, حطي افتح لون فيهم تحت عضمة الحاجب, واللون المتوسط على الجفن كله, واغمق لون حطيه على تجعيدة العين والزاوية الخارجية للعين, وامزجيهم مع بعض بالفرشة, بالطريقة دي هتعملي عيون سموكي مثالية في اقل من 5 دقايق.

5- استخدمي بودرة الحواجب:

بودرة الحواجب بتاخد وقت اقل بكتير من اي منتج تاني للحواجب, وفي نفس الوقت بتحددلك شكل الحواجب وبتظهرهم.

ببساطة استخدمي فرشة بزاوية لمزج البودر على الحواجب, مع التركيز على قوس الحواجب,  بالطريقة دي هتحددي شكل الحواجب وهتديهم لون في دقيقة واحدة بس.

6- اتخطي قلم تحديد الشفايف:

لو مستعجلة الصبح هتكون فكرة رسم الشفايف بقلم التحديد مش فكرة عملية والافضل انك تتخطي الخطوة دي الصبح, وفي كل الاحوال مكياج الشفايف يعتبر اسهل الخطوات في المكياج كله, مرري بس قلم الروج على الشفايف باللون اللي انتي عايزاه, واضغطي على شفايفك مع بعض عشان تمزجي اللون وتوزعيه كويس, وبكده هتكوني خلصتي مكياج الشفايف بتاعتك خلال 15 ثانية بس.

7- متنسيش البودر:

روتين المكياج السريع مش معناه انك متقلقيش بتراكم الزيوت على البشرة طول اليوم او متهتميش بالخطوة دي, كل اللي انتي محتاجاه دقيقة واحدة بس لتطبيق اللوس بودر على البشرة كلها للمسة نهائية مات وفي نفس الوقت هتثبت المكياج لفترة اطول.

المرة الجايه لما تكوني مستعجلة الصبح ومعندكيش وقت جربي الروتين ده في المكياج هياخد منك اقل من 10 دقايق وهيوفرلك في الوقت والمجهود, وفي نفس الوقت هتطلعي بلوك حلو ومثالي.

نصايح لمكياجك على البحر لازم تعرفيهم عشان تطلعي بلوك مثالي