5 سلوكيات تقولك انك شخص قوي عقليا

ريهام محمود
ريهام محمود
1712

كل اللي بنعمله واللي بنقرر منعملوش في حياتنا بيعتمد على موقفنا العقلي, واكيد في ظروف وحاجات تانية ممكن يكون ليها دور, لكن الى حد ما بيكون لينا سيطرة على حياتنا وافكارنا بتبقى حقيقة وواقع لما بنكون اقوياء عقليا, والنهاردة من خلال موضوعنا هنقولك سلوكيات تدل على القوة العقلية.

سلوكيات تدل على القوة العقلية:

القوة العقلية مش من السهل اننا نوصلها, ولكن من حسن الحظ اننا ممكن نتعملها بالممارسة مع الوقت, الامر كله هيكون متعلق بتغيير مواقفك ومعتقداتك في الحياة, كتير مننا مر بتجارب صعبة في حياته ومكنش قدامه اختيار غير انه يبقى اقوى عشان يعرف يواجه الحياة بشكل صح, لكن مع ذلك هنقولك على 5 سلوكيات تقولك انك شخص قوي عقليا, عشان لو مش موجودة تبدأي انك تتدربي نفسك عشان توصلي للمرحلة دي من القوة العقلية.

1- مش بيشتكوا كتير:

الاشخاص الاقوياء عقليا مش بيحاولوا يشتكوا من وضعهم او حياتهم, وبدل ده بيبدأوا انهم يقيموا المشكلات كويس وبيركزوا انهم يدوروا على حلول, وعارفين كويس اوي ان التعمق في المشاكل مش هتخلي وضعهم افضل, لكن بالعكس ده بيكبر المشكلة اكتر وبتتحل بطريقة مش مناسبة, والاشخاص اللي عقلهم قوي بيكونوا عارفين كويس ان الحاجة الوحيدة الثابتة في الحياة هي التغيير, عشن كده هما بيكونوا متفهمين اوي اي موقف او وضع في حياتهم, حتى لو كانت التغييرات دي مش ايجابية, لان هما في الاساس بيغيروا اللي يقدروا يغيروه واللي مش بيقدروه بينسوه او بيلغوه من حياتهم, وعارفين ان الشكوى من حاجة مش هيقدروا يغيروها مش هتعمل غير حالة فوضى في حياتهم, عشان كده هما بيتجنبوا التفكير بالطريقة دي والشكوى من كل حاجة في حياتهم.

سلوكيات تدل على القوة العقلية 1
سلوكيات تدل على القوة العقلية 1

2- الاشخاص الاقوياء عقليا بيقدروا يسيطروا على حياتهم:

الاشخاص اللي بيتمتعوا بالقوة العقلية, مش بيلوموا غيرهم على اي موقف او غلطات في حياتهم “مش بيدوروا على شماعة يعلقوا فيها اي غلط او فشل”, او يتوقعوا ان شخص تاني يجي ينقذهم من مشاكلهم, ورغم انهم زيهم زي اي حد في المواقف الصعبة بيحتاجوا دعم, لكن مش بيقعدوا يستنوا بس ان حد يجي ينقذهم ويحللهم مشاكلهم ويصلح لهم حياتهم, لكن بيتحملوا المسؤولية وبيعملوا كل اللازم عشان يصلحوا حياتهم.

مش بيحاولوا يماطلوا او يأجلوا حاجة ممكن تساعد انها تصلح حياتهم وتخليهم حاسين بالرضا عنها, بيتحملوا المسؤولية عن نفسهم وحياتهم, وبيعملوا كل اللي يقدروا عليه عشان يوصلوا للحياة اللي هما عايزينها.

3- بيعرفوا يتعاملوا مع كل ظروف الحياة:

الاشخاص الاقوياء عقليا عارفين ان الحياة مش بتيجي مع كتاب تعليمات وان كل واحد بيرسم حياته زي ما هو عايزها, لان اكيد الحياة اللي انتي عايزاها مش هتيجي بسهولة, هتواجهك عقبات وصعوبات ولما تتغلبي عليها هيكون عندك تقدير اعمق لحياتك, يعني الاشخاص الاقوياء عقليا, بيتعلموا انهم ياخدوا الحياة بكل حاجة فيها بالخير والشر والسلبيات والايجابيات, يعني لما تقابلهم صعوبة غيرهم ممكن يشوفها عائق في طريقهم لكن هما بيلاقوا طريقة تانية للتعامل مع الموقف لحد ما يوصلوا لحل وبيشوفوا الحياة بطريقة مختلفة.

سلوكيات تدل على القوة العقلية 2
سلوكيات تدل على القوة العقلية 2

4- بيبعدوا عن العادات السيئة:

اي حاجة مش بتعزز حياتهم وتخليها احسن بيتخلصوا منها, الاشخاص الاقوياء عقليا عارفين كويس جدا ان عشان يوصلوا لحياة مثالية وحياتهم تبقى زي ما هما عايزين انهم لازم يتخلصوا من الحاجات اللي مش هتخدم اهتمامتهم, سواء كانت العادات السيئة دي اسلوب حياة غلط, او اكل مش صحي, او علاقات غلط, او اي حاجة تانية سلبية, الاشخاص الاقوياء عقليا اتعملوا انهم يبعدوا عن كل الاغراءات اللي ممكن تعطل هدفهم او تبقى عقبة قدامهم, وده ميمنعش انه ممكن يضعفوا اوقات قدام العادات السيئة لكن بيرجعوا للمسار الصح على طول وبيمشوا على العادات اللي هتضيف قيمة لحياتهم.

5- حاسمين في قرارتهم وردود افعالهم:

الاشخاص الاقوياء عقليا حاسمين في قراراتهم وردود افعالهم ده معناه انهم بيقولوا كلمة “لا” لما يكون في حاجة هما شايفين انها مش صح بالنسبة لهم, عندهم حدود ومش بيسمحوا لاي حد يتخطاها, لو في اي حاجة مش هيقدروا يحطوها في جدولهم او مخططاتهم مش هيبقى عندهم اي مشكلة انهم يقولوا ده لاي حد, بيحترموا نفسهم ومش بيسمحوا لاي حد انه يقلل منهم باي شكل, الاشخاص الاقوياء عقليا معندهمش مشكلة انهم يوقفوا ويواجهوا الحياة لوحدهم لو الحاجة دي هما مؤمنين بيها.

سلوكيات تدل على القوة العقلية 3
سلوكيات تدل على القوة العقلية 3

في النهاية القوة العقلية مش بتحصل بين يوم وليلة, لكن هي نتيجة العادات اللي بتمارسيها كل يوم, ببساطة الاشخاص الاقوياء بيحطوا حدود واحترام لنفسهم ومش بيسمحوا لحد انه يتحكم في حياتهم, وعارفين انهم عشان يبنوا حياة مرضية ليهم ويحبوها ده امر يخصهم هما بس من غير تدخل اي حد, عشان كده بيعتمدوا على نفسهم بس في كل حاجة, ده ممكن يكون صعب على الاشخاص العاديين, ولكن بالنسبة للاشخاص الاقوياء عقليا, بتعتبر فرصة عشان يختبروا مهاراتهم وتطوير علاقة اقوى مع نفسهم.

سلوكيات تدل على القوة العقلية 4

مقالات متعلقه

حكاية وتاريخ فانوس رمضان

حكاية وتاريخ فانوس رمضان

برامج ومسلسلات راديو نجوم اف ام في رمضان 2024

برامج ومسلسلات راديو نجوم اف ام في رمضان 2024

برامج ومسلسلات الراديو 9090 في رمضان 2024

برامج ومسلسلات الراديو 9090 في رمضان 2024