نصايح لمكياجك على البحر لازم تعرفيهم عشان تطلعي بلوك مثالي
لما تكوني هتقضي يومك على البحر اكيد هيكون اخر همك هو انك كل شوية تظبطي مكياجك, لانك اكيد بتبقي عايزة تنبسطي وتستمتعي بالوقت من غير قلق, وعلى الرغم ان في بنات كتير بيفضلوا ميستخدموش المكياج على البحر عشان الحر والرطوبة وانه ممكن يبوظ بسرعة, لكن لو عايزة تاخدي صور ويبقى شكلك حلو فيها اكيد هتحتاجي شوية مكياج خفيف, والنهاردة هنقولك مجموعة نصايح لمكياجك على البحر عشان تطلعي بلوك مثالي, وهنشوف بالفيديو خطوة بخطوة 2 لوك مكياج طبيعي مناسب للبحر.
نصايح لمكياجك على البحر:
1- واقي الشمس:
اول حاجة سواء هتحطي مكياج او لا خطوة واقي الشمس اساسية عشان تحمي بشرتك من اضرار اشعة الشمس, اختاري واقي الشمس بعامل حماية اقل حاجة 30, ولازم تجدديه كل ساعتين على الاقل او بعد السباحة او التعرق مباشرة, وحاولي على قد ما تقدري انك تتجنبي الشمس في ساعات الذروة اللي بتكون من 10 الصبح للساعة 2 بعد الضهر, وحاولي انك تلبسي قبعة على الراس ونضارة الشمس.
2- خلي كريم الاساس خفيف:
كريم الاساس التقيل على البحر ممكن يخلي اللوك Cakey, عشان كده للبحر بننصحك ان الافضل تستخدمي مرطب ملون او كريم BB لانه خفيف على البشرة وكمان بيحتوي على عامل حماية من الشمس ودي ميزة تانية فيه, ده غير ان تطبيقه سهل وبيتفرد بسهولة على البشرة بس هتحطيه بصوابعك وتفرديه على بشرتك.
ومتستخدميش البودر لانها مع الرطوبة والحر هتخلي اللوك يبقى Cakey ويشقق.
3- استخدمي برونزر وبلاشر كريمي:
الافضل انك تستخدمي المنتجات الكريمي على البحر, استخدمي برونزر دهبي للوك متوهج, وممكن حتى تستخدمي البرونزر يكون بدرجة اغمق عن العادي او المناسب للون بشرتك عشان تدي تاتش تان للبشرة يبقى مناسب لجو الصيف, واكيد متبالغيش في الكمية حطي منه بشكل خفيف, ولو قلقانة من اللمعان خلي في شنطتك على طول ورق امتصاص الدهون من البشرة, او زي ما نصحنا بنات حوا قبل كده ممكن تستخدمي ورق الززبدة كبديل هيساعد على امتصاص دهون البشرة.
4- خلي الايشادو طبيعي:
استخدمي درجات ايشادو بألوان محايدة طبيعية, ممكن تعتمدي على البيج, الشامبين, الدهبي, البينك المات, يعني ركزي على الالوان الطبيعية اكتر واللي بتكون قريبة من لون البشرة.
5- استخدمي ماسكارا وايلاينر وتر برووف:
عشان تتفادي ان الماسكارا او الايلاينر يسيحوا منك بعد السباحة ومن العرق والحر والرطوبة اعتمدي على الماسكارا والايلاينر ضد المية, وممكن تكتفي بالماسكار بس وتستغني عن استخدام الايلاينر.
6- استخدمي جل لرسم الحواجب:
الحواجب بتحدد شكل الوش فحتى لو مش هتحطي مكياج بننصحك انك ترسمي حواجبك, اعتمدي على نوع جل ضد المية عشان يقعد معاكي فترة طويلة ويتحمل الجو.
7- اعتمدي على الليب جلوس:
الافضل على البحر عشان تكملي اللوك الطبيعي بننصحك انك تستبدلي الروج بملمع الشفايف, او تستخدمي زبدة كاكاو ملونة او تينت عشان يديكي لون طبيعي وفي نفس الوقت يبقى ثابت ويقعد معاكي فترة طويلة ومن غير ما يتلطخ.
8- رطبي بشرتك بالميست:
الميست استخدامه مهم جدا لانه بيساعد على انعاش البشرة وتجديدها وتهدئة الجلد من الحرارة والرطوبة, وبيحافظ على ترطيب الجلد طول ما هو تحت الشمس, عشان كده بننصحك تحطيه في شنطتك وانتي رايحة البحر عشان ترشي على البشرة من وقت للتاني او كل ما تحسي انك عايزة تنعشي بشرتك وتتخلصي من احساس الحر.. ممكن تشوفوا من هنا طرق لعمل ميست للبشرة لترطيبها وتجديدها والحفاظ على المكياج فترة اطول.