ازاي تدخلي التوب من جوه باكتر من طريقة بشكل شيك

ريهام محمود
ريهام محمود
4991

في بعض الاحيان ممكن تشتري شيميز او تيشرت يكون طويل اوي, او يكون واسع زيادة عن اللزوم, وده بيخليكي متقدريش تحددي منطقة الوسط او تظهريها وبيطلع الشكل مش حلو في النهاية, عشان كده النهاردة من خلال السطور الجاية هنقول لكل بنات حوا ازاي تدخلي التوب من جوه باكتر من طريقة ويطلع شكله شيك ومختلف ويغير اللوك بتاعك تماما.

ازاي تدخلي التوب من جوه:

1- دخلي التوب كله جوه الهدوم Full Tuck:

لو عايزة منطقة الوسط تبقى متحددة وتظهريها يبقى هيكون مناسب ليكي الطريقة دي انك تدخلي التوب كله جوه الهدوم.

سواء لو كنتي لابسة شيميز او تيشرت, ابدأي دخليه كله جوه البنطلون او الجيبة واتأكدي انه مشدود كويس.

بعد كده ابدأي انك تسحبيه شوية من البنطلون بشكل خفيف, وممكن تسحبيه بطريقة تانية انك ترفعي ايديكي الاتنين لفوق, بس متسحبيهوش زيادة عن اللزوم عشان ميبقاش في جزء كبير بره البنطلون.

2- دخلي التوب من قدام بس Front Tuck:

الطريقة دي كاجوال اكتر من الطريقة اللي فاتت.

في الطريقة دي هتدخلي التوب من قدام بس وتسيبيه من ورا بره الهدوم.

وزي ما عملنا في الطريقة الاولى بعد ما تدخليه من قدام اسحبيه بره حاجة بسيطة, وفي نفس الوقت يبقى مشدود جوه الهدوم مش واسع.

3- دخلي نص التوب Half Tuck:

دي تعتبر اكتر طريقة كاجوال في الطرق التلاتة, وبتكون افضل انك تعمليها مع شيميز بزراير لانه هيطلع مظبوط معاكي اكتر.

البسي الشيميز وافتحي الزراير بتاعته لحد منطقة الوسط, ودخليه جوه البنطلون من جنب واحد بس, وسيبي الجنب التاني من بره.

وفي الاخر اسحبي الجزء اللي دخلتيه لبره شوية عشان يبقى شكله انيق اكتر زي ما عملنا في الطريقتين اللي فاتوا.

مقالات متعلقه

14 قاعدة ملابس اساسية محتاجة تعرفيها

14 قاعدة ملابس اساسية محتاجة تعرفيها

8 نصايح موضة تعمليهم في الصيف

8 نصايح موضة تعمليهم في الصيف

10 طرق تلبسي بيهم ملابس عصرية وعلى الموضة من غير ما تصرفي فلوس كتير

10 طرق تلبسي بيهم ملابس عصرية وعلى الموضة من غير ما تصرفي فلوس كتير