وصفات لعمل كريم النهار بمكونات طبيعية لكل انواع البشرة

بقلمريهام محمود فيبشرة visibility716

كتير من البنات يمكن ميعرفوش الفرق بين كريم النهار والليل وايه فوايدهم للبشرة, احنا اتكلمنا قبل كده على كريم الليل وقولنالكم ازاي تعملوه بمكونات طبيعية في البيت, وموضوعنا النهاردة عن كريم النهار هنقولك وصفات كريم النهار بمكونات طبيعية وايه هي فوايده للبشرة.

ايه هو كريم النهار والفرق بينه وبين كريم الليل؟

كريم النهار بيساعد على ترطيب ونضارة البشرة, ويعتبر اخف من كريم الليل اللي بيكون كثيف شوية عشان يفضل على البشرة طول الليل.

كريم النهار بيحتوي على مكونات بتقلل من ظهور تجاعيد البشرة, وبيحافظ على الجلد من العوامل الخارجية زي الهوا والاتربة وغيرها من الحاجات اللي ممكن تأثر على البشرة طول ما انتي بره البيت, وبالتالي هيحافظ على بشرتك نقية خالية من الشوائب, بالاضافة انه كمان بيساعد على ازالة الخلايا الميتة وبيدي البشرة نعومة ونضارة, لكن كريم الليل مهمته تغذية البشرة خلال فترة النوم واعادة بناء خلايا البشرة وتعويض الفيتامينات اللي بتفقدها البشرة خلال اليوم, بالاضافة انه بيحتوي على مواد مضادة للشيخوخة.

كريم النهار كمان من مهامه انه بيحمي البشرة من اشعة الشمس الضارة, وبيحافظ على البشرة من الجو الجاف, ولانه خفيف على البشرة بيسمح لمسام بشرتك انها تتنفس, وبيحتوي كمان على مضادات الاكسدة اللي بتحافظ على شباب البشرة.

وصفات كريم النهار
وصفات كريم النهار

ازاي تحطي كريم النهار:

اول حاجة اغسلي البشرة بالغسول المناسب لنوع بشرتك.

خدي كمية قليلة من الكريم على طرف صوابعك وابدأي بتوزيعها على الوش والرقبة بالتساوي, ومتحاوليش تحطي كمية كبيرة لان في النهاية البشرة هتاخد الكمية اللي هي محتاجاها بس ومش هتتشرب الزيادة, وده هيأدي انه يعمل طبقة دهنية على سطح البشرة.

بعد توزيع الكريم على البشرة ابدأي بتدليك الوش والرقبة كويس في حركات دائرية خفيفة لحد ما البشرة تتشرب الكريم كله, واتجنبي منطقة حوالين العين.

وصفات كريم النهار

وصفات كريم النهار:

كريم نهار للبشرة الجافة والعادية والحساسة:

المكونات:

– 2 معلقة صغيرة زيت زيتون.

– 4 معالق صغيرة فازلين.

– خيارة.

– نقطتين من زيت الورد.

الطريقة:

ابشري الخيارة وحطيها على شاشة ومصفي واضغطي عليها بالمعلقة لحد ما تستخرجي كل العصير منها, دوبي الفازلين على حمام مية سخنة, ولما يدوب خالص اخلطي عصير الخيار مع الفازلين وضيفي لهم باقي المكونات, امزجي كل المكونات مع بعض كويس, وحطي الخليط في علبة محكمة الغلق لحد ما تبرد خالص, وبعدين حطيه في التلاجة لحد ما الخليط يبقى كريمي, وهيبقى جاهز للاستخدام.

وصفات كريم النهار

كريم نهار للبشرة الدهنية:

للبشرة الدهنية هتستخدمي نفس المكونات اللي فاتت وهتعمليه بنفس الطريقة, لكن باختلاف بسيط هتضيفي على المكونات اللي فاتت عصير ½ ليمونة لما الخليط يبرد تماما.

وصفات كريم النهار

كريم شمع العسل وزبدة الكاكاو:

المكونات:

– 50 جرام من شمع العسل.

– 50 جرام من زبدة الكاكاو.

– 100 جرام زيت زيتون “اختياري”.

– 2 معلقة كبيرة مية ورد.

– 5 نقط من اي نوع زيت عطري مفضل عندك.

الطريقة:

دوبي شمع العسل مع زبدة الكاكاو وزيت الزيتون على حمام مية سخنة, ولما كل المكونات تدوب وتمتزج مع بعض ضيفي لهم مية الورد والزيت العطري, سيبي الخليط لحد ما يبرد تماما, انقليه في علبة محكمة الغلق, واحفظيه في التلاجة لحد ما يبقى كريمي, وكده يبقى جاهز للاستخدام.

وصفات كريم النهار

كريم زبدة الشيا:

المكونات:

– 5 جرام زيت لوز حلو “للترطيب”.

– 6 جرام زيت الجوجوبا “للحماية من الشيخوخة”.

– 3 جرام زيت السعد “لتقليل نمو الشعر”.

– 1 جرام زيت التوت البري “ليه تأثير مضاد للاكسدة والشيخوخة”.

– 1 جرام زيت الزنبق “لتأثيره المضاد للبقع”.

– 2 جرام زيت جوز الهند “لخصائصه المرطبة والمهدئة”.

– كام نقطة من زيت السمسم “لتأثيره المضاد لاشعة الشمس الضارة”.

– كبسولة فيتامين E.

– 39 جرام من زبدة الشيا.

الطريقة:

اول حاجة دوبي زبدة الشيا على حمام مية سخنة, وبعدين ضيفي لها باقي المكونات واخلطيهم مع بعض كويس, انقلي الخليط في علبة محكمة الغلق وحطيها في التلاجة لحد ما الخليط يبقى قوامه كريمي, وبعدها هيبقى جاهز للاستخدام.

والكريم مناسب لكل انواع البشرة, بس لو بشرتك دهنية ممكن تضيفي على المكونات اللي احنا قولناها كمية بسيطة من دقيق الارز عشان تقللي من التأثير الدهني على البشرة.

احتفظي باي نوع كريم من اللي قولناهم في التلاجة بعد كل استخدام, وهيكون صالح لمدة اسبوع تقريبا لانه طبيعي وخالي من اي مواد حافظة, يعني الافضل تعملي كمية تكفيكي اسبوع بس ولما تخلص اعملي غيرها.

وصفات كريم النهار

اعملي بنفسك كريم ليلى للبشرة

كريم ليلى للبشرة
كريم ليلى للبشرة