طرق العناية بالشعر في الصيف..ووصفات طبيعية لحمايته من الحر والرطوبة

ريهام محمود
ريهام محمود
في
شعر
11557

شعرنا في الصيف بيحتاج عناية خاصة لانه بيتعرض لحرارة الشمس والرطوبة ومية البحر اللي بتأثر عليه بشكل سلبي, عشان كده احنا النهاردة هنقولك على طرق العناية بالشعر في الصيف, وكمان وصفات طبيعية عشان تحميه من اشعة الشمس والحرارة والرطوبة وتعالجي الاثار السلبية اللي بتسببها للشعر.

اثار الشمس السلبية على الشعر:

اول حاجة قبل ما نعرف طرق العناية بالشعر, تعالوا نشوف الاول ايه الاثار السلبية اللي بتسببها الشمس والحرارة على الشعر.

– زيادة العرق والغبار في الصيف بيزود من مشاكل الشعر زي قشرة الشعر, وتقسيم الاطراف, والتجعد, وزيادة تساقط الشعر.

– اشعة الشمس من الحاجات اللي بتسبب جفاف وتقصف الشعر.

– حرارة الصيف ممكن كمان تأثر على فروة الراس, وتسبب جفاف وحروق الشمس, وكتير ممكن يفكروا ان الشعر بيحمي فروة الراس, لكن ده مش صحيح الحقيقة ان فروة الراس ممكن تتأثر جدا بالشمس والحرارة اللي ممكن تسبب جفاف لفروة الراس وده بدوره هيأدي لتلف جذور شعرك.

– غسل الشعر كل يوم من الحاجات اللي ممكن تضره, ونفس الشيء عدم غسل الشعر لفترة طويلة لان ده ممكن يسد مسام فروة الراس ويزود من تساقط الشعر, عشان كده بننصحك بالاعتدال في غسيل الشعر ويكون من مرة لمرتين بس في الاسبوع.

– حرارة الشمس ممكن تحرق الشعر زي البشرة بالظبط وتأثر على لونه, ولو شعرك مصبوغ بننصحك متقعديش في الشمس فترات طويلة لان ده ممكن يخلي اللون يروح بسرعة.

– لو بتلاحظي في الصيف ان شعرك بيكون دهني زيادة ده بيكون بسبب العرق الزيادة, وممكن كمان يكون بسبب انك بتدهني واقي الشمس قريب من شعرك.

العناية بالشعر في الصيف 1
العناية بالشعر في الصيف 1

طرق العناية بالشعر في الصيف:

زي ما قولنا في البداية ان الشعر ممكن يتعرض للضرر في الصيف لاسباب كتير, زي التعرض المفرط لاشعة الشمس, العرق, الرطوبة, والتعرض لمية البحر وحمام السباحة, الاسباب دي كلها ممكن تسبب اضرار طويلة المدى لشعرك, وعشان تتفادي كل المشاكل دي هنقولك ازاي تحميه.

لكن في البداية عشان تختاري المنتجات المناسبة لشعرك وتجيب معاكي نتايج كويسة حطي في اعتبارك حاجتين:

1- نوع فروة الراس: دهنية, جافة, بتعاني من القشرة, الحكه, او مختلطة, او بتعاني من اي مشاكل طبية.

2- نوع الشعر: مفرود, مجعد, مموج, مصبوغ, معالج باي منتج, معمول له فرد.

لازم تعرفي الاول نوع شعرك وفورة راسك من بين الانواع دي عشان تقدري تختاري له المنتجات المناسبة ليه.

1- اتجنبي وضع منتجات كتير على الشعر:

الصيف بالفعل بينشف الشعر وبيضره, عشان كده حاولي تتجنبي في الفترة دي استخدامات علاجات كيميائية عليه, واتجنبي صبغة كتير.

ولو انتي عايزة تصبغي شعرك في الصيف عشان تغيري اللوك, حاولي انك تعملي ده قبل ما حرارة الشمس تكون قوية اوي بشهر او شهرين.

العناية بالشعر في الصيف 2
العناية بالشعر في الصيف 2

2- استخدمي بلسم الشعر:

زي ما قولنا الشمس والحرارة بينشفوا الشعر وبيسحبوا منه الرطوبة, بالتالي انتي لازم تعوضي الرطوبة اللي الشعر بيفقدها باستخدام بلسم الشعر, اختاري نوع مناسب لشعرك, ولو هتنزلي البحر او حمام السباحة افتكري قبل ما تنزلي تحطي Leave-in conditioner وتغطي الشعر بطاقية السباحة.

العناية بالشعر في الصيف 3
العناية بالشعر في الصيف 3

3- قللي من غسل الشعر بالشامبو:

على الرغم من الحرارة والعرق اللي هيخليكي تبقي عايزة تغسلي شعرك كل يوم, لكن ده هيضر الشعر اكتر من انه هينفعه, لان استخدام الشامبو زيادة عن اللزوم ممكن يسبب جفاف فروة راسك وشعرك اكتر.

لو انتي من النوع فروة راسك بتعرق بسرعة, وبتحتاجي تغسليه كتير, في الحالة دي استخدمي نوع شامبو خفيف مناسب للصيف.

لما تيجي تغسلي شعرك استخدمي الشامبو على فروة الراس بس مش الشعر كله, ولما تيجي تشطفي شعرك رغوة الشامبو هتنزل على باقي الشعر تنضفه.

العناية بالشعر في الصيف 4
العناية بالشعر في الصيف 4

4- متغسليش شعرك قبل السباحة:

متستخدميش الشامبو قبل ما تنزلي البحر او حمام السباحة, لان ده هيجرد شعرك من كل الزيوت الطبيعية اللي بتحميه وهيخلي معرض اكتر للمواد الكيميائية والملح اللي في المية.

بمجرد خروجك من حمام السباحة او البحر وعايزة تغسلي شعرك, استخدمي نوع شامبو بيحتوي على حمض الايثيلين رباعي الاسيتيك, ده هيساعد على ازالة اي اثار ضارة للكلور او الملح.

العناية بالشعر في الصيف 5
العناية بالشعر في الصيف 5

5- اتجنبي الحرارة:

الشمس بالفعل بتعرض شعرك للحرارة, عشان كده حاولي تتجنبي تعريض الشعر لحرارة زيادة على قد ما تقدري, سواء بالسيشوار او المكوى, ولو عايزة تستخدمي عليه الحرارة, اغسلي شعرك وسيبيه نص ساعة قبل ما تعمليه عشان تديه فرصه ينشف شوية في الهوا, وحاولي تتجنبي استخدام مكوى تصفيف الشعر والكيرلر وسيبيه طبيعي بقدر الامكان.. شوفي من هنا طرق عمل سبراي حامي من الحرارة بمكونات طبيعية.

العناية بالشعر في الصيف 6
العناية بالشعر في الصيف 6

6- قصي الشعر:

الصيف يعتبر انسب وقت عشان تعملي قصة جديدة لشعرك, وتتخلصي من الاطراف المقصفة, لكن لو انتي مش من محبات قص الشعر, ممكن تقصريه بشكل بسيط وتتخلصي بس من الاطراف المقصفة والمنقسمة عشان ترجعي الحياة لشعرك.

العناية بالشعر في الصيف 7

7- اهتمي بشعرك لو مصبوغ:

لو انتي صبغتي شعرك جديد, لازم تهتمي بيه اكتر خلال فترة الصيف عشان تحافظي عليه على قد ما تقدر من ضرر الصبغة اللي ممكن تسبب جفاف الشعر.

لما تيجي تختاري منتجات العناية بالشعر, اختاري المنتجات اللي معمولة مخصوص للشعر المصبوغ, ولو صبغة شعرك جديد حاولي تتجنبي التعرض للشمس كتير لان ده ممكن يخلي اللون يبهت ويروح بسرعة, ولو هتقعدي كتير في الشمس الافضل انك تغطيه ببرنيطه او سكارف.. شوفي من هنا وصفات طبيعية لعلاج الشعر المصبوغ.

العناية بالشعر في الصيف 8

8- استخدمي واقي من الشمس:

افضل طريقة عشان تحمي الشعر من الشمس انك تلبسي سكارف, لكن لو انتي مش حابه ده, ممكن تستخدمي Leave-in conditioner يكون بيحتوي على عامل حماية من الشمس, وحاولي تختاري منتجات الشعر بتاعتك كلها يكون فيها عامل حماية قوي من اشعة الشمس, لكن لما تستخدمي منتجات فيها عامل حماية اتأكدي انك تغسلي شعرك بمجرد ما ترجعي البيت عشان تشيلي اثار عامل الحماية من الشعر.

العناية بالشعر في الصيف 9

9- اتحكمي في الهيشان:

حرارة الصيف بتخلي الشعر جاف وده ممكن يسبب هيشانة, جربي انك تتحكمي في الهيشان ده بانك تلميه او تربطيه بتسريحات مختلفة من اول الضفاير وديل الحصان لحد الكحكة, ولم الشعر مش بس هيحميه من الهيشان لكن كمان هيقلل العرق.. شوفي من هنا وصفات طبيعية للتخلص من هيشان وتجعد الشعر.

العناية بالشعر في الصيف 10

10- اشربي سوايل كتير:

لما تعملي كل الخطوات اللي فاتت عشان تحمي شعرك من الشمس, لكن مش بتشربي كمية مية كفاية يبقى مش هتوصلي لنتايج, شعرك وبشرتك هيستفيدوا بشكل كبير جدا من السوايل, عشان كده لازم تتأكدي انك بتشربي سوايل كتير عشان تساعدك على الحفاظ على صحة شعرك وترطيبه, حاولي تدخلي الخضار والفواكه الطازة في نظامك الغذائي على قد ما تقدري, ده يعتبر من الحاجات الاساسية للعناية بالشعر في الصيف.

العناية بالشعر في الصيف 11

11- غسل الشعر بالبلسم:

الشعر في الصيف بسبب الحر والعرق بيحتاج يتغسل باستمرار, بس زي ما قولنا استخدام الشامبو كتير هيضر الشعر, لكن الشامبو مش هو الحل الوحيد لتنضيف الشعر, غسل الشعر بالبلسم بس يعتبر عناية مثالية للشعر في الصيف, كل اللي هتعمليه بلي شعرك بالمية وحطي البلسم وسيبيه لمدة دقيقتين وبعدين اشطفيه, غسل الشعر يوميا بالبلسم هيخليكي تستغني عن الغسيل بالشامبو لمدة من 3 – 4 ايام.

العناية بالشعر في الصيف 12

12- الغسيل الجاف:

لو طبيعة شعرك دهني او بتحسي انه بيفرز دهون زيادة في الصيف وحاسه انه محتاج يتغسل بالشامبو, ممكن تستبدلي الشامبو العادي بالشامبو الجاف ومتوفر منه انواع كتير موجودة في السوق, وممكن بكل بساطة تستخدمي البيبي بودر, رشيها على فروة الراس وسرحيه هتقوم بنفس مهمة الشامبو الجاف, ودي واحدة من ابسط نصايح العناية بالشعر في الصيف.

العناية بالشعر في الصيف 13

13- رطبي الشعر بعمق:

خلال فترة الصيف الشعر بيتعرض للجفاف اكتر من اي وقت تاني في السنة, ولو انتي بتعرضي شعرك للشمس كتير هتكوني محتاجة للعناية بيه بشكل منتظم, وبالتالي ترطيب الشعر بعمق من الحاجات المهمة للشعر عشان تحافظي على شعرك رطب ومتغذي, ممكن تعملي مرة في الاسبوع حمام كريم او حمام زيت عشان ترطبيه بعمق.

العناية بالشعر في الصيف 14

14- اعتمدي على التسريحات اللي بتحمي الشعر:

في الصيف حاولي تعتمدي على التسريحات اللي تحافظ على الشعر زي ديل الحصان او الكحكة العالية, هتديكي لوك حلو للشعر وفي في نفس الوقت هتحمي شعرك من التلف, ولو شعرك قصير تقدري تختاري تسريحات مناسبة لطول شعرك.

العناية بالشعر في الصيف 15

15- استخدمي منتجات الشعر الصح:

اختاري المنتجات اللي بتجدد وبترطب الشعر, واتجنبي المنتجات اللي بتحتوي على الفورمالديهايد “الكحول”, والمنتجات اللي بتكون مكتوب عليها Volumizing او Bouncy, لانها بتجفف الشعر عشان كده الافضل تجنبها.

العناية بالشعر في الصيف 16

16- العلاج الليلي:

حطي Leave-in conditioner على المناطق الجافة والهايشة من الشعر, ولفي شعرك بغلاف بلاستيك او فوطة وسيبيه طول الليل هتقومي الصبح بشكل رطب ومن غير هيشان.

العناية بالشعر في الصيف 17

وصفات طبيعية لحماية الشعر في الصيف:

1- ماسك البيض والمايونيز للشعر الجاف والتالف:

المكونات:

¼ كوباية زبادي.

¼ كوباية مايونيز.

بياض بيضة.

الطريقة:

اخلطي المكونات مع بعض, وحطي الخليط على الشعر وسرحيه بمشط سنانة واسعة عشان توزعي الخليط بالتساوي, سيبيه لمدة 30 دقيقة, وبعدين اغسليه بالمية.

العناية بالشعر في الصيف 18
العناية بالشعر في الصيف 18

2- ماسك الترطيب العميق لاعادة الرطوبة للشعر:

المكونات:

كوباية مايونيز بدرجة حرارة الغرفة.

½ كوباية زيت زيتون.

3 صفار بيض.

الطريقة:

اخلطي المكونات مع بعض, حطي الخليط على الشعر كله وركزي على الاطراف بشكل خاص, ولو تقدري لفي الشعر بفوطة وسيبي الماسك لمدة 20 دقيقة, وبعدين اغسليه بالمية.

العناية بالشعر في الصيف 19

وصفات لاصلاح اضرار الشمس على الشعر:

3- ماسك الالوفيرا:

اخلطي جل صبار الالوفيرا كمية مناسب لطول وكثافة شعرك مع كان نقطة من عصير الليمون, وحطي الخليط على شعرك سيبيه لمدة 15 دقيقة وبعدين اغسليه.

العناية بالشعر في الصيف 20

4- ماسك الموز:

اهرسي ثمرة موز ناعم جدا, وضيفي عليها 1 معلقة كبيرة عسل نحل, حطي الخليط على الشعر وسيبيه 20 دقيقة وبعدين اغسليه.

العناية بالشعر في الصيف 21

5- ماسك البيض:

البيض مفيد جدا وفعال لاصلاح تلف الشعر, لو شعرك دهني استخدمي بياض البيض كماسك للشعر, ولو شعرك جاف استخدمي صفار البيض بس, وسيبيه على الشعر حوالي 20 دقيقة وبعدين اغسليه بمية فاترة.

العناية بالشعر في الصيف 22

6- ماسك العسل وزيت الزيتون:

اخلطي من 3 – 4 معالق كبيرة عسل مع معلقة كبيرة زيت زيتون, وممكن كمان تضيفي صفار بيضة للخليط ده, حطيه على الشعر وسيبيه 20 دقيقة وبعدين اغسليه بالمية.

العناية بالشعر في الصيف 23

7- ماسك الفراولة:

اهرسي 20 حبة فراولة, وضيفي عليهم معلقة كبيرة مايونيز, لحد ما يبقى عندك خليط ناعم وكريمي, حطيه على الشعر وسيبيه 20 دقيقة وبعدين اغسليه, البذور الموجودة في الفراولة بتحتوي على خصائص تقشير وتنضيف لفروة الراس والفيتامينات والاحماض اللي في الفراولة بتساعد على استعادة واصلاح الشعر.

العناية بالشعر في الصيف 24

8- ماسك الزبادي:

الماسك ده من ابسط الوصفات اللي بتساعد على علاج تلف الشعر, حطي الزبادي على الشعر وسيبيها لمدة 15 دقيقة وبعدين اغسليها, وممكن تضيفي للزبادي معلقة عسل نحل.

العناية بالشعر في الصيف 25

9- الخل:

حطي كمية بسيطة من الخل مع المية اللي هتشطفي بيها شعرك اخر شطفة, الخل بيساعد على اعادة التوازن للشعر وبيحافظ عليه وبيديه لمعة.

العناية بالشعر في الصيف 26

اهم حاجة في الوصفات دي الاستمرار والانتظام, وبعد فترة قصيرة هتلاحظي النتايج على شعرك.

مقالات متعلقه

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت

طريقة العناية بالشعر في الشتا وفترة الرياح الموسمية

طريقة العناية بالشعر في الشتا وفترة الرياح الموسمية