طريقة عمل خبز باباروتي ” Coffee buns” بالخطوات والفيديو

بقلمريهام محمود فيحلويات visibility228

خبز باباروتي او “Coffee bun” هو نوع خبز مكسيكي متغطي بكريمة الشوكولاتة من فوق ومحشي بالزبدة, وفي الفترة الاخيرة هنلاقي في كتير من الكافيهات انتشر فيها تقديمه جدا مع وجبة الفطار او لوحده مع اضافة ايس كريم, والنهاردة من خلال موضوعنا هنقولكم على طريقة عمل خبز باباروتي في البيت بالخطوات والفيديو.

طريقة عمل خبز باباروتي:

مكونات العجينة:

250 جرام دقيق.

1 بيضة.

150 مل كوباية لبن دافي.

30 معالق كبيرة زبدة.

½ معلقة صغيرة ملح.

1 معلقة كبيرة سكر.

1 ½ معلقة صغيرة خميرة فورية.

طريقة عمل خبز باباروتي

مكونات كريمة الشوكولاتة:

بيضة.

2 معلقة صغيرة قهوة بودر.

50 جرام زبدة غير مملحة.

50 جرام سكر بودرة.

50 جرام دقيق.

½ معلقة صغيرة ملح.

طريقة تحضير العجينة:

اول حاجة جهزي خليط الخميرة اخلطي اللبن الدافي مع الخميرة ومعلقة صغيرة سكر وقلبيهم مع بعض, وسيبيهم على جنب.

ابدأي جهزي العجينة اخلطي كل المكونات الجافة الاول مع بعض الدقيق, السكر, الملح, وبعدين ضيفي البيضة وخليط الخميرة اللي جهزناه في الخطوة اللي فاتت, قلبي المكونات مع بعض وابدأي اعجنيها بايدك كويس افردي ولمي فيها لمدة من 1 – 2 دقيقة, لما تحسي العجينة لمت معاكي ضيفي لها الزبدة, وابدأي اعجني فيها تاني لمدة من 10 – 15 دقيقة لحد ما تلم كلها وميبقاش في عجينة لازقة في الطبق, امسكيها وافضلي اخبطي فيها في الطبق كرري ده كذا مره لحد ما تلاقي العجينة بقت بتمط معاكي, اعمليها على شكل كورة جوه الطبق وغطيها بكيس بلاستيك وسيبيها حوالي ساعة لحد ما تخمر وحجمها يتضاعف.

طريقة عمل خبز باباروتي

طريقة تحضير كريمة الشوكولاتة:

جهزي القهوة ضيفي القهوة مع 2 معلقة صغيرة مية سخنة, ودوبيهم مع بعض, وسيبي خليط القهوة على جنب, وممكن تستخدمي القهوة العادية او كاكاو او نسكافية او اسبريسو, وممكن تزودي القهوة لو عايزة طعم القهوة يكون واضح اكتر يعني حسب رغبتك.

ابدأي جهزي خليط الكريمة, في طبق كبير حطي الزبدة واضربيها بالمضرب الكهربا, لما تنعم خالص ضيفي لها السكر البودرة واضربيهم تاني مع بعض لحد ما يبقى قوامها كريمي,ضيفي الدقيق والبيضة وخليط القهوة واضربي المكونات كلها مع بعض كويس, لحد ما يبقى ناعم مافيهوش اي كتل, وانقلي الخليط في كيس حلويات, او كيس بلاستيك عادي وافتحيه من تحت فتحة صغيرة.

هنبدأ دلوقتي مرحلة التشكيل رشي الرخامة دقيق, وهاتي العجينة قطعيها بالسكينة 8 قطع متساوية, واعملي كل قطعة على شكل كورة, وغطيهم وسيبيهم يرتاحوا لمدة 10 دقايق, بعدها هاتي كل كورة افرديها بايدك وحطي فيها في النص قطعة زبدة صغيرة واقفليها واعمليها على شكل كورة تاني.

بعد ما تحشي الكور كلها بالزبدة رصيهم في الصينية اللي هتحطيها في الفرن, وغطيهم وسيبيهم يرتاحوا من 30 – 40 دقيقة, لحد ما حجمهم يتضاعف تاني.

هاتي كريمة الشوكولاتة وابدأي على كل كورة امشي بالعجينة اعملي دواير جوه بعض لحد ما تغطي الوش كله, حطيها في الفرن على درجة حرارة 180 درجة تقريبا لمدة من 15 – 18 دقيقة, وطلعيها من الفرن.

الطريقة بالفيديو:

4 طرق لعمل الزبادي المثلجة بنكهات مختلفة بالخطوات والفيديو

طرق لعمل الزبادي المثلجة