وصفات مشروبات رائعة تنعشك في حر الصيف
في الصيف والحر بنكون محتاجين حاجات ترطب لنا الجو وتنعشنا وتقلل الاحساس بالحر والرطوبة, ومش هنلاقي احسن من المشروبات الباردة هي اللي تقوم بالمهمة دي, عشان كده النهاردة هنقولك مجموعة وصفات مشروبات للصيف تنعشك في حر الصيف.
وصفات مشروبات للصيف:
1- موهيتو:
المكونات:
10 ورقات نعناع.
معلقة صغيرة سكر.
¼ كوباية عصير ليمون.
ثلج مجروش.
¾ كوباية سفن اب.
ليمونة متقطعة شرايح.
طريقة التحضير:
في طبق صغير اخلطي النعناع مع السكر وعصير الليمون واهرسيهم مع بعض لحد ما تلاقي ريحة النعناع ظهرت اوي, حطي الخليط في كوباية كبيرة وضيفي عليه الثلج وشرايح الليمون وصبي عليهم السفن اب, واستمتعي بمشروب بارد لذيذ.
2- عصير الليمون والنعناع والخيار:
المكونات:
2 ثمرة خيار.
¼ حزمة نعناع فريش.
½ معلقة صغيرة بشر قشر ليمون.
½ كوباية عصير ليمون.
4 كوبايات مية سخنة.
5 معالق كبيرة سكر.
للتزيين:
½ كوباية مكعبات ثلج.
1 ثمرة خيار متقطعة شرايح رفيعة.
ورق نعناع فريش.
طريقة التحضير:
اغسلي الخيار كويس, وابشريه بالمبشرة, اخلطي بشر الخيار مع بشر الليمون واوراق النعناع, وحطيهم في شاشة واضغطي عليهم صفيهم, وممكن تعمليهم في الخلاط وتصفيهم.
اخلطي السكر وعصير الليمون في المية السخنة وقلبيهم لحد ما السكر يدوب, امزجي خليط الليمون مع خليط الخيار والنعناع اللي حضرناه, وحطيهم في التلاجة لمدة ساعة لحد ما يسقع, وصبيه في كوبايات مع مكعبات الثلج وشرايح الخيار واوراق النعناع.
3- بانش البطيخ:
المكونات:
بطيخة حوالي 6 كيلو.
3 كوبايات سفن اب.
طريقة التحضير:
قطعي البطيخ ونضفيه من اللب بتاعه, واضربيه في الخلاط وبعدين صفيه على المصفي, بحيث يبقى عندك عصير من غير اي كتل فيه, هيطلع عندك حوالي 9 كوبايات عصير.
حطي العصير في التلاجة حوالي ساعة لحد ما يسقع, وبعدين طلعيه واخلطي معاه السفن اب, وقلبيهم مع بعض, وكده يبقى العصير جاهز عندك صبيه في كوبايات مع مكعبات الثلج.
4- عصير التوت مع الليمون:
المكونات:
170 جرام توت.
1 معلقة كبيرة سكر.
2 كوباية مية.
ثلج.
1 معلقة كبيرة نعناع مفروم ناعم.
2 معلقة كبيرة عصير ليمون.
من ½ – ¾ كوباية سفن اب.
طريقة التحضير:
في حلة حطي التوت مع المية والسكر وحطيهم على نار متوسطة, اول ما تلاقي التوت سخن هاتي شوكة واهرسيه كويس, ممكن تهرسيه بالهاند بلندر, بمجرد ما الخليط ينعم, صفيه بالمصفى, وحطيه في التلاجة لحد ما يبرد لمدة 15 دقيقة تقريبا.
اخلطي النعناع مع عصير الليمون وضيفي لهم السفن اب, قلبيهم مع بعض كويس, وبعدين ضيفي الخليط ده لعصير التوت وقلبيهم مع بعض كويس, صبي العصير في كوبايات مع مكعبات الثلج.
5- بانش الاناناس والليمون:
المكونات:
2 كوباية عصير اناناس.
2 كوباية صودا بطعم الليمون.
طريقة التحضير:
بطل بساطة اخلطي عصير الاناناس ومع الصودا وقلبيهم مع بعض, وصبي العصير في كوبايات مع مكعبات الثلج.
6- عصير الكركدية والفراولة:
المكونات:
5 كوبايات مية.
½ كوباية اوراق كركدية.
1 كوباية فراولة مهروسة.
10 اوراق نعناع.
من 2 – 3 معالق كبيرة عسل نحل “للتحليه”, ممكن تستبدلية بالسكر.
ثلج.
فراولة, ورق نعناع للتزيين.
طريقة التحضير:
في حلة على نار عالية حطي المية وبمجرد ما تغلي, ضيفي لها اوراق الكركدية, وقلبيه وبعدين ارفعيه من على النار, ضيفي الفراولة واوراق النعناع والعسل او السكر للكركدية, سيبي المكونات منقوعة لمدة 20 دقيقة تقريبا.
صفي الخليط على مصفى, انقليه في ابريق وحطيه في التلاجة, وسيبيه لحد ما يسقع, بعدها هيبقى جاهز للتقديم صبيه في كوبايات مع كعبات الثلج وزينيه بالفراولة وورق النعناع وشرايح الليمون.
7- موهيتو الخوخ والجنزبيل:
المكونات:
½ ليمونة كبيرة متقطعة ربعين.
ضريحة جنزبيل طازة متقطعة.
8 اوراق نعناع.
2 ½ معلقة صغيرة سكر.
1 ثمرة خوخ متوسطة متقشرة ومتقطعة.
سفن اب.
طريقة التحضير:
في كوباية كبيرة اخلطي الليمون والجنزبيل واوراق النعناع والسكر واضغطي عليهم بالمعلقة وقلبيهم لد ما السكر يدوب والليمون ينزل العصير بتاعه,, ضيفي الخوخ واهرسيه لحد ما ينزل العصير بتاعه, ضيفي مكعبات التلج والسفن اب.
8- عصير المانجا مع النعناع:
المكونات:
500 جرام مانجا.
½ كوباية سكر.
2 معلقة صغير ملح.
2 معلقة كبيرة اوراق نعناع مفرومة ناعم.
2 كوباية مية.
طريقة التحضير:
اغسلي المانجا كويس جدا وقطعيها في حلة حطي المانجا المتقطعة مع المية, وسيبيها على النار لحد ما المانجا تطرى خالص, ارفعيها من على النار وسيبيها تبرد خالص وبعدين قشري القشر بتاعها.
اخلطي باقي المكونات مع المانجا وضيفي لها كوبايتين المية وقلبيهم مع بعض, صبي العصير في الكوبايات مع مكعبات الثلج.
9- اللبن الرايب مع النعناع:
المكونات:
300 مل لبن رايب.
2 معلقة كبيرة سكر.
1 معلقة كبيرة نعناع مجفف.
ثلج.
طريقة التحضير:
اخلطي اللبن الرايب مع السكر والنعناع, قلبيهم مع بعض كويس, صبي الخليط في الكوبايات مع مكعبات الثلج.
10- عصير البطيخ مع الليمون:
المكونات:
6 كوبايات بطيخ متقطع.
4 كوبايات مية باردة.
¾ كوباية عصير ليمون ساقع.
2/3 كوباية سكر “للتحلية حسب الرغبة”.
ثلج.
نعناع.
طريقة التحضير:
اضربي البطيخ في الخلاط وصفية بالمصفى هيطلع معاكي تقريبا حوالي 4 كوبايات عصير بطيخ, في ابريق اخلطي المية مع عصير الليمون والسكر وقلبيهم لحد ما السكر يدوب, وبعدين ضيفي لهم عصير البطيخ وقلبيهم مع بعض, حطيه في التلاجة لحد ما يسقع, وبعدين صبيه في الكوبايات مع مكعبات الثلج والنعناع.
11- عصير المانجا والليمون:
المكونات:
3 كوبايات مية.
1/3 كوباية سكر.
2 ثمرة مانجا متقشرة ومهروسة.
1 كوباية عصير ليمون.
طريقة التحضير:
في وعاء صغير حطي كوباية مية مع السكر وحطيه على نار هادية لمدة دقيقة واحدة لحد ما السكر يدوب, سيبيه يبرد, في ابريق كبير امزجي خليط المية والسكر مع كمية المية الباقية وعصير الليمون والمانجا المهروسة, قلبي المكونات كلها مع بعض كويس, حطيه في التلاجة لحد ما يسقع كويس, صبيه في الكوبايات مع مكعبات الثلج واوراق النعناع.
12- عصير العنب الاحمر مع الليمون:
المكونات:
1 كوباية سكر.
4 عيدان نعناع طازة.
1 كوباية عصير عنب.
¾ كوباية ليمون.
ليمونة متقطعة شرايح.
طريقة التحضير:
اخلطي السكر مع عيدان النعناع و 1 ½ كوباية مية, وحطيهم على نار متوسطة لحد ما السكر يدوب, ارفعي الخليط من على النار وشيلي عيدان النعناع وسيبيه يبرد.
في ابريق اخلطي عصير العنب وعصير الليمون وكوبايتين مية ساقعة, وبعدين ضيفي لهم خليط السكر بالنعناع اللي جهزناه, قلبيهم مع بعض كويس, وحطي الخليط في التلاجة حوالي ساعتين على الاقل لحد ما يسقع, صبي العصير في الكوبايات مع مكعبات الثلج وشرايح ليمون وعنب.
دوناتس الايس كريم بالشوكولاتة والنعناع
