3 طرق لتنحيف الوش من غير كونتور
كلنا عارفين ان الكونتور مهمته ان ينحف الوش ويحدد الملامح, لكن في بنات كتير الكونتور بالنسبة لها صعب ومش بيعرفوا يظبطوه, عشان كده احنا النهاردة هنسهل عليكي الموضوع ده لو انتي مش بتحبي الكونتور او مش بتعرفي تظبطيه هنقولك 3 طرق لتنحيف الوش من غير كونتور.
طرق لتنحيف الوش من غير كونتور:
1- تنحيف الوش بالبلاشر:
البلاشر بيلعب دور كبير جدا في تنحيف الوش, المره الجاية لما تيجي تحطي البلاشر حطيه فوق شوية عن عضمتين الخد اكتر من انتي متعودة تحطيه كل مرة, الطريقة دي بتساعد على تمديد عضم الخد وجذب الانتباه للمنطقة اللي فوق اكتر بعيد عن الخدود, وحاولي تحطي تاتش بلاشر على منطقة منابت الشعر والانف والجبهه عشان تعملي بُعد وتداري اي منطقة ممكن تكون فيها حجم زيادة وعايزة تنحفيه, جربي تستخدمي البلاشر الكريمي حطيه بصوابعك على خدودك, وبعدين ادمجيه بفرشة البلاشر او البودر.
لو انتي وشك مدور بننصحك تستخدمي بودرة مات مضغوطة تكون اغمق من لون بشرتك بدرجة واحدة, واعملي بيها تظليل خفيف على عضمة الفك, وجوانب الانف, ومنابت الشعر, وممكن تستخدمي بودرة بتلمع او هايلايتر حطي منهم تاتش بسيط باطراف صوابعك على عضم الخدين وعضمة الترقوة لو لابسة حاجة مفتوحة من قدام.
2- تنحيف الوش بالايلاينر:
الايلاينر كمان من الحاجات اللي ممكن يكون ليه دور انه يبين الوش بشكل انحف, لانه هيجذب الانتباه للعيون, وهيديكي تأثير انحف للوش لو رسمتيه لفوق اكتر من المعتاد, متعمليش الرسمة او الشكل الطبيعي للايلاينر, حاولي المره الجاية وانتي بترسميه مدي الخط او اسحبيه من اعلى نقطة في شكل العين ناحية الاذن, يعني حاولي ترسمي خط مسطح يكون ممتد موازي للوجه بدل ما يكون اتجاهه لتحت, متقلقيش من مد الخط وانك تخليه مجنح اكتر لفوق, وفي الزاوية الداخلية للعين حطي تاتش هايلايتر بسيط عشان تدي وسع اكتر للعين, لان ظهور العين هيساعدك ان الوش يبان انحف.
3- تنحيف الوش بالستروبنج:
احنا اتكلمنا قبل كده عن الستروبنج وقولنا ان هو يعتبر بديل سهل للكونتور, كل اللي بتعمليه انك بتستخدمي الهايلايتر لتحديد الوش بدل الكونتور, زي الطريقة اللي استخدمناها مع البلاشر برسمه فوق عضمة الخد, هنعمل نفس الطريقة بالستروبنج بانك تحطي الهايلايتر فوق عضمة الخد, وعلى نص الجبهة, ومنتصف الانف, وممكن تاتش بسيط على منتصف الدقن.
حاجة اخيرة هتساعد ان الوش يبان افتح انك تختاري لون غامق للشعر, او لو مش عايزة تغمقيه كله ممكن تعمليه اومبري وتخلي الجزء اللي حوالين الوش غامق وتفتحي النص اللي تحت من الشعر.
وفي الاكسسوارات حاولي دايما اختيار الحلقان الطويلة واللي بتكون على شكل مستطيل, هتساعد انها تبين شكل الوش انحف.
تكنيك الكونتور و الهايلايت باستخدام الحروف و الارقام
